做咗爸爸咁耐一直都覺得教仔教女越嚟越似放風箏。當隻風箏仲喺地下嘅時候，我哋用盡方法想隻風箏起飛。有啲人放下放下隻風箏，飛極都飛唔起就會越嚟越暴躁越嚟越忟憎，終於都係飛唔起。有啲人又會識得睇下風向唔得就休息下然後再繼續，或者諗過第二個方法總之就唔放棄嘗試唔同嘅方法令隻風箏飛起。放風箏真係個好奇怪嘅活動，有陣時你越想佢飛起佢越係飛唔起，但係又有啲人好似唔駛乜嘢特別方法隻風箏就自自然然飛起令人非常羨慕。當真係唔得嘅時候就要諗下其他方法，你越係抆憎就越係唔得。好嘞！當你好開心隻風箏飛起咗嘅時候，你會不停咁放線想佢越飛越高。但係好多人就係忘記咗放線容易收線難，應該幾時收線呢？好多家長都係睇住個仔女越嚟越大就成日覺得我要畀好多自由佢等佢越飛越高，但係我哋點樣樣觀察住個細路仔，佢幾時開始飛得唔穩定嘅時候，我哋就要識度地咁樣收返條線。有陣時放紙鷂嘅藝術就係幾時識得放同幾時識得收。唔好一味淨係識得放唔識收。你愈係驚佢跌不停咁收，到最後佢只會更加飛唔起。你淨係想再飛遠啲不停咁放點知道最後佢就會失去控制越飛越遠去到你控制唔到嘅地方甚至跌番落嚟。又有啲人唔懂得或者唔咁心只係欣賞自己隻風箏喺個天空上面飛，硬係鍾意同人哋啲風箏去比較，甚至乎想去界咗人哋隻風箏落地，但到最後可能係界斷咗自己的風箏唔知飛咗去邊。隻風箏就好似我哋嘅仔女一樣，放得風箏就自然想著風箏平平穩穩咁喺個天上面飛唔會斷線唔會失控唔會跌返落嚟。就好似我哋做父母一樣想我哋啲仔女 一日一日咁長大 一日一日咁飛高，能夠平平穩穩咁樣發展生活唔會失控唔會行差踏錯。所以我哋就要好似放風箏咁樣識得因應外在環境懂得放懂得收。亦都要懂得運用耐性唔好勉強，無風就係無風，休息一陣用過第二個好方法再放過，我都希望我屋企嗰對風箏可以喺將來平平穩穩咁喺天空度飛，繼續可以有條線聯繫住嗰對風箏同埋我哋兩個。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
