前幾日放工返到屋企，見到房門上面貼咗兩張畫得好靚嘅圖畫，行近啲睇下原來係兩張通緝令。家姐同細佬分別畫咗一人一張都係通緝佢個訓導主任。 佢兩個用咗好多心機畫呢兩張通緝令，阿仔平時都冇寫咁多字但係呢張通緝令佢寫得非常詳細，連訓導主任犯咗乜嘢罪佢都寫埋。家姐就平時唔係好畫畫但係呢張訓導主任通緝令就將訓導主任個樣佢畫得好仔細，連我都要讚佢做乜畫到咁靚，平時又唔見你畫得咁靚。佢話唔畫得咁仔細驚啲人拉唔到佢喎！真係畀佢兩個笑死。
阿仔本來都已經好驚啲老師覺得佢哋好惡，加上我之前都有講過佢有一次因為喺學校做住功課等家姐放學嘅問題，畀訓導主任話個之後，佢就更加唔鍾意個訓導主任。佢兩姊弟成日都覺得訓導主任好鍾意鬧學生又鍾意罰同學，所以成日都覺得訓導主任係壞人。總之喺屋企玩親有乜嘢壞人嘅角色都係話佢係訓導主任。幸好佢哋都只係玩，當返到學校之後其實佢哋都好聽老師講。所以佢哋係屋企咁玩我都覺得無傷大雅，最多有陣時當佢哋玩緊而講說話有啲過份嘅時候我都會提下佢哋講說話唔可以太過冇禮貌同埋過份。我都覺得小朋友應該要學識點樣面對佢唔鍾意嘅人，小朋友亦都需要有途徑去發洩佢哋嘅唔開心。只要唔影響到人其實我覺得畀佢哋宣洩吓啲不滿仲好過要佢哋壓抑喺心入面。而且有陣時透過佢哋咁樣玩我都可以多啲知道佢哋心入面嘅諗法。
試過有一次阿仔越玩越興奮，竟然話想喺網上面同佢表哥同埋家姐設立個群組，主題係講老師唔啱嘅嘢。仲已經寫埋email畀表哥同家姐邀請佢哋加入，嗰次我即刻同佢講如果呢個群組畀老師知道會點，佢話老師唔會知因為淨係家姐同埋表哥佢哋三個人嘅群組。咁我就順便藉呢個機會教埋佢哋唔可以亂咁喺網上面講嘢，因為我同佢講如果萬一表哥覺得佢呢個群組得意將佢哋講啲嘢分享咗其他朋友睇咁會點。佢即刻知道大件事所以立即刪除咗個群組，咁我問佢你試下而家叫家姐開佢個email睇吓，我問佢係咪刪除唔到家姐嘅email，跟住我就話佢知其實啲嘢只要一擺咗上網，就算你刪除晒自己嘅嘢都刪除唔到其他人嘅。嗰次其實佢真係驚，試咗幾次想刪除都係發覺刪除唔到，直到家姐同埋表哥都應承佢唔會分享出去同埋刪除咗個email佢先至放心。希望呢個教訓佢三個會學到喺網上面講嘢都要好小心而且要負責任啦！
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
