忍無可忍。如果我再唔踢爆你，俾你任意開post鬧我阿媽，我仲係人？你識喺婆媳關係開post,難道我唔識？＂家家有本難唸的經＂，係你的擋箭牌，反正你咁鐘意數我媽丶講家事，不如我幫你話俾人聽你本經有幾難唸
當日有人大了肚嫁入嚟，明示我媽要俾禮金，仲要係大份。其實我爸走咗，本應我哥係一家之主，你要結婚，唔知點解我媽要俾禮金，依家咩年代呀？我媽問我哥要幾錢，我哥話佢會自己搞惦。就俾人喺FB話我哥愚孝丶裙腳仔（我最近先知）。我哥叫有孝義，咩叫愚孝？洗唔洗我媽貼埋大床娶你大小姐過門？
有人要大搞婚禮話要喺four season 擺。幾錢一圍我唔知，但未埋單加雜費我哥已用了30萬，騰唔出錢俾禮金，有人話我媽小家子，少少錢都唔願出。我唔明。第一我哥娶你唔係我媽，關我媽咩事。第二我媽冇話唔俾唔借俾我哥，但我哥唔肯，咁你想我媽點？咁都要俾你唱？
我媽算係好出身，但當年為了嫁我爸，同公公決裂。我咁大都只見過我婆同我媽的親戚一丶兩次。而我爸嗰邊亦由此至終唔鐘意我爸娶了個大小姐返來，覺得佢乜都唔識做，做唔到媳婦。所以我爸就算租間板間房都唔住阿嫲度，一步一步慢慢捱出頭。試問咁的情況下，正常人仲會唔會叫＂親戚＂來飲？根本已經冇來往好耐。但有人想自己的婚禮有名人到，可能又覺得我媽嗰邊的親戚人唔到，出手都唔會低，講盡好話叫我媽請佢兄弟姐妹。我媽唔想，佢就周圍話我媽睇唔起佢，因為佢屋邨出身，身邊都係窮親戚，話我哋怕佢影衰我哋，喺婆媳關係講到我媽自以為是高高在上，點睇唔起佢屋企搏同情出氣。
後來我媽都打咗對＂金ark＂俾佢，幾重我唔知，但我媽話6萬左右。有人唔滿足，因為佢話佢本來想右手男家送的禮，左手女家，女家有四丶五隻＂金ark＂喺FB不停咁哂，話出番口氣。其他唔好講，我哥話D ark係鍍金的，真嗰兩對係租的，呢D咁白痴的氣唔該你慳D啦。我當時冇出席佢的婚禮因為我有overseas secondment， 對於我來講機會難得。我封了$8888利是，另加一條金手鏈大約一萬蚊，被佢喺FB放上網話縮水大法金ark變金鏈，我真係未聽過姑仔要送金鏈俾阿嫂的。直到最近我先知，當時一路檔佢係阿嫂，覺得自己好多嘢都已經做足。依家諗起都覺得自己白痴。
好啦BB好快出世，有人又要開post「呻」，因為我媽冇offer過任何嘢，冇買補品亦冇煲湯。我媽以前的出身，佢邊識煲湯，我老豆冇叫過我媽捱苦。我倆出世後，屋企一路都有幫傭的。臨生前我媽問有冇嘢幫手，佢一句串我媽：＂有你都唔識啦奶奶，乜都我媽做哂啦＂。咁我媽問你又話冇嘢，事後你又post話我媽乜都唔理唔幫手唔care個孫，又點慘點委屈。有日打俾我媽話：奶奶，你有嘢可以幫到我同個孫了！嗱我生完出院喺你度坐月（我媽自己一個住太X城3房大單位），咁你暫時讓間套房俾我住，BB床放入面，我(佢）媽瞓書房（有張梳化床），陪月瞓麻雀房啦，你就暫時去我哋屋企住住先啦。我媽拒絕，如果咁都叫自私咁我無嘢好講，唔通個仔生小朋友要連自己間屋都讓出來叫好奶奶？我哥一路都話唔好，佢就超嬲我哥話佢愚孝，唔識為佢為BB打算，呢D叫咩打算呀？
懷恨在心的佢，當日生完，我同我媽去睇佢，佢有親戚喺佢床邊，咁見你同人講緊嘢唔通插把口咩，打過招呼後咪睇BB囉，點知佢即刻搶返BB仲黑面，事後又話只理BB唔理佢，我媽一D貢獻都冇，冇資格睇BB，又檔佢唔存在，喂你成棚人圍住唔通我同我媽好似迫年宵咁，講句唔好意思然後攝埋去呀？
我見佢情緒咁激動，叫我媽唔好出現啦，廢事刺激佢，又話我媽唔理佢出院。過一排，我媽上去睇佢，佢全程匿喺房唔出來話攰，我媽話見到佢媽湊B，陪月煮飯，都好似好忙，問佢哋有冇嘢幫手又唔答，咁惟有坐喺度等人俾嘢佢做。又話我媽唔通氣坐咁耐。乜都你講哂啦。
生完話辛苦唔做嘢。唔做咪唔做囉你哋兩公婆決定。但有人要有中產咁的生活，覺得我屋企有。我同我哥同一個專業，我估我哥都有3萬幾4萬一個月，一個普通家庭收入。有人要住有海景單位已經2萬幾租，又要養B養車，點會夠洗。不過呢D本來就唔關我哋事。但有人又喺度講，話我哥話我媽話俾錢佢俾首期（係俾唔係借！）依家生了B先嚟反口覆舌！唱到我媽賤過地底泥。又周圍講我媽有幾層樓收租，平時冇乜錢洗。我媽D錢點嚟點洗關你刀事？就算我媽有億萬身家亦唔代表要俾錢你用。況且我媽根本冇可能會咁講，我爸臨走時喺我哋三個面前講過，書會供到唔想讀嗰日，其他唔好問屋企攞，佢亦唔會俾，要學識獨立，一出來做嘢一定要俾家用。 所以我同阿哥由一千蚊家用開始俾，慢慢隨住工資加，俾到五千時再加上我哋都唔喺屋企住之後，我媽堅決話唔洗再加以後就俾五千。我媽當年供我哋讀名校、私人補習、課外活動丶去外國，我哥出來做嘢十年，大人大姐俾果五千都叫多？呢D唔係叫俾錢我媽洗，係叫責任。但有人覺得我媽一個人又有收入點解要俾？點解？因為我哥仲識寫個孝字仲叫做似番個人，但唔知點解喺某D人眼中要加個愚字。係，俾哂你咪最好最醒
所以有人居然可以無恥到話既然俾了家用，即係有份供樓，周圍喺度話俾人聽我媽住緊層樓我哥有份供，但佢唔想同奶奶住所以大義凜然讓俾我媽住，自己捱租。真可笑！五千蚊供太X城千幾呎仲要向海？你搵層俾我供下？難為呢度有人仲覺得佢好好，好可憐。講句好聽話一家人要幫忙下，實質佢的局面佢一手做成。
得我哥一個搵錢要住新樓有海景丶出入要揸車撘的士丶為了面子俾佢親朋戚友以為太X城佢真係有份，借我媽地址報間附近頗貴的幼稚園，唔夠洗依家要陀多個，話幫我屋企追個男孫。幫？老人家丶傷殘，多多錢都幫。新移民月入8千生3個丶60歲先生仔叫自己攞嚟。
我唔明呢D人，咩都指意人，舊年中秋，我放早，佢去到我媽度見到我都可以話我做姑仔唔幫手，反正早收都唔去接佢個女，真係好笑，咁都有得賴咁都要喺度話俾人聽我做姑仔有幾衰。 我結婚，佢話叫我姪女做花女，我話唔洗我只係求其註冊，佢喺都要，話靚D，點知原來係買了條Dior裙仔，接近5位數要我埋單，好算，檔我送俾小朋友禮物，但其實D人係為咗佢女兩星期後去人哋生日會要做公主，上網post佢為了個女買了條Dior裙。
我有個好朋友家姐，專門幫小朋友補習讀男女拔小學，入學率百份百。俾佢喺FB知道，非要我介紹。我朋友家姐收費唔平，$800一個鐘，個半鐘一個course ,一個禮拜兩次，咁一個月已經要俾成萬蚊。況且我好清楚我姪女咩資質，我朋友家姐係唔收冇potential 的，佢唔想浪費家長錢同自己時間。 我唔想幫佢介紹，無謂令小朋友無哂自信，但佢唔心息，日日打嚟煩，又話俾個機會話哂同姓。好我幫你約，人哋俾面話上門睇下，了解下小朋友的生活。 佢話要去某高級餐廳仲要book房，話有好印象。人哋食完餐飯，俾咗D建議佢，日後注重囡囡邊方面會有幫助。其實人哋已好婉轉唔收，唔想俾壓力家長同小朋友，但佢以為人哋實收因為人情關係。係咁叫我叫人哋＂收順D＂問$500一個鐘得唔得，天呀！你嗰日食飯張單幾千蚊都側側膊要我埋，莫講成萬蚊一個月啦，而且人哋根本唔收。我呢個姑仔又變成罪人，辦事不力，無盡責去爭取，永遠只有人哋錯。
我同我媽share一個阿姐做家務煮飯，大約15000一個月，因為我媽嗰邊少嘢做我媽叫我將俾佢嗰五千出糧時俾埋阿姐，唔洗左手交右手。 佢就以為我唔洗俾，口口聲聲話我做人個女冇兒冇女就唔洗俾家用，佢有頭家都要俾。 我最近買了樓，佢覺得冇可能，一定係我媽幫我，話我媽偏心，乜都係佢自己想像的。我同我哥同一個專業，雖然我哥年資高我兩年，但我三年前轉了跟客嗰邊，賺到錢，我老公亦搵得多過我，我點解買唔起樓？淨係識得屈我媽偏心。
實質佢自己一心以為我屋企有錢，嫁入嚟唔洗捱，但依家冇攞到任何嘢就FB、開post話我媽，講到我媽點衰點衰。係我媽冇買補品係罪丶冇湊B係罪丶收家用係罪丶冇送錢俾你買樓係罪、因為我媽唔資助，你冇錢搞到你夫妻不睦係我媽一手做成。
最近佢＂提議＂要我媽賣咗層樓，佢話問咗agent可以賣到1300至1400萬，叫我媽用6／700萬買層嘉X灣，因為新過太X城喎，住新樓有乜唔好？一炮過唔洗供，另外D錢俾佢買層一千萬左右的3房，佢哋借3百萬左右啱啱好，大家好大家開心。真大想頭700萬的嘉X灣都唔知有冇500呎，憑咩我媽有層千幾呎唔住，要住500呎而你就住1000呎？咪轉頭又開post話我媽霸住「佢層樓」，搞到佢買唔起樓。
我媽已經不勝其煩，如果某人睇到唔該你自重啦，冇錢你咪出嚟做嘢囉，既然你full time mum咪唔好請工人囉。我哥搵4萬算係咁啦，你要點先安樂，收聲收手啦！
你嘅位置我好聲氣叫你一聲阿嫂，你得唔得人尊重大家心照，我媽我哥都怕咗你。
我同你講，如果你再亂up作故仔抹黑我媽，我同你死過。大不了一拍兩散。
咁賤既人都有, 極品呀
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
