少年成長今日: 0|主題: 16010

收藏本版

發帖

返回列表

跳至頁

查看: 26627 | 回覆: 0

興趣班有冇用？ [複製鏈接]

csir3290

子爵府

積分: 11980

1^#

發表於 24-6-9 12:41 |只看該作者 |倒序瀏覽 |打印

如果有睇之前嘅都會記得我曾經講過阿仔嘅同學因為畀人懷疑佢同同班嘅女同學拍拖，搞到又要見家長又畀學校罰之後，曾經試過想自殺搞到好大件事。嗰次之後以為件事平靜咗啦！但係原來阿仔話間唔中呢個同學都仲會做一啲自殘嘅行為，例如佢試過喺上堂嘅時候係不停搣自己，有又試過影住自己隻手有一條條紅痕嘅相擺上ig。琴日，阿仔攞畀我哋睇，佢呢個同學又擺咗一張咬咗一個好深嘅牙印係自己手臂上嘅相上ig。阿仔都開始覺得呢個同學有啲煩，佢問我哋點做，我哋同佢講叫佢將情況同班主任講，唔好特別覆呢個同學，因為我哋都覺得其實個男仔開始好似有啲想引人注意咁。我哋同細佬傾，最後發覺呢個男仔通常都係喺啲假期或者係冇同學喺身邊嘅時候，就會做呢啲嘢，好似想引人注意，又或者係想揾人解悶。唔知係咪因為佢屋企人都返曬工，放假嘅時候冇人同佢一齊，所以就想用呢樣嘢引起同學嘅注意。不過無論點都好，我哋都同阿仔講如果叫有啲咁嘅情況發生就同班主任講，盡量唔好畀咁多注意唔好覆佢，除非真係好危險嘅情況，例如好似上次咁企咗喺天台邊咁。因為如果唔係當佢發覺原來次次咁做嘅時候，都會引起好多人注意好多人關心佢嘅時候，可能佢就會利用呢樣嘢，越做越多。所以最重要都係同學校講，希望學校提醒呢個男仔嘅家長要多加留心同埋處理。

由呢件事令到我覺得要培養細路仔嘅興趣係非常之重要嘅事，例如好似呢個男仔咁，當佢一個人又冇乜特別興趣，時間咁多自然就會胡思亂想。睇番自己個仔，佢學琴同埋學畫畫已經學咗好多年，由幼稚園已經學到而家中學。連我嗰日送佢返去學畫畫嘅時候，我都問佢其實而家個畫班入面係咪佢學得最耐同埋年紀最大，我問佢仲有冇興趣繼續學落去。佢話佢都想繼續學，而我都覺得畫畫嘅興趣幫咗細佬好多。佢真係可以喺屋企冇嘢做嘅時候，自己突然間攞本畫簿開曬啲水彩顏色出嚟，就喺間房度兩三個鐘頭自己畫張畫，每個禮拜嘅畫畫堂又可以令到佢無論嗰個禮拜幾忙都好，都可以有時間去學下自己嘅興趣，又可以同啲畫班嘅同學同埋老師喺度吹下水傾下偈放鬆一下。所以我覺得培養細路仔興趣好緊要，因為可以令到佢哋善用時間，亦都可以搵到自己喜歡同埋有成就感嘅嘢。不過我覺得更加重要嘅就係要培養佢哋興趣嘅時候，千祈唔好畀任何壓力佢哋，即係話興趣就係興趣，唔應該牽涉其他例如比賽例如考試之類，要學得冇壓力先至會鍾意。情況好似我哋大人咁，去到一個階段如果自己自動自覺想去學嘢，一定係覺得自己鍾意同埋喜歡先至會去學，如果好似有啲家長咁不停要啲細路仔去學唔同嘅興趣班，而最終只不過係為咗寫靚自己個portfolio，自自仍然就會需要去考呢樣試，嗰樣試，參加呢樣比賽同果樣比賽，最終細路仔根本就唔能夠喺興趣班入面放鬆同埋真正發掘自己嘅興趣。試問當你要去學一樣嘢嘅時候，但又要應付考試又要應付比賽，仲要一日走幾場學唔同嘅嘢，細路仔又點會真正能夠搵到當中嘅樂趣呢！

如果可以自細就幫細路仔培養到佢哋鍾意嘅興趣，其實亦都好似幫佢哋加咗一個防護罩一樣，到佢哋去到青春期，因為有興趣嘅支撐，自自然然就會減少佢哋胡思亂想，同埋太多空閒時間唔識利用嘅情況出現。所以我好反對有啲家長成日最重要嘅考慮就係究竟學呢樣興趣有乜嘢用？學嗰樣興趣又有啲乜嘢用！但係就忽略咗細路仔係咪真係鍾意同想發展嘅興趣。同埋興趣真係要自細開始培養，家長可以喺細路仔細個嘅時候，嘗試畀細路仔試多啲唔同嘅嘢，然後喺當中搵一兩樣佢哋真係鍾意嘅，等佢哋慢慢發展。不過我覺得係真係唔可以畀壓力，同埋唔可以經常問究竟嗰樣興趣學嚟有乜嘢用，又或者對升學有冇幫助。我都記得我自己對仔女細個嘅時候，都有試玩唔同嘅運動同埋興趣，到最後佢哋就揀咗羽毛球畫畫同埋彈琴。我哋當時冇畀任何目標亦都冇話要考啲乜嘢事，唯一嘅要求就係佢哋要學一樣嘢嘅時候，一定唔可以少過半年，如果佢哋自己話想學嘅話，學嗰樣嘢最少就要學半年，因為唯一我覺得重要嘅嘢係唔可以三分鐘熱到，學嘢最少要學半年以上先至真真正正會發覺自己係咪鍾意。如果你問我興趣班有咩用，我覺得最大嘅作用就係到佢哋而家讀中學嘅時候，佢哋可以有自己嘅興趣嚟調劑時間，亦學會做嘢需要恆心。就算佢兩個得閒嘅時候，佢都會識得搵方法自己去娛樂。我覺得咁樣已經係學興趣班嘅最大收穫。所以唔好問學興趣班有啲乜嘢用，佢嘅作用不知不覺就會喺細路身上出現！