本帖最後由 csir3290 於 18-6-3 15:04 編輯
我同老婆都要返工，好多時間都只係得工人姨姨同啲小朋友喺屋企。工人姨姨雖然好錫對仔女但係佢都未必幫到手教小朋友，所以我同老婆都知道要由細個開始訓練好小朋友嘅生活習慣。我同老婆都覺得最重要當然係要訓練佢哋自己識得做功課，自己識得溫習。等我哋放工返嚟幫佢哋檢查，另外亦都要訓練佢哋自理能力，好似朝頭早唔會賴床， 自己會睇書練琴，會幫手做家務等等。其實要訓練小朋友生活習慣應該越細個訓練越好，因為小朋友愈細個就好似白紙一張乜嘢都未養成，由細細個開始訓練佢哋做，佢哋就會覺得嗰樣係自然而然嘅習慣。好多時家長就係唔為意當小朋友細個嘅時候就要開始訓練佢哋，等佢哋有一啲良好嘅生活習慣。細路仔細個嘅時候其實喺佢哋嘅生活入面只係得食玩同埋瞓，好多生活習慣其實都係要家長用時間慢慢去訓練佢哋，透過每日都做同埋好多正面嘅鼓勵，慢慢等佢哋養成一啲生活習慣。好似做功課同溫習咁，我諗冇小朋友會鍾意玩玩吓嘅時候去做功課同溫習。 所以我哋做家長要好刻意喺細個嘅時候就要慢慢開始訓練佢哋每日都要搵時間溫習，做功課同埋睇書。雖然細個但係就算係小小嘅溫習同功課都要畀佢哋做，等佢哋細個開始就有呢個習慣。當佢哋慢慢長大嘅時候如果要改佢哋一啲嘅生活習慣其實就會越來越困難。因為好多對家長嚟講覺得係一啲唔好嘅習慣，但係偏偏對細路仔嚟講可能都係一啲舒服同埋開心嘅習慣。例如返到屋企唔做功課啦，食零食啦，放學出街玩或者冇禮貌等。好多呢啲大人覺得唔好嘅習慣但係對細路仔嚟講偏偏係開心嘅。當呢啲習慣養成咗如果我哋先至要去改，可能我哋需要用多十倍嘅力都未必做得到。但係家長好多時都唔為意呢啲習慣養成。當發覺有問題嘅時候覺得要去改，但係又唔願意用好多嘅時間，希望可以有方法做一啲嘢可以好快就改到。其實要養成一個好習慣係需要好長嘅時間，相比起養成一個壞習慣嘅時間快好多，因為對細路仔嚟講呢啲可能係令佢哋開心嘅習慣。偏偏要改一個壞習慣就需要用更多嘅時間同埋鼓勵。 好似有家長提過發覺到讀小學嘅時候，佢哋唔自己溫書同埋做功課。其實邊有細路仔會鍾意唔玩然後做功課吖！除非自細佢哋已經有呢個生活習慣就係放學返屋企自己完成自己嘅工作。當去到讀小學嘅時候我哋要改呢啲唔好嘅習慣嘅時候，可能有需要靠外力嘅幫助好。 好似一啲課餘託管等小朋友放學可以完成曬啲功課先返屋企都係一個辦法，只有當小朋友慢慢養成番自己做嘢呢一個習慣先至唔使佢哋再去。總之做家長對小朋友嘅生活習慣真係唔可以掉以輕心，應該趁佢哋細個開始就慢慢訓練佢哋，不過家長當然要記住要幫細路仔養成良好嘅生活習慣唔係靠打同鬧係，而要靠家長用好多嘅時間同耐性多啲嘅正面鼓勵幫佢哋，做得好嘅時候多啲讚賞佢哋。 愈細個嘅小朋友就越重視家長嘅讚賞亦都係最有效幫佢哋建立生活習慣嘅方法。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
