我哋工人姐姐，已經係第三年，做嘢都ok。之前有過兩三次因為家人病（唔知係真定假，無追問）問我哋借錢，每月從佢人工度扣翻，都相安無事。
今年五月份，工人姐姐預支五千工資，話個仔嘅女朋友意外小產。
八月又哭哭啼啼問我哋借兩萬，話佢個仔用佢間屋去銀行抵押，貸款做生意，疫情無錢還，銀行要收佢間屋。我哋見佢可憐，只好借俾佢，令佢每月還兩千三（工人姐姐每個月人工➕膳食津貼有6300）。
呢兩個月佢成日魂不守舍，我覺得好古怪。上個禮拜終於俾我係屋企信箱見到財仔寄來的追數信⋯⋯
震驚之餘同佢坐低傾咗兩個幾鐘，佢原來係出面借咗好多錢⋯⋯香港又借、菲律賓又借，成七八個債主，加加埋埋近十萬港幣（其中欠我哋兩萬，一間香港財務公司四萬五）。
每個月人工根本唔夠還款⋯⋯
我上週同工人姐姐一起上嗰間四萬五嘅財務公司，想話叫佢哋降低每個月嗰還款額，起碼佢可以還的起。
今日再打過去問，對方話佢哋老闆唔同意，工人姐姐要依合約每個月還佢哋三千九⋯⋯
佢今日問我，可唔可以再借佢萬五元，佢拎去還咗啲細數（佢話其中一間要脅今日佢唔還錢就會po佢相上facebook⋯⋯），建議話我哋每個月扣起佢五千，扣足七個月後，佢再去還嗰間四萬五的財務公司。
即係話，佢打算呢七個月會避住嗰間財務公司⋯⋯
我真係唔知點算。已經唔識得點嫐⋯⋯好顯然，嫐都唔會解決問題。
財務公司真係會由佢七個月不還錢，淨係打電話同寄信？我好驚哋財仔會追上來我哋屋苑
係咪應該炒佢？我哋個兩萬蚊，就當係買教訓⋯⋯
我係FTM，唔係一定要有工人姐姐嘅。
請各位姊妹教下我應該點做…… 🙏
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
