本帖最後由 csir3290 於 18-7-29 14:29 編輯
趁阿仔阿女放暑假上星期同佢哋去咗幾日日本旅行，佢哋當然玩得開心。喺同團入面有一對父母帶住佢哋個大約4，5歲嘅仔一齊去旅行。開頭都冇留意佢哋嘅，但係慢慢喺架旅行車度間唔中就聽到個爸爸會叫個仔唔好咁扭計。其實對父母應該好錫個仔，但係喺旁人眼中對父母就有啲縱個仔。又係嗰啲會追住餵飯，小朋友好容易扭計乜嘢都唔食又或者會經常大叫喺架車入面騷擾其他人。間唔使就聽到個爸爸好惡咁話個仔，其實對父母有想控制個仔但係個仔似乎就唔係好聽佢哋講，所以開始我留心對父母尤其是個爸爸會點樣同個仔講嘢，我發覺個爸爸話個仔嘅時候其實都幾惡，但係個仔就係唔聽佢講。連我老婆都同我講話個爸爸淨係得個惡字冇用，因為個爸爸通常當個仔扭計嘅時候，就會同個仔講你唔好扭計得唔得，或者係你唔好咁曳啦好唔好。當個仔曳嘅時候佢會同個仔講啦你再曳就同你返香港，又或者係今晚唔畀你返酒店，又或者係聽日唔同你去邊度玩咁。唔食飯嘅時候就同個仔講你好快啲食嘢得唔得，你唔好乜嘢都唔食啦好唔好。其實爸爸講呢啲說話嘅時候係惡㗎 但係個仔唔聽佢講點解呢？因為我真係聽過有一次當個爸爸同個仔講你唔好咁百厭得唔得嘅時候，個仔真係同佢講唔得，個爸爸就即刻冇曬反應唔知點講落去。其實個爸爸最大嘅問題係出於好多時佢講嘅嘢都係一啲問題而唔係一啲明確嘅指令要個小朋友點做，而當佢講到要罰個小朋友嘅時候又講埋一啲其實個小朋友都知道你罰唔到佢嘅嘢，唔通真係佢再曳你就帶到佢返香港咩。又或者佢唔食嘢你又驚佢唔飽，所以到最後咪又係追住佢餵。所以講到最尾要小朋友知道點守規矩最重要係要講說話要明確要清楚指出佢邊個行為有問題，佢要點做而唔係問問題。而當你想佢承擔後果嘅時候就真係要諗一啲你罰到佢嘅嘢而唔係隨便空口講，可能細路仔細個開頭都會驚 ，但係當你試多兩次原來你發唔到佢佢就會知道其實你得把口，所以點解有啲父母有陣時會話自己其實對個仔女都已經好惡，但點解佢唔驚同冇效呢？其實講到尾咪又係因為好多父母都只係表面兇狠，以為惡就有用。其實根本收唔到想要嘅效果，父母以為自己好惡但係其實根本就係畀個仔女食住咗。要教仔女唔係淨係惡就可以，最重要係講嘢要對仔女受先至有用。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
