少年成長今日: 0|主題: 16131

收藏本版

發帖

返回列表

跳至頁

查看: 19712 | 回覆: 0

旅行記 [複製鏈接]

csir3290

子爵府

積分: 12780

1^#

發表於 24-8-18 10:45 |只看該作者 |倒序瀏覽 |打印

早兩個星期一家人去咗一趟日本自由行，今次係我哋成家人真真正正第一次用自由行嘅方式去旅行，之前通常都係參加旅行團，因為諗住唔使煩有人包食包接送，而且帶住兩個細路仔，唔使煩交通已經覺得係最方便嘅地方，況且旅行景點來來去去都係嗰啲，最緊要係細路仔有得玩就可以。但係總係覺得跟旅行團冇乜彈性，而且成日去嘅景點都係叫做到一到就算時間又趕，所以一路都想用自由行嘅方式去旅行。帶住一對青春期嘅仔女去自由行，可以係一家人聯絡感情嘅好機會，但係隨時都可能會演變成為一家人嘅溝通大災難。所以想一家人玩得開開心心，我覺得喺編排行程上面或者喺旅行嘅期間有啲嘢我哋一定要留心。

首先對仔女已經開始大，有自己嘅諗法，所以喺編排行程方面唔好再係我哋做家長自己話曬事，一定要尊重佢哋嘅諗法。就好似今次我哋編排行程嘅時候，大家都會提出一啲想去嘅地方，亦都會提出一啲大家都唔想去嘅。好似我同老婆初初諗嘅時候，以為對仔女都仲係好想去主題樂園，點知原來一攞出嚟傾嘅時候，大家不約而同都係唔想去主題樂園，因為日本實在太熱，大家都唔想流曬汗喺度排隊，而且對仔女原來對機動遊戲其實唔係真係咁熱衷，所以大家第一個共識原來就係唔使編排去主題樂園。另外當大家都各自提出一啲想去嘅地方嘅時候，之後大家就要一齊睇下地圖，安排一下交通睇下係咪真係可行，因為有啲地方原來好偏僻，再加上我哋今次唔係自己揸車所以就要睇交通時間，而我老婆喺可能嘅情況之下都盡量滿足大家嘅需要去編排。所以出發前大家都已經知道行程亦都有曬共識，所以唔會出現有啲咩地方係唔想去而又好似逼佢哋要去咁。另外喺編排行程上面我覺得有一樣好緊要嘅，就係唔好編到每日要去好多地方，好似今次咁，我老婆其實一日都係大約去一個或者最多都係兩個景點，所以時間變得好充裕亦都唔使趕頭趕命，朝頭早亦都可以瞓晏啲，所以大家唔會因為喺旅程期間要趕時間而搞到大家都心情唔好。我就寧願去少啲地方但係多啲時間可以大家傾下偈睇耐啲。講真去旅行都係希望大家開開心心舒舒服服去享受旅程，何必因為趕時間趕景點而搞到大家心情煩躁呢！去少一個景點唔會好大損失，但係搞到大家都唔開心就失去咗去旅行嘅意義。

另外一樣就係大家事先都要諗定有啲乜嘢係特別想食嘅，大家都有意見大家都要互相遷就，千萬唔好只係要人哋遷就自己，或者由家長話曬事。喺行程入面盡量安排各自都想食嘅嘢，咁就可以減少爭拗，而更重要嘅就係令到一對仔女都覺得自己嘅意見受到尊重同重視。就算真係安排唔到嘅地方，大家亦都會明白原因係喺邊度，而唔係因為只係父母唔鍾意而唔安排。

總之要大家都去得開心，就要喺行程上面做到盡量接受大家嘅意見。好似今次行程咁，細佬有兩個極力推介嘅地方好想去，其中一處之前我都諗可能會有啲悶，但係去完之後原來先至發覺細佬真係冇介紹錯，真係好好玩。今次嘅行程入面大家都去到大家想去嘅地方，而且去得輕輕鬆鬆，最重要係瞓得夠又唔使趕，所以喺行程上發生爭拗嘅機會就變得細咗好多。自自然然大家玩得開開心心，又增加大家溝通嘅機會，因為始終都要大家日日都喺埋一齊做同一樣嘢，如果處理得唔好真係會變成困獸鬥，由旅行變成溝通嘅大災難。

0 0 0

私人傳訊

跳至頁

返回列表

回覆

發帖

熱門搜尋：

少年成長 今日: 0|主題: 16131

瀏覽過的版塊

少年成長今日: 0|主題: 16131