早兩日教阿仔做功課，其中有條數學題呀仔做極都做錯，做到阿仔有少少忟忟地，阿仔最後都係叫我講個答案畀佢聽。反而家姐即刻開聲同細佬講話爸爸唔會講個答案畀你聽㗎，爸爸要你自己諗用方法搵個答案出嚟㗎！終於我又用另外一個方法一步一步慢慢引導佢，終於佢自己搵到個方法同計到答案。其實我都有諗既然佢諗咗咁耐都諗唔到， 為咗慳啲時間不如直情講條數式畀佢聽等佢自己計。 但係後來我都係寧願諗過個方法慢慢一步一步引導佢自己 諗個方法出嚟，雖然要用比較多嘅時間，但係終於佢自己計到佢自己都好開心，而且當佢下次遇到同樣嘅題目嘅時候佢都會用同樣嘅方法去諗反而仲幫咗佢。我好明白好多家長嘅感受，我同老婆都要返工，放工返嚟先至睇佢哋啲功課其實都已經好攰，當然想盡快睇完佢哋啲功課改曬要改嘅嘢就可以休息。如果仲要用啲時間去教佢哋去諗方法然之後搵答案其實可能會好攰。但係我同老婆都好知道如果而家唔用呢啲時間去教佢哋搵方法去搵到個答案，到頭來都佢測驗考試遇番同樣嘅題目或者之後做功課遇到同樣嘅題目佢哋都係唔識，其實又係要用返咁多時間去教佢哋。有陣時教仔女做功課我都覺得對家長都係一個挑戰。我哋唔同學校老師，因為喺個班房對住廿幾三十個同學，可能教完一兩次就算，有同學可能唔明但係冇人舉手問咁就好似教完咗。但係當家長返到去對住自己小朋友佢哋唔識就會問，我可能講咗兩次三次佢哋都唔明，對家長嚟講就要諗其他方法點樣去教佢哋令佢哋明白當中嘅原理然之後搵合適嘅答案，所以對家長嚟講都係一個大挑戰。
我對仔女而家讀緊小學，正正就係經歷緊一段好多嘢問好鍾意問點解嘅時間，喺呢段時間我同老婆都明白要維持佢哋嘅好奇心，同埋對求知識嘅慾望嘅重要。教佢哋用方法去搵答案重要過只係講個答案俾佢哋知。但係偏偏要教佢哋用方法去搵答案係會好嘥時間，而且家長要親身同佢哋一齊去嘗試，要慢慢引導佢哋要諗方法去教佢哋。比起只係畀講畀佢聽答案用多咗好多時間，但係我哋相信呢啲都係投資嚟嘅。而家趁佢哋細個用多咗呢啲時間當佢哋將來一路長大嘅時間反而我哋會慳番好多時間。講真有陣時佢哋咁多嘢問，尤其是當自己好攰嘅時間或者想佢哋快快趣趣搞掂啲功課嘅時候，有時都覺得幾煩。但係喺嗰啲時候正正又係要運用我哋強大忍耐力嘅時候，因為只有我哋能夠令到佢哋自己慢慢搵到個方法去搵到答案，佢哋感受到自己搵到答案嘅成功感，咁佢哋先至會有毅力自己去尋找答案。當中佢哋感受到嘅成功感其實都係一啲正面嘅鼓勵令佢哋繼續落去。同埋只要我哋有耐性同佢哋一步一步慢慢搵個答案出嚟其實亦都係一個非常之正面嘅親子時間，亦都係親身示範畀佢哋睇乜嘢叫做耐性。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
