上星期陪個教籃球嘅朋友去睇佢教波，順便帶埋阿仔去試下，去到球場都幾多人打，因為教練有教唔同年紀嘅籃球隊，乜嘢年紀都有，我諗由五六年班到中四五都有，當然個個都好畀心機練習。練習期間突然間有個男仔瞓咗喺地下，咁教練同埋我都即刻走埋去睇下乜嘢事，見到個細路仔嘴唇腫咗有少少流血，原來喺打波期間大家一齊搶籃板，落地嘅時候畀另外一個隊員手踭撞到個嘴，教練同我其實都望到只不過係意外，打波成日都會發生。但係見到個男仔因為有少少流血，嘴唇又腫咗睇落其實冇乜大礙，感覺上隻牙有少少郁，咁教練叫咗佢埋場邊休息，因為都有流血所以都打電話通知家長。
教練同家長講咗大致嘅情況之後家長話要同個仔講，點知講咗兩句個仔就已經喊曬，我哋喺側邊都聽到個家長喺個電話入面好大聲咁鬧緊個仔，個仔只係解釋咗兩句就已經冇講嘢，淨係喺度喊，我仲見到佢情緒有啲激動。後來教練聽返個電話，原來個老豆喺度鬧緊個仔點解成日受傷，其實教練都已經同個爸爸解釋係意外，打波經常都會發生，因為佢個仔好落力，但係個老豆就同教練講話成日咁受傷又要檢查要用好多錢。教練同個爸爸講多幾句之後，個家長仲cut咗佢線。
之後我哋叫個同學仔坐埋一邊休息下敷下冰，同時亦都等佢情緒平復啲，之後我就問下個男仔做乜事，原來個爸爸一聽到佢受傷就不停鬧佢，叫佢打波唔好咁落力，聽到佢畀隊完整到，仲話要追究個隊員，不停淨係鬧個仔做乜要咁落力，受傷又要用錢去睇醫生咁。後來個仔再打畀佢媽媽，咁因為教練教緊波，咁我都幫個仔同個媽媽講咗幾句，媽媽相對合理好多，佢都係關心個仔嘅傷勢，最後仲嚟接咗個仔走，一啲都冇怪過仔點解會受傷。
完咗練習之後，我同教練去食飯傾開件事，原來個男仔已經打咗波幾年，一向都好落力，而且仲打得幾好添，因為籃球係佢最大興趣，但係讀書成績就麻麻地，籃球可以話係佢最大成功感，所以佢好尊重教練同教練嘅感情亦都好好。佢話呢個細路個爸爸雖然唔反對佢打波，但係從來冇嚟睇過佢打波，佢成日覺得個仔打波只係玩，最經常講嘅一句就係「打波咁落力都冇用啦！讀書又唔見咁叻」。所以個仔同個老豆嘅關係亦都好麻麻。
其實又係一個活生生嘅例子，個家長完全唔認同個仔嘅興趣，亦都唔願意去了解個仔嘅興趣，所以更加唔好講話要認同或者畀到成功咁個仔。好似今次事件咁，阿仔仲點會想同個老豆講自己嘅情況呢？講又俾人話冇用，但係呢類家長又好得意㗎！佢成日就會話個仔有乜嘢都唔同佢講乜嘢都唔同佢傾。又係嗰啲最典型嘅情況，就係家長要同個仔傾，個仔就一定要同佢傾，但係對個仔嘅其他嘢就不聞不問。試問咁樣個後生仔又點會同父母溝通呢？真係正所謂搵鬼同你傾咩！呢個阿爸同個仔其實個感情只會繼續差落去，唔係個仔願唔願意同佢老豆傾嘅問題，而係個老豆真係應該檢討下應該點樣同個仔相處，唔係到頭來又係話自己個仔踏入青春期乜嘢都唔同自己講。同個仔嘅關係越嚟越差，根本就唔關個仔喺青春期有啲乜嘢轉變嘅事，而係個爸爸根本唔識得點樣同個仔溝通，亦都唔願意嘥時間同個仔溝通，要賴個仔青春期轉變不如諗下係因為自己嘅態度令到個仔覺得根本同佢溝通唔到。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
