少年成長今日: 4|主題: 16130

收藏本版

發帖

返回列表

跳至頁

查看: 27004 | 回覆: 1

都係為你好 [複製鏈接]

csir3290

子爵府

積分: 12776

1^#

發表於 25-6-22 11:28 |只看該作者 |倒序瀏覽 |打印

有一句說話父母好多時都會掛喺口邊，尤其是係想啲仔女跟住父母嘅諗法去做，但係啲仔女又顯得唔係好願意嘅時候，父母好多時就會用呢句說話嚟做藉口要啲仔女跟住做，而呢一句就係「我都係為你好！」
「我都係為你好！」聽起上嚟好似好有理由，因為仔女心智未成熟，諗嘢唔夠全面，而父母都係以仔女嘅最大利益為出發點，唔想仔女蝕底，所以父母嘅諗法都係為仔女好，仔女跟住父母嘅諗法去做就通常都唔會有錯。但係係咪真係咁呢，係父母覺得自己係為仔女好，定仔女真係會覺得跟住呢啲做法去做真係對自己好呢？矛盾就通常出於呢一個諗法上面，父母單方面就覺得自己嘅所有諗法都係為仔女好，但係仔女就會覺得父母嘅諗法可能比較守舊又或者係違背咗仔女自己嘅意願，一句為你好就要仔女跟住佢哋嘅諗法去做其實對仔女嚟講，係咪真係好呢！而且仲好似係情緒勒索咁，如果唔跟父母嘅諗法去做就係唔孝順。

例如細個嘅時候父母叫仔女學呢樣，學嗰樣，考呢樣嗰樣嘅時候，仔女嘅意願往往就被忽視，因為父母只會覺得咁樣對仔女將來考學校嘅時候有幫助。到仔女大啲要選科或者升大學嘅時候，讀乜嘢科好多時仔女嘅諗法同父母亦都未必一樣，但係往往父母就會覺得自己嘅諗法係為仔女將來好而要仔女跟住做。但係好多時都係事與願為，父母以為為仔女好嘅嘢，違背咗仔女嘅意願，到將來仔女有能力離開或者唔跟父母意願嘅時候，只會令大家關係越嚟越疏離，更甚嘅可能仔女會覺得父母嘅諗法害咗佢哋而埋怨父母。

所以真正為咗仔女好，並唔係單方面由父母自己去諗，而係大家需要傾出一個雙方都能夠接受嘅方案，而好多時呢啲方案唔應該係父母自己決定曬，父母認為好就係好。而為咗能夠得到一個雙方都可以接受嘅方案，其實大家都應該要有妥協，父母最唔應該嘅就係只係覺得仔女需要讓步，如果佢哋唔讓步就係唔聽父母話，因為父母覺得自己嘅諗法一定係為佢哋好，所以仔女唔應該堅持自己嘅諗法。但係如果父母要同仔女維持關係其實自己都需要作出一啲妥協，當仔女見到父母都肯為自己作出妥協嘅時候，其實佢哋會更加容易接受父母嘅諗法，所以父母千祈唔好成日掛住喺嘴邊「我都係為你好」，而要仔女接受父母嘅所有諗法，咁樣到頭來只會大家都唔好。