本帖最後由 csir3290 於 19-1-19 17:02 編輯
以下文章可能會得罪人，請勿對號入座不喜勿插！！
前幾日喺網上面睇到有個家長講緊個小朋友喺遊樂場畀另一個小朋友推撞，其實個家長講嘅嘢我都大致認同，淨係去到最後我覺得好有問題，就係佢提到平時佢都會教個仔千祈唔可以用武力解決問題，但係如果小朋友自己被打佢就一定會教個仔一定要還手。我唔識得講咁樣係啱定錯，但係我一定唔會咁樣教自己嘅小朋友，因為我經常都係教對仔女任何時候都唔應該郁手，就算畀人打都應該係要走或者係同老師講，如果大個咗嘅就要報警。因為武力根本唔可以解決問題，惡亦都唔係代表一切。所以如果畀人哋欺負你又還手嘅話，咁你就會由受害者可能變成埋被告，所以我會教佢哋一定唔可以還手。
唔知點解近呢十年八年總係覺得喺街度見到好多家長教小朋友嘅方法係教到個小朋友好自我中心唔會體諒別人，亦都唔重視守規矩。我每一日都會揸住部車返工放工，差唔多日日都揸車，但係真係近呢十年我發覺喺路面上面越嚟越多唔守規矩嘅人，就算車住一家大細有細路仔喺架車入面都唔見得個家長會更加謹慎更加懂得守規矩。路上面懂得禮讓嘅人越嚟越少，大家都係諗住自己最緊要自己方便唔怕影響到別人。
見到有啲家長教仔女嘅方法真係不敢恭維，事事都自我中心，有乜嘢都係自己嘅仔女啱係人哋有問題，就算明知自己小朋友有問題，都係自己嘅仔女細個唔懂事，所以就應該要就佢同讓佢。但係有冇諗深一層就係因為佢細個佢唔懂事就更加要教佢識佢守規矩同埋識得唔好影響別人。其實有時都唔係好明而家呢一代嘅父母好多都已經受過教育，但係比起我哋上一代嘅父母，好似我自己嘅爸爸媽媽咁，其實佢哋讀書唔多小學程度都冇，但係自細佢哋已經要教我哋要守規矩，做嘢唔好影響別人要有禮貌有責任感 。如果我哋俾人話父母都會覺得係我哋有問題，一定係我哋做錯嘢先至影響到人，人哋先會出聲。喺學校更加唔使講，我哋嘅父母係非常之尊重學校，同學校非常合作，如果學校罰我哋嘅話，一定係我哋做錯。佢哋絕對唔會質疑學校嘅決定，因為學校都係為咗教好我哋。嗰陣嘅父母都好知道如果其實學校要唔理我哋仲容易，老師要嘥時間要嘥心機話我哋其實無非都係為咗我哋好，所以我哋上一代代嘅父母會同學校非常合作。
唔知係咪就係因為而家嘅呢一代父母個個都只係生一個兩個，個個都係重視自己，乜都係覺得自己嘅仔女最重要。所以發生啲乜嘢事佢哋都係覺得要保護自己仔女嘅權益。表面上好似係保護佢，但係其實係教佢哋自我中心同逃避責任。我哋上一輩嘅父母教我哋如果哋影響到人哋，無論係唔係我哋做錯佢都好重視教我哋一定要同人哋道歉，但係而家呢一代父母好似對同人哋道歉已經唔係好重視甚至乎仲要人哋道歉返轉頭。以前嗰代嘅父母好重視人際關係好重視和諧，好重視要我哋唔好影響到人。但係而家呢一輩嘅父母，可能重視嘅嘢唔同咗，佢哋重視自我，重視個人權益，所以教育佢嘅仔女都會比較自我，樣樣都係以我為專以我為中心。
我唔知邊一套先至係啱，可能根本就冇一套係完全正確，但係我知道幾樣嘢就係，唔守規矩嘅父母唔會教出守規矩嘅仔女，冇禮貌嘅父母都唔會教出有禮貌嘅仔女，唔會顧及他人感受嘅父母唔會教出顧及他人感受嘅仔女，唔懂得承擔只係推卸責任嘅父母唔會教出肯承擔責任嘅仔女，唔會反醒嘅父母亦都唔會教出識得反省嘅仔女。父母嘅價值觀係點，其實仔女嘅價值觀就會係點。到最後承受責任嘅 除咗係自己嘅父母之外社會亦都要幫佢哋承受責任。雖然教仔女唔係一件易事，但係我到而家都仍然相信有一啲核心價值係喺任何時候都唔應該改變，己所不欲勿斯於人會唔會就係其中一個核心價值呢？生仔容易教仔難生咗出嚟就應該識得教佢。未必可以教到佢讀書好叻但起碼都要教到佢一個守規矩盡責任懂禮貌識得關顧別人嘅人。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
依家真係多左好多港孩
返回列表
