少年成長今日: 0|主題: 16017

收藏本版

發帖

返回列表

跳至頁

查看: 2901 | 回覆: 0

親子對講機 [複製鏈接]

csir3290

子爵府

積分: 12040

1^#

發表於 20-9-27 10:48 |只看該作者 |倒序瀏覽 |打印

阿女雖然已經六年班，但係其實佢都仲未有自己嘅手機。因為一路都唔想佢哋咁早接觸手機，尤其是係擔心佢哋成日望住手機同埋用手機嚟玩遊戲。所以雖然阿仔同阿女每人都有一部我同老婆各自嘅舊手機，但係其實佢哋都冇電話卡。一般佢哋都只係攞嚟影相，由其是而家阿仔阿女各自自己有一部手提電腦都話要用嚟剪片。所以佢哋部舊手機都係攞嚟影相同拍片多。除此之外，而家佢哋多咗個用途就係攞嚟搜集資料，佢哋最熟嘅就係google助理，而家習慣咗除咗睇書搵資料之外有陣時做功課想搵啲資料嘅時候佢哋都會識得搵google助理，手機對佢哋兩個嚟講，係一部工具多過一個玩具，因為佢哋實在有太多興趣同埋太多嘢玩，所以根本就唔需要用到手機嚟玩。

因為佢兩個部手機都冇電話卡所以基本上佢哋係唔可以用手機嚟搵到我同老婆，好多時佢哋搵我哋都係用屋企個固網電話，但係因為好多時我同老婆都做緊嘢唔能夠即刻覆到佢哋或者聽佢哋電話，好多時佢哋都係留言。但係早幾個星期前，我睇雜誌睇到一款Apps介紹叫做Zello，裝咗呢款軟件之後，就改變咗阿仔阿女搵我哋嘅模式。我同老婆都覺得呢款Apps幾好用，基本上就好似一部對講機，只要個手機有wi-fi就能夠用到。因為屋企有wi-fi所以阿仔阿女就可以透過呢款手機好似對講機咁搵我同我老婆，當然佢嘅好處係除咗可以語音之外仲可以好似whatsapp咁用文字輸入。因為我同老婆返工佢哋用對講機我未必可以即刻答到佢哋，所以佢哋而家都慣咗用文字訊息。有咗呢個apps之後，尤其是阿女每日都send好多信息畀我，仲多過我老婆。好似會問我食咗飯未，有功課唔識佢就會即刻影畀我問我，又或者好似早兩日佢畫咗幅好靚嘅畫又會影相然之後send畀我問我靚唔靚。而家佢哋上網課時，佢兩姊弟開個電腦嘅時候有問題佢哋都透過呢款app嚟問我，當然未必可以即刻解決到，但係都可以叫佢哋試下諗下有冇其他方法解決。

呢款app仲有個好處就係你可以set到自己嘅狀態係忙碌定有空，當阿仔阿女喺個apps度見到我同老婆嘅狀態係忙碌嘅時候，佢哋就知道佢哋而家send嘅嘢我哋未必可以即刻答到佢。但係通常佢哋都唔理都會照send，佢哋就會知道我哋而家唔能夠即刻答。有咗呢款Apps之後，我哋除咗返到屋企多嘢講之外而家連我哋返咗工佢哋都會有訊息畀我哋，親子之間多咗對話仲多咗即時溝通，不過當然又會需要用多咗時間去答佢哋嘢，因為我唔想佢哋只係成日發訊息，但係收唔到回應，慢慢佢哋就唔再用呢款軟件。因為而家佢哋兩個可以透過呢款app將佢哋即時諗到嘅嘢或者感覺即時話畀我哋聽，但係如果我哋成日都唔回應慢慢就會覺得冇意思唔想同我哋講。所以而家有陣時連食晏都會變咗覆佢哋呢啲訊息嘅時候，不過只要享受大家溝通嘅時間就唔會覺得呢一啲係浪費時間。呢一款apps真係一款好好用嘅親子對講機。