當細路仔升咗中學之後朋友對佢哋嘅影響力將會越嚟越大而家長對佢哋嘅影響力就會相對變小，可以話係朋友講一句好過父母講十句。所以除咗喺學校 嘅同學之外，要幫佢哋識學校以外嘅朋友都非常重要。正所謂近朱者赤近墨者黑，細路仔身處嘅朋友圈係點，佢哋自然就會學呢個朋友圈入面嘅生活方式。
我聽我個教書朋友講曾經佢遇過一個情況係一個中一個小朋友入到佢學校， 個小朋友本來生活好有規律，喺學校入面都聽老師講，爸爸媽媽對佢亦都緊張。但係老師發覺呢個小朋友慢慢變得上堂唔專心， 甚至乎喺同學面前講粗口，又曾經試過想打同學。所以老師就接觸呢個學生嘅家長了解。發覺問題係原來爸爸媽媽都以為佢大過，開始畀多咗自由佢，包括冇湊佢放學亦冇安排佢放咗學嘅時間，後來先發覺呢個細路透過啲舊同學識咗啲其他嘅朋友，家長就淨係知道呢個細路越嚟越遲返屋企，原來佢同啲朋友每日放學後就喺啲公園度坐。 我朋友講因為呢個細路平時都聽開家長教，好少咁樣喺街度流連。佢突然間出到去個街度嘅時候就發覺原來有啲人可以唔使聽家長講，可以唔使返學可以成日去玩，佢覺得咁樣好開心，而家長又因為返咗工以為個細路仔仲係好似以前咁所以冇特別理佢，最後發覺只係幾個月嘅時間個細路仔變得越嚟越難教， 去到中二嘅時候 就已經差咗個地步要送佢入寄宿學校，但係到最後都係甩唔到班壞朋友。
所以除咗學校之外，趁小朋友仲細我哋就要幫佢入去啲合適嘅圈子入面識朋友。正如我朋友講，放咗學會去補習嘅學生都唔會差得去邊，所以如果家長冇時間可以幫佢喺補習社入面會識到啲有生活規律嘅朋友。另外肯做運動嘅亦都唔會差得去邊，所以參加啲運動訓練，喺入面幫佢識到朋友。又或者參加學校嘅課外活動，總之就要幫佢係一啲正常生活圈子入面嘅朋友圈度識朋友。
當家長見到細路仔一路長大而開始放多啲自由畀佢哋嘅時候，家長絕對唔能夠掉以輕心， 我哋要喺放自由畀佢哋之前開始做好準備，幫佢哋建立有規律嘅生活習慣，要幫佢哋分別乜嘢係唔好嘅行為。我自己都有個生活習慣，我會經常打電話返屋企，放工嘅時候我會打電話返去同佢哋講幾時返到。如果要出街通常出門口之前都會講低大約幾點返，咁返之前就會打電話返屋企同佢哋講。 除咗唔使佢哋擔心之外，另外亦都係做緊個榜樣畀佢嚟睇乜嘢叫做有交帶。希望佢哋將來大啲自己同朋友出街嘅時候都會有同樣嘅習慣。
當細路仔進入青少年期嘅時候， 對家長嚟講子女識乜嘢朋友係其中一個大挑戰。 唔想仔女因為朋友而學壞，真係要自細開始幫佢哋準備。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
