少年成長今日: 3|主題: 16132

收藏本版

發帖

返回列表

跳至頁

查看: 20690 | 回覆: 0

每事問 [複製鏈接]

csir3290

子爵府

積分: 12787

1^#

發表於 23-2-26 10:29 |只看該作者 |倒序瀏覽 |打印

可能好多家長都會遇過當仔女嘅好奇心一出嘅時候佢哋會不停問點解，問到有陣時連家長都唔知點答。有啲家長可能就會怕麻煩一句唔知就算數，或者會叫佢哋自己睇下書，又或者同佢講大個佢就會明。呢啲情況愈細個個小朋友就越容易出現。因為細個嘅小朋友對身邊嘅一切都充滿好奇心，但係當佢成日問點解但又得唔到答案嘅時候，慢慢就會越嚟越少問做成個現像就好似愈大個嘅好奇心就越少咁。我明白當然家長都係人，唔係乜嘢都會識，但係點樣培養小朋友嘅好奇心同求知心態，點樣增進佢哋嘅常識，其實家長係有好大責任，縱使家長唔係乜都識，但其實同小朋友一齊去搵出答案其實亦都係教緊佢哋點樣去處理問題。試想像一下咁細個小朋友，你叫佢自己睇書搵答案，或者自己上網去搵其實係咪真係咁容易呢？但係如果家長能夠同佢一齊嘗試去搵出答案，除咗家長自己都可以增進知識之外其實亦都示範畀小朋友睇大人亦都唔係乜嘢都識，但係唔識唔緊要最緊要係用方法去搵出想知嘅答案，咁樣先至係解決問題同埋增進知識嘅方法。

好似早幾日我又幫我個朋友喺球場度教下啲小朋友踢足球，休息嗰時，突然間有個應該係大約六年班嘅小朋友走埋嚟問我，教練呀「你知唔知乜嘢叫做「牛磺酸」呀？」講真我真係聽都未聽過，跟住我問佢喺邊度睇到，佢話佢喺啲超級市場嘅食品上面好多時都見到呢一個名詞，佢話覺得個名好得意。咁我問佢有冇問過佢家長，佢話佢家長話唔識，咁我估呢個小朋友真係好想知道答案，連我呢個佢唔係經常見到嘅大人佢都走埋嚟問我！咁我同佢講我都唔識不過我估應該係啲化學物質，跟住我問佢有冇試過上網搵個資料，佢話佢冇試過，終於我就同佢講不如我哋一齊上google搜尋一下，佢話佢唔識點做，我話其實只要你打個名佢話個字好難寫，咁我同佢喺google一齊用咗一分鐘都唔夠就搵到個答案，仲同佢一齊睇，原來「牛磺酸」係氨基酸嘅一種尤其是對細路仔腦部發展係有幫助。我仲同佢講第時如果遇到啲唔識嘅嘢，其實都可以嘗試下用手機去搜尋下資料就會知道想知嘅答案。佢就好滿意好似解決咗佢一大疑難咁，休息之後就繼續踢波。

我對仔女間唔中都會好似上面嗰個細路仔咁問點解，講真我同老婆都唔係乜嘢都知道，但係對唔知嘅嘢我同老婆都會嘗試搵答案然之後話畀佢哋聽，又或者係同佢哋一齊去搜尋然之後一齊去睇究竟係點解。而家佢哋遇到唔識嘅嘢都會懂得用方法去揾答案，有時仲會同我哋分享添！所以其實要培養細路仔嘅求知慾，其實家長唔需要乜都識反而家長要懂得同細路仔一齊去搵答案，唔係只係同佢講唔識或者叫佢自己搵就可以解決，到頭來佢哋發覺原來問係搵唔到答案嘅時候，可能慢慢佢就越嚟越唔問，唔識就算。因為佢哋嘅家長都係用緊呢一個嘅態度。所以家長真係千祈唔好輕視細路仔問點解，唔係要求家長乜嘢都識但係相反如果家長可以示範到畀佢哋睇，遇到唔識嘅嘢嘅時候可以點做，咁對培養細路仔求知求學嘅精神其實有好大嘅幫助。

0 0 0

私人傳訊

跳至頁

返回列表

回覆

發帖

熱門搜尋：

少年成長 今日: 3|主題: 16132

瀏覽過的版塊

少年成長今日: 3|主題: 16132