少年成長今日: 0|主題: 16049

收藏本版

發帖

返回列表

跳至頁

查看: 13116 | 回覆: 0

學習態度 [複製鏈接]

csir3290

子爵府

積分: 12217

1^#

發表於 22-9-25 10:29 |只看該作者 |倒序瀏覽 |打印

家姐而家已經中二，佢啲功課讀書基本上我同老婆都唔使點樣再跟，大部分嘅嘢佢都會自己搞掂，我同老婆亦都放心。但係間唔中阿女遇到啲功課上面嘅問題都會問我，有陣時我番緊工時佢都會whatsapp問我功課上面嘅嘢。如果時間許可我都會盡量喺whatsapp度教佢。但係因為佢已經中二，其實啲功課同埋課程亦多開始越嚟越深，雖然話我都曾經讀過曬，但係真係時間太耐亦都唔係好記得，所以有陣時都唔係能夠即刻答到佢。講真有陣時佢問我啲功課我都係要上網睇返佢問嘅內容，搵返少少記憶然之後先至可以教到佢。好似早兩日佢又好似平時咁突然間send條題目過嚟問我點做，一睇條題目其實都唔係能夠即刻教到佢，況且當中有啲概念其實我都已經唔記得，而且當時都做緊嘢，所以就覆咗佢話夜晚返嚟先教佢。其實放工嘅時候，一路都有諗下究竟條數點做，亦都有曾經上網望過，但係始終都未係好諗到。番到屋企食完飯終於要同阿女一齊坐喺度諗，我哋又上網又睇佢本書，終於慢慢搞清楚個概念，最後我都諗到點做然後解釋俾佢聽，但係原來阿女喺過程中反而仲諗到另外一個快啲嘅方法，比起我嗰個方法仲好。

我唔知家長有冇嘗試好似我哋一樣，遇到唔識嘅功課係同仔女一齊嘗試去搵個方法完成佢。但係我相信好多家長其實遇到呢啲情況都係叫仔女自己返學校問老師，又或者由得佢做錯然後等老師教佢改正就算數，因為咁樣最慳時間。但係我覺得呢種做法唔係錯不過應該係最後嘅步驟，因為其實我想佢兩姊弟知道做家長嘅真係唔係乜嘢都識，但係更重要嘅係教佢哋一個學習態度，當遇到唔識嘅嘢嘅時候，其實點樣嘗試解決先至係最重要。點解返到屋企我都仲要同阿女一齊研究一齊諗點做，正正就係希望做一個榜樣畀佢睇，當遇到問題嘅時候應該點樣去解決，學習嘅態度就係應該去嘗試，而唔係坐喺度等人將答案就咁講畀你聽。所以由兩姊弟細個開始教佢做功課嘅時候開始，從來我同老婆都唔會直接講嘅答案畀佢哋聽，所以事實我哋係用多咗時間去教佢哋做功課，用多咗嘅時間就係慢慢一步一步引導佢哋自己搵到答案出嚟。

我諗好多家長都同我一樣遇到嘅問題，就係到仔女讀中學嘅時候其實佢哋嘅課程已經比較艱深，亦都唔係家長好容易就可以教到佢哋，不過我都覺得其實家長可以嘗試同佢哋一齊慢慢去嘗試解決，當然未必一定做到，但係起碼能夠以身作則，做到畀佢哋睇其實應該盡力去嘗試解決，當真係唔得嘅時候，然之後先至返去問老師。當家長遇到唔識嘅嘢都同佢哋一樣嘗試用方法去解決嘅時候，仔女亦都可以從中學習。我覺得如果當仔女問父母功課嘅時候，父母如果只係一句唔識就叫佢哋行開或者只係叫佢哋自己搞掂或者返去問老師嘅時候，其實仔女亦都係學緊遇到唔識就由得佢，而唔係學習點樣嘗試去解決。但係正正做家長嘅就係想仔女能夠擁有一個良好嘅學習態度，學習自學同埋解決問題嘅方法。所以仔女嘅課程做家長未必一定識，但係做家長嘅其實都係可以有方法教到佢哋自學，同埋培養佢哋良好嘅學習態度，家長用自身做榜樣嘅成效，其實可能畀佢哋喺學校學到嘅方法可能仲好。家長有陣時雖然學歷未必係好高，但係千祈唔好睇輕自己可以對仔女喺學業上面嘅影響力。