本帖最後由 csir3290 於 18-7-22 11:53 編輯
剛剛開始放暑假，早幾日約咗個教書朋友出嚟食飯又聽佢吐一輪苦水。朋友喺一間第三組別(band 3)學校教書，早幾日升中派位放榜後，啲學生嚟註冊有啲家長嘅嘴臉非常之唔好，又話啲學生成績唔好又話啲學生品行差。我個朋友覺得好唔公道，因為其實派得上嚟中學要去到第三組別學校讀書，根本就係啲學生同家長自細喺學習上面就出現咗問題，派到嚟佢間學校其實佢都係執手尾。我朋友成日都會講，其實好好哋點會派去第三組別學校呢？每一個派得去第三組別學校嘅同學其實背後都有個故仔，成績差嘅普遍就係家長細個開始冇理佢哋冇幫佢哋溫習冇陪佢哋養成一個溫習同做功課嘅習慣。品行唔好嘅好多時就係啲家長根本就唔得閒陪佢哋，等佢哋成日出街玩搞到佢哋群咗出邊嘅人，然之後做成品行唔好，又或者根本家長冇時間教佢哋。但係喺第三組別學校教書嘅老師就好似畀人標籤咗 佢哋啲學生唔好就係因為佢哋教得唔好。我個朋友講其實根本就好唔公道，喺第三組別校教書嘅老師要比起其他學校教嘅老師用多好多時間除咗要處理學業問題亦都要處理佢哋品行上面嘅問題。好似我個朋友講邊個唔想喺第一組別學校教書吖，家長又專重佢哋學生又乖成績又好，但係問心嗰句，去得第一組別學校嘅學生，其實本身都已經有一個好好嘅讀書習慣又會很自發做功課，當然家長亦都好緊張。老師只要跟住課程教，其實學生已經可以學得好好 。但係好似我個朋友咁佢係啲第三組別學校校雖然佢哋用心用力盡力去教好啲學生但係又要追程度又要應付公開考試 仲要兼顧埋佢哋嘅品行 雖然盡心盡力但係又會有幾多人認同佢哋做過嘅嘢呢！好多家長都只會埋怨點解個細路仔會派咗入去一間第三組別學校，但係其實佢哋根本就冇諗過佢哋嘅仔女成績差最大嘅責任就係喺父母身上。我個朋友話齋邊個唔想喺名校教吖，只要啲街坊或者親戚朋友知道佢係喺名校教嘅話就會多一分尊重。但係其實喺名校教 只不過係因為呢啲學生叻所以啲人就會覺得佢間學校教得好。但係好似我個friend咁喺第三組別教，一聽到就第一句就話佢間學校啲學生好差㗎喎，一係就問啲學生喺咪好難教，咁對一班喺第三組別學校入面盡心盡力教嘅老師係咪公道呢？香港嘅家長好多時都係著重成績好似我個friend 教嘅呢一類類型中學，就經常被人忽視或者甚至乎覺得佢哋啲學生係垃圾。但係聽我朋友講，其實佢哋嘅目標都唔係話要搞到佢哋文憑試攞乜嘢成績，其實好多時佢哋嘅目標都係想教到啲學生唔好行差踏錯，畢業嘅時候可以喺品行上面裝備好自己然之後出嚟社會工作。其實我好認同我朋友嘅工作因為，如果冇咗佢哋可能個社會上便會多咗好多壞人，我朋友佢哋間學校學生成績雖然一向都唔係幾好 ，但係我知道佢哋盡心盡力咁希望教好每一個學生唔好行差踏錯。所以做家長真係要諗得清清楚楚點樣幫仔女培養佢哋讀書嘅習慣，因為要去到派中學嘅時間先至覺得自己嘅仔女成績差其實已經太遲，因為成績唔好唔係一朝一夕造成，根本就係好多家長自細唔幫仔女培養佢哋學習嘅習慣。好似我朋友講佢間學校根本好大部分嘅家長平時都唔會幫啲仔女睇吓啲功課亦都唔會檢查手冊，佢話佢啲學生好多時本手冊啲家長從頭到尾都冇簽過名，幾時考試測驗都唔知，亦都唔會睇學校啲通告，咁啲仔女知道家長唔知道學校嘅嘢，佢咪好多時可以用到好多唔同嘅方法呃到啲家長。所以我成日都講學習係要從小培養，所以家長千祈唔好輕視一啲好微小嘅習慣，例如每日睇功課，每日溫習每日要睇手冊簽名，要check通告，其實呢啲所有嘅習慣 由佢幼稚園開始就應該要開始培養，只要你啲習慣養成其實仔女嘅成績都唔會差得去邊。最後代我朋友講希望啲家長唔好再對啲第三組別學校有偏見。試諗下佢哋啲學生喺過去咁多年讀書成績都唔好，上到中學佢哋先執手尾，基礎唔好又點能夠期望佢哋喺六年嘅中學生活入面可以變成成績好好然之後考文憑試呢，其實喺第三組別學校校嘅老師都已經盡心盡力去教好佢哋啲學生。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
