今天去左健康院個第一次產前檢查，好快就搞掂走得。
之前聽人講要搞好耐，好擔心半日都搞唔掂，因為本身已經冇乜假，希望慳得半日得半日，好彩個半鐘就搞掂左。
程序：
-去到未夠鐘，姑娘會叫你坐底排隊等拿籌，D椅係一排排，記得要搞清楚邊度係隊頭，邊度係隊尾，唔好搞錯。
-等候期間，姑娘會俾一張表格(半張A4紙)同一個細貼紙俾大家填返D個人資料。
-夠鐘，姑娘會叫大家依返次序分批排隊去拿籌，並交返剛才填的資料俾姑娘。
- 姑娘會俾籌號同一張程序紙你，上面有寫個日要做D乜，跟住就可以坐低等叫名。
-叫名你個時，姑娘會要求出示你同另一半的身分證，然後又俾一袋野俾你，成袋都係一D單張/小冊子俾你返屋企睇。
-跟住就係等。等入房度高、磅重。
-度完高、磅完重，再驗小便，驗完冇問題，姑娘會叫你倒左用完的小便之後，再返去量血壓。量完冇問題再出返去等叫名見姑娘。
-見姑娘個時，佢會要求你俾醫院的預約紙佢睇(例如唐氏期、結構期、見醫生期)，姑娘會問你一D問題，例如有冇食煙、飲酒、家族有冇遺傳病、有冇藥物敏感之類，都係個堆問題啦。搞掂之後姑娘會同你約下一次覆診的時間(6週後)。搞掂就可以返出去等叫名見醫生聽BB心跳。
(我4號籌，姑娘同我講，我前面3個都未搞掂，見我個排板搞掂晒，所以叫左我先，所以大家想快就要帶齊野)
-醫生先檢查乳房，之後再聽BB心跳，聽完再同你傾下有冇咩問題，醫生話我過輕，要食多D野，仲開左維他命補充劑俾我，好快就搞掂出去。
-跟住抽血，係我等抽血期間，老公幫我去左取藥，我抽完血後再等左一陣，姑娘俾返張覆診卡我就走得，姑娘仲叮囑我冇再流血至好走。
前後個半鐘。
少少心得分享：
1, 要帶自己同另一半身份證，如果老公唔係香港都最好要有 Copy，如果冇帶之後又要補返。
2, 要記得帶小便，因為姑娘會幫你驗小便睇下有冇糖尿同另一樣唔記得乜東東。
3, 張 Form 要填你同另一半資料，所以就算老公冇去都要事先搞清楚佢的資料，因為唔一定記得咁清楚，例如身份證號碼，英文名串法，出生日期。所以有佢身份証 Copy 係手就少D麻煩。
4, 要帶醫院俾你的預約紙，因為要俾姑娘睇同記錄，佢地有機會因應你之後檢查胎兒的情況睇下係咪需要通知醫院幫你提早或推遲個預約期(例如結構期或見醫生個期)。
希望幫到大家~
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
