少年成長今日: 0|主題: 16130

收藏本版

發帖

返回列表

跳至頁

查看: 26942 | 回覆: 0

係家長定係朋友 [複製鏈接]

csir3290

子爵府

積分: 12778

1^#

發表於 24-9-8 11:49 |只看該作者 |倒序瀏覽 |打印

間唔中就會聽到有家長講話自己同仔女嘅相處就好似朋友咁，但係亦都會有聽過有家長投訴就係自己同仔女嘅相處都盡量好似朋友咁，但係同仔女嘅關係都好似好疏離。「同仔女相處好似朋友咁」呢一句說話而家好似變咗新一代家長嘅口頭禪，因為講呢一句說話通常畀人嘅感覺好似比較開明好同開通啲。而且比較多都係爸爸用嚟講自己同仔女嘅關係。

我唔係話呢句說話有乜嘢錯嘅地方，但係就唔應該濫用，講真家長就係家長，始終都唔會搣得甩呢個身份，好難長期好似朋友咁同仔女相處。而且想同仔女好似朋友咁相處，其實係需要一個過渡期。講真仔女細個嘅時候，其實好多嘢都需要家長去教導，越細個嘅細路，其實就越難講道理，如果成日都好似話同朋友相處咁，同佢傾同佢講，其實反而效果可能仲唔理想。對細個嘅細路仔好多時反而用直接簡單嘅指令，話畀佢聽乜嘢得乜嘢唔得，等佢哋清楚知道界線其實效果仲好。對年紀細嘅細路仔，喺教導上就應該有家長嘅榜樣，反而同佢喺日常生活相處上面先至可以好似朋友咁相處。同朋友點相處呢！當然係一齊玩一齊傾，但係好多家長就成日覺得用朋友相處咁，就即係表示教導佢哋嘅時候乜嘢都畀佢哋揀，乜嘢都同佢哋傾，但係平時又唔會嘥時間嚟同佢哋玩，仲要同佢哋傾啲無謂嘢，咁問題就自然會出現。最終出現嘅問題可能係細路仔好似教極都唔聽咁。因為家長冇清晰畀個細路仔知道究竟條底線喺邊度，乜嘢係得乜嘢係唔得。家長要知道同朋友相處最大嘅原則就係要相處得開心互相尊重，我哋都可能有經歷過同朋友「道不同不相為謀」，如果同某個人相處得唔開心就根本好難做朋友，唔同某啲人做朋友其實對我哋損失都唔大，最多見少啲或者唔見。但係同細路仔相處情況就唔可以係咁，年紀細嘅細路仔最需要嘅就係家長教導，由家長幫佢哋定出生活嘅規範，需要家長作為榜樣去學習，如果我哋同仔女管教上面相處得唔開心，可唔可以好似朋友咁唔見呢？所以對於年紀細嘅小朋友嚟講，家長就始終都係家長，你要成為佢嘅朋友唔係放棄管教嘅權利，樣樣畀佢選擇同佢傾。反而係喺日常生活入面多啲同佢哋一齊玩，用多啲時間同佢哋傾計，慢慢培養出朋友嘅感情，但係對於初小嘅細路仔嚟講始終都要知道家長就係家長。

到細路仔慢慢長大，生活開始有規範，其實就真係要開始慢慢過渡到似朋友嘅關係，家長高高在上嘅權威就要相對減少。我哋要知道究竟乜嘢係朋友，朋友就係互相尊重。而且當仔女逐漸長大有自己諗法嘅時候，家長就係透過傾計嚟向佢哋提供資料，等佢哋學習自己去做決定，呢個時候朋友嘅相處就最緊要，但係我哋要知道仔女唔會忽然間成為我哋嘅朋友，而係要透過日常嘅相處，大家有共同嘅價值觀而仔女又覺得同我哋相處得開心先至會慢慢成為我哋嘅朋友。而呢啲嘅轉變其實就係嚟自家長喺仔女慢慢長大嘅時候，有冇花時間同佢哋去相處。

所以我覺得唔好成日將「同仔女嘅相處好似朋友咁」變成我哋嘅口頭禪，或者係一個永恆不變嘅秘笈。仔女唔會一出世就同我哋成為朋友，做家長最難嘅就係拿捏究竟幾時應該係朋友，幾時應該係家長。但係有啲家長只不過係希望仔女好似朋友咁對待自己，但係就從來冇諗過究竟點樣同仔女培養出朋友嘅感覺。正如我之前都講，朋友最大嘅好處係當發覺大家價值觀唔一樣時，或者大家相處得唔開心嘅時候，就可以疏遠唔見。如果仔女當家長係朋友而發覺呢個朋友同自己價值觀又唔同，相處得又唔開心，咁佢疏遠你都係自然出現嘅情況。講到尾要同仔女相處好似朋友咁舒服，其實一啲都唔容易，千祈唔好以為要同仔女好似朋友咁相處就係最好同唯一嘅方法。因為你要同仔女好似朋友咁，其實係需要時間慢慢去發展同埋培養，而且更加重要嘅就係當仔女喺初小或者之前嘅成長，其實家長係需要成為佢嘅人生導師同埋榜樣。但係點樣由人生導師同埋榜樣慢慢過度成為朋友先至係最考家長嘅功力。更加一定唔好以為自己要同仔女好似朋友咁相處，仔女就自然會當自己係朋友，朋友係需要用時間去培養。而且家長就係家長家長，就需要有家長嘅責任。最怕嘅就係你以為同佢係好似朋友咁相處，但係其實仔女只不過當你係工人或者係任由擺佈嘅提款機。其實我覺得最理想嘅相處方式就係慢慢由家長而過渡成為朋友，不過呢個過渡當中實在需要太多技巧，需要用時間去培養同揣摩。

0 0 0

私人傳訊

跳至頁

返回列表

回覆

發帖

熱門搜尋：

少年成長 今日: 0|主題: 16130

瀏覽過的版塊

少年成長今日: 0|主題: 16130