早兩日又同個中學老師朋友聚會，佢講開呢輪上課非常之忙碌，因為佢間學校有好多跨境學生所以上課嘅時候又要顧住現場啲同學又要顧住電腦入面上緊網課嘅同學。佢話上課嘅時候就好似打仗咁，除咗上課之外，備課一樣咁辛苦，因為乜都要準備兩份，香港嗰批有書有作業所以容易啲，但係跨境嗰批就因為書同作業都買唔到，所以乜嘢都要幫佢哋準備曬。
我個friend話齋做多咗嘢都唔緊要，但係其實對跨境嗰班個成效根本就唔高，佢話因為除非個細路仔好自律或者個父母跟得好足，如果唔係根本好多時啲細路都係老師點名嘅時候就應機，跟住就一路掛機。我個friend話雖然係規定要佢哋開鏡頭，但係好多時佢哋都話自己冇鏡頭或者鏡頭壞咗你就耐佢哋唔何。追功課又係另外一大問題，好多時啲功課都交唔到，成日又話上載唔到或者唔識上載，我個friend話最慘係打親電話畀家長都搵唔到啲家長。所以我個friend話對跨境嘅同學嚟講根本網課嘅成效就唔高。最慘就係為咗班網課同學嘅出席率，成日要追佢哋上堂，雖然話唔上堂要罰要記過，但係打電話畀家長啲家長根本就理唔到，成日就話了解下，甚至乎一句網絡問題就諗住幫個仔女開脫唔上堂嘅處分。我個friend話佢間學校有啲跨境同學9月10月夾埋有成幾十堂網課冇上，但係佢哋最通常用嘅藉口就係話網絡有問題，啲家長根本就理唔到或者直情唔理。最慘就係學校高層就要佢哋追啲學生上堂，攪到啲老師佢哋夾喺中間。
我同佢傾其實有陣時都唔明啲父母點諗，如果真係網絡問題係咪就真係由得佢唔理，等啲細路鍾意就上堂唔鍾意就唔上呢！其實呢啲家長有冇關心過細路讀書嘅問題同成績呢呢？我個friend話齋每一個讀band3嘅同學仔背後都有個原因，如果唔係都唔會要讀band3學校。但係我真係諗唔明一班跨境家長嘅諗法，係咪只係想佢哋嘅仔女掛住一個香港學生嘅名就唔需要理佢哋學唔學到嘢呢？其實講真佢哋都已經冇返學差不多成年啦！只係靠網課上堂呢一班家長有冇真真正正諗下或者去檢視一下其實咁多個月嘅課堂係咪真係對仔女有效呢？與其係咁，點解唔諗下畀佢哋喺返原居地讀書呢？當然我明白有好多唔同嘅原因，但係呢一班家長有冇嘗試諗下盡力去解決呢？其實我都覺得我個friend幾唔抵，學校嘥咗咁多時間嘥咗咁多力去預備呢一啲跨境嘅課堂，但係聽我個friend咁講根本就嘥時間嘥心機，問題嘅核心根本就係呢一班跨境同學家長嘅諗法，而家都仲未知呢一班跨境嘅同學重要幾耐先至返到嚟香港上課，其實當佢哋返到嚟香港又係咪追得返個進度都係一個問題。本身如果冇疫情呢一班跨境同學都已經要面對交通時間嘅問題，而家更加上疫情關係根本冇返學咁耐，其實係咪應該諗下為仔女嘅學業著想係咪仲掛住香港學生個名係咪值得呢？
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
