產前產後個人經驗分享（實用文）
今年第二次做媽媽，加上疫情環境，有好多感想或者經驗想分享，可以等待產、備孕的新手媽媽或者想做神隊友的爸爸，有多樣野可以參考下，可以準備充足，盡量減少擔心。以下都係個人成功經驗、個人經歷，僅供參考，或者大家可以當笑料睇下。
祝各位美女、媽媽------備孕成功、懷孕舒服、生B順利、湊B輕鬆
個人資料：
二寶媽媽，2018年第一胎，2022年3月第二胎，由於疫情關係沒有工作，所以產前產後都在家休養，兩胎都係聯合醫院生，埋身母乳。
== 產前 ==
一、基本醫院都係需要以下資料齊全才會收症：
1.
BB的超聲波相。
2.
診所驗孕步驟完成之後，醫生會出一份有預產日期的轉介信。
3.
去你心儀的醫院登記，進行未來的一系列產檢及生產準備。
所以當得知自己中獎之後，如果以往經期比較準的話，可以預計一下此時係懷孕多少周，如果大約係4-5周左右，就可以去有得照超聲波的診所進行驗孕，驗小便及照超聲波。有D醫院甚至要求要見到BB心跳才收症，所以，唔心急的話，可以再稍等，自己預計好時間再去照。經期唔準的話，最好一中獎，就去診所驗孕先。
二、接下來的日子，進行一系列的產檢。如果自己及丈夫沒有什麼病痛，或者陀B的時候冇咩問題，就按照醫院建議的各種檢查去完成就得。也不需要經常去搵私家照超聲波。不過接近預產期，最好都係去照一下超聲波，咁就可以大概知道bb出世的size，產檢嘅時候話俾醫生知等佢地記錄低。
我第一胎嘅時候，最後一次超聲波照到bb頭圍偏大。我生b嘅時候就同醫生講：好辛苦，push唔到個b，其實我b照到係頭圍偏大，醫生你會唔會考慮下，可以有咩辦法幫幫手呢？醫生一直都話冇問題，結果，我真係push好耐都唔得，醫生檢查之後話，真係頭仔有D大，改用吸盤助產啦。頂，我當時真係好嬲，早D聽我講，檢查下，會唔會可以快D生完呢？所以，生之前，了解清楚自己bb嘅狀態、身形，都比較重要（個人認為）
陀B如果陀得好辛苦，但又不是病理問題，例如好似我咁，嘔到有血絲，一直嘔到5個幾月，連飲水都會嘔，嘔到胃病復發，建議可以搵中醫調理一下。係陀B初期嘔吐嘅呢5個月，我每月都有搵中醫覆診，根據唔同嘅身體狀況，飲中藥調理，基本飲3日就會有好轉，好轉之後，起碼可以有一兩個星期舒服日子過。去到孕後期，我係有需要才去睇中醫。
題外話，如果想調理身體備孕的話，睇中醫調理身體、針灸，都有好大用處。
陀B期間，總會抽筋突然想食D咩，或者只想食某D野，其他都食唔落，或者食好多野。個人覺得，其實陀B已經好辛苦，胃口大變，偶爾放肆一下都唔係問題，但體重真係要控制，否則生完之後望住個磅同塊鏡就兩行眼淚了。
還要記得做運動，都係老生常談的。但我想講嘅係，做運動，唔好hea做，要用啱肌肉，就算係散步，都要有意識地用肌肉控制，而不要隨便行行企企咁。生B過程需要消耗非常大，冇咁上下體力，好難支撐過去。而且會用到核心肌肉群，要鍛煉多D，還有深蹲，寬、窄深蹲都可以（即雙腳張開的幅度），呢個係我個人經驗，標準深蹲動作所鍛煉到的肌肉（我唔記得叫咩名啦，總之練就啱），係自然生產的過程中十分用得著。開始練習時，其實我係為左個B可以快D生出嚟。係產房嘅時候，醫生一直叫我用力推，好似疴屎咁。但講真，實際唔係用果D肌肉，咁樣亂疴B，真係要小心脫肛。我自己當時不自覺地用左深蹲動作所鍛煉到的肌肉用力，我feel到BB出緊嚟，的確感覺食力左好多，醫生都即刻講【啱啦！BB出緊嚟啦！好好！】得到醫生認證，我繼續用呢組肌肉去push個B出嚟，好快BB就出到大部分身體了。
孕後期，大概最後一個月，需要去清胎毒。常見嘅都係：白蓮須，金銀花，海帶綠豆沙之類的。記得盡可能走甜或者少少甜，要控制糖分。如果懷孕時係控制唔到口慾，亂食野的話，就最好早多小小開始去胎毒啦。身體受得的話，就隔日飲一次。唔受得涼野，就一星期飲一兩次就好了。中醫嚟講，毒素都有分濕毒、熱毒，清胎毒嘅時候不妨飲多兩種不同嘅涼茶，針對性地清理。
執走佬袋。按醫院規定執走佬袋。想講自己嘅心得。 第一胎，咩都唔知，就咁入左產房，生完之後簡直成個人散曬，上到病房仲要冇野食，真係人都癲。所以我想話，係常規item以外，有呢D野可以帶：
1.
方包——生B消耗巨大，通常翻上病房，都唔會咁啱係食飯時間，再者，生完都冇得即刻食啦。等屋企人買外賣嚟，都已經餓到虛脫了。又或者半夜肚餓點算（尤其母乳媽媽，可能會食得比較多、密）。呢個時候，方包就幫到你。我第二胎入院，就帶定左一包方包（仲要係提子方包，有D甜，補充糖分）還有一包夾心餅，生完之後，又冇醫院餐食，呢D乾糧真係救我一命。
2.
消毒濕紙巾——消毒廁所板。市面上有D廁所板紙墊可以買，貼上去就用得，好似好方便咁。但實際用起上來並不真係咁方便。 尤其對於順產的媽媽，陰道肌肉鬆弛，當人有三急要去廁所，係好難忍的。去到廁所仲要慢慢鋪開張紙，真係好麻煩，而且D紙有可能癡唔實會移位，癡得太實，又要麻煩產走D貼紙。所以，用消毒濕紙巾，係最方便有效。
3.
眼罩——醫院夜晚都不會熄燈的，對於缺乏睡眠的媽媽嚟講，有個眼罩戴住瞓，可以加速入睡，快D叉到電。我自己就帶了幾個發熱眼罩，仲有小小香味可以幫助放鬆。
** 生產 **
由於疫情影響，公立醫院唔一定允許陪產，就算可以陪產，醫院都有一系列要求，呢個要睇各間醫院同醫管局屆時嘅規定。
我第一胎嘅時候，係聯合醫院生B嘅經歷不太好，所以一直都有D擔心。但就因為經歷過，所以知道第二胎入產房，要點樣同護士和醫生溝通。
第二胎生B，由於係疫情嚴重的時候，冇得陪產。自己一個入產房，真係好驚。好在護士好好人，今次生B遇到的所有護士、醫生、姐姐都好好人。而且今次完全係冇用任何止痛方法順產，好似古代咁純自然生產，真係明白到呼吸法的作用。
穿羊水、見紅，唔洗太緊張，但要快，初產婦可能還要十幾個鐘之後才會生，但經產婦一有征兆，宮縮嘅變換速度會超快，可能半個鐘後就會開左好幾指。所以經產婦真係要隨時有心理、身理準備入院。
以最快嘅速度去稍微沖洗身體——因為下次沖涼係好多日之後，但陰道不能用水喉水清潔，因為陰道口已經打開，用水喉水清潔，怕會有細菌感染，用乾淨的紙巾印乾就好。換乾淨衣物、M巾準備出門。
食D野——因為生產消耗大量體力，食定D野補充體力，不至於空腹入院。
如果唔太痛，仲可以做個快速檢測——因為入院登記嘅時候，護士都會先咨詢呢樣野。冇做都冇問題嘅。
入院的時候還要做核酸檢測，檢測結果至少需要2-3個鐘先有，係呢個時間，最基本嘅笑氣都唔可以用，要有結果，才可以用笑氣。
係呢段時間，冇陪產的話，就只能自己一個係產房作戰了。我都明，痛係上嚟，真係咩都唔記得。但呼吸法係有用的，記得要調整好自己嘅呼吸，可以幫助止痛。
感到想疴屎，千祈！唔可以疴！也不可以！用力！一定要忍！因為呢個都生得嘅征兆之一，一有呢個感覺，一定要馬上通知護士。都有可能呢個感覺出現好耐都未生得，但真係要忍。
我當初出現呢個感覺嘅時候，我心諗，終於等到啦！點知護士檢查之後，話我只開了3指，還未夠大。跟住大概過了半個鐘，突然護士話我生得，開左8指，急急腳call醫生入房。所以經產婦嘅生B過程係可以好快、好突然。
生B過程，配合呼吸和陣痛，運用好肌肉，聽醫生話，咁就事半功倍。過程中，自己有任何唔舒服，一定要及時同醫生護士講。好似我咁，產房內好凍，我凍到不停打冷震，護士叫我冷靜D，但我真係好凍，控制唔到身體，加上好痛，又要用力，我不停想嘔。呢D我都即刻同護士講，等佢地可以知道我嘅狀況。
生完之後，需要留係產房內觀察身體狀況，都係果句，產房內好凍，如果有咩需要，例如覺得好凍，需要多張被，一定要及時開口講。
觀察之後，病房有位，就可以上病房休息。上到病房，順產的起碼要8個鐘之後先可以落床，開刀我就唔知啦，因為冇經歷過，但一定係唔可以即刻落床的。傍晚上病房的，基本都要等翌日，護士才得閒招呼你落床。如果過程中，覺得自己身體係可以的，想要落床，記得要小心！！
係床上，要把握時間休息，也要把握時間用力按壓子宮，幫助子宮收縮，排出惡露。按壓子宮都係好痛的，但要忍啊。係病床可以飲水，而且如果有胃口（基本都會有胃口，消耗太大，肚餓了），記得快d食自己準備的乾糧。唔好等醫院餐，餓親自己。
係聯合醫院，當護士知道我身體無礙之後，bb就推嚟我身邊由我自己親自照顧了。第一胎的時候都唔係咁嘅，所以今次咁快就全天候貼身照顧bb，令我有點措手不及，本來仲諗住每日可以有幾個鐘休息。
由於產後唔可以即刻落床，有大小便需要的話，要提前通知護士。佢地會攞尿兜俾你使用。
由入院果刻開始，已經係肉隨砧板上，要剝光豬，可能會瀨屎尿屁，瞓係床唔郁得要用尿兜。。。etc. 所以呢個時候，唔需要咁重羞恥心，唔好怕醜。
醫院人手嚴重不足，所以係病房期間有咩需要，一定要早D通知，因為唔會好快可以幫到你，另外，最好記得要講多D多謝，醫護人員真係好辛苦呢！
++ 產後 ++
記得，唔好濕凍水，室溫水都唔好，洗手最好用暖水。我第一胎就係唔聽講，就咁開水龍頭洗手，手指關節即刻痛，仲要痛好幾日。刷牙都最好用暖水。唔好吹風，否則真係會好痛，頭吹到就頭痛，背吹到就背痛。
沖涼方面，我覺得其實係可以的，唔洗咁緊張真係一個月唔沖涼。唔乾淨點湊B呢，而且唔乾淨，自己都唔舒服。記得要熱水，沖完涼要即刻抹乾、保暖，洗頭亦如是。不過為求長老安心，我第一個星期，都係隔日沖涼，隔日用姜皮水抹身，唔係日日沖。
扎肚、盆骨修復，真係好重要。當年以為自己後生，控制飲食+運動，就可以復原身材。但其實根本冇可能，尤其係盆骨。 生完之後要翻工又自己湊B，好忙；全母乳，食少D飲少D，母乳量第日就開始減少。所以第一胎之後根本修復唔到身材。再加上，其實生完之後鬆弛嘅肚皮根本係無法控制，點做運動，都好似不太有效。第二胎毫不猶豫，訂了扎肚，幸運地，搵到一個好好的師傅，手勢好好，為人也很nice，真係一個好大嘅幫助！起碼我已經可以將自己塞入去生B之前的牛仔褲，雖然拉鏈還是有D困難，日後恢復運動，我諗身材可以回復好多。
月子餐，第一胎由於住係媽媽家，完全不需要考慮呢D野。宜家搬出去住了
我99成日話要嚟煮飯俾我食，咪搞，到時攰到瞓低我就麻煩了，所以訂月子餐真係慳唔少功夫。
塞奶，第一胎的時候試過突然塞奶，有冇小白點我就唔記得了，但石頭胸，超級痛，bump唔出奶。要胸部鬆軟先可以bump到，試過用暖水袋熱敷唔得。要胸部鬆軟←熱敷，方便疏乳←咁點先可以熱到成個胸呢？我當時諗係沖熱水涼，但長時間沖涼太浪費了，所以我就諗到開盆熱水，將塞奶果邊胸浸泡入熱水到，好似浸溫泉咁，水偏熱。果然，慢慢開始覺得胸部軟化。
所以我嘅個人經驗（偏方）就係：開盆偏熱的水，放係一個地方（我當時係“浪”係洗手盆上），烏低身，將塞奶的胸部盡可能完全浸入熱水內，等皮膚開始熱了，就慢慢按摩、搖晃胸部，水轉涼就加熱水。感覺到乳房開始鬆軟，就可以用手擠壓出母乳，排出塞奶，等開始出奶順暢，乳房更加鬆軟之後，可以馬上轉用電bump排出塞奶。一定要趁胸部皮膚仲係熱的，轉用電bump，因為身體熱，才能方便出奶。塞奶唔知點解，一塞就幾日都容易塞，如果後續未能及時清空母乳，好容易又會塞，而且有可能乳腺還未通，還有淤積。如果試過呢個方法成功，咁我建議可以連續一兩日都咁樣清空母乳，疏通乳腺，咁就應該冇問題了。
餵母乳。無論咩方式、咩奶，只要媽媽舒服、bb食得健康，其實都不需要執著。有見過媽媽本身都好夠奶，但出世第一日開始，bb就唔中意埋身，餓佢一餐，都係唔埋身，只愛奶樽。原來係媽媽乳頭唔啱嘴型。用奶樽都一樣，會唔啱嘴型，所以如果bb對奶嘴A抗拒的話，就要慢慢試下奶嘴BCD。。。另外，都係餵食母乳，但如果半瓶餵、半埋身的話，好容易令初生bb產生乳頭混淆，食奶唔順利，甚至會變得抗拒埋身餵奶，以後只愛奶樽。呢個時候，如果還是想堅持埋身餵奶的媽媽，要辛苦D，戒左奶樽，堅持埋身一段時間，無論bb點樣推開你、點樣哭鬧都好，都要堅持埋身。bb唔肯食，咁就餓一餐先，佢再忍唔住肚餓要奶，而你只會俾乳房佢嘅時候，佢半推半就都要食。可以試下每次埋身之後，無論多少，是否順利，總之有食到，就讚下bb，錫下bb，俾D鼓勵同愛心bb感受，食多幾次，佢就會習慣翻，或者忘記奶樽呢樣野，就知道只有媽媽乳房才有奶。呢個過程係好辛苦的，但堅持就係勝利。
胎毒。B出世之後幾日，皮膚，尤其係面部皮膚會出好多白色粒粒，或者紅色粒粒好似含膿暗瘡咁，呢D其實係新生嬰兒暗瘡，上網搵下會見到相關資料，還有好多種類型，呢D都係bb幾個月之後慢慢消退。如果情況比較嚴重，可以試金銀花煲水俾bb沖涼浸浴，或者自製母乳面膜俾bb敷，甚至直接用母乳塗抹，可以舒緩或加快消退。但如果皮膚上係一整片紅疹般的，不是一粒粒，或使用母乳幾日之後沒有好轉，咁可能就係皮膚問題，例如濕疹之類，最好都係搵醫生睇下。
發表於 
返回列表
