少年成長今日: 2|主題: 16028

收藏本版

發帖

返回列表

跳至頁

查看: 23803 | 回覆: 5

主動打招呼 [複製鏈接]

csir3290

子爵府

積分: 12106

1^#

發表於 22-12-25 11:59 |只看該作者 |倒序瀏覽 |打印

隔離屋剛剛搬咗一對年輕夫婦同埋佢哋一對好細個嘅仔女嚟住，對夫婦望落去都應該係三十出頭，一對小朋友就應該係五歲樓下。早幾日同呢對夫婦一家同一部𨋢返屋企，其實大家都明知大家係住隔離屋，入𨋢嘅時候我都主動同佢哋打招呼，但係佢哋好似唔係好聽到咁，反而佢兩夫婦就喺度教緊對小朋友，話佢哋做乜樓下保安同你打招呼佢哋唔叫人。我就喺度諗，其實好多時朝頭早返工我都會同呢家人嘅爸爸差不多時間出門口，喺𨋢口度如果我到先，見到佢我通常都會同佢講早晨，但係相反如果係佢見到我先，如果我唔主動同佢講早晨通常佢都好似睇唔到我一樣。落到樓下通常見到人我都會嗌早晨，但係呢個爸爸都係一樣掂行掂過，從來唔會主動同人打招呼。我唔係話咁樣有乜嘢問題，但係如果家長畀到小朋友嘅身教係咁，細路仔又點會動得主動同人打招呼呢。

我哋成日都話而家人與人之間越嚟越冷漠，我記得我哋上一輩嘅家長好在意教我哋見到人一定要打招呼一定要有禮貌，成日都講你多人不壞，千祈唔好俾人話冇家教。呢一代嘅家長佢哋未必一定係無禮貌，但係可能佢哋自我中心提高咗，可能冇咁在意要拉近人與人之間嘅距離，係咁樣嘅情況之下到佢哋教細路仔，細路仔自然唔會懂得主動同人打招呼啦。再望返自己公司又真係喎，後生嘅同事通常都好少返到公司主動會同人打招呼，我哋呢啲畀人認為係上一輩嘅人，反而好在意見到邊個都要嗌早晨，不論係保安清潔同事抑或係上司總言之見到人就打招呼，朝早就叫早晨，之後就見到人就嗌你好。

其實要教細路仔禮貌係真係要家長大大力咁喺細路仔面前做畀佢睇先至有用，所以由細細個每一朝我湊阿仔阿女返學開始，不論見到邊個我都一定會大大聲嗌早晨，不論係大廈保安定清潔阿姐，去到學校附近見到學校附近嘅保安學校嘅工友老師等一律我都會嗌早晨。期間我唔會逼阿仔阿女跟我一齊嗌，但係佢兩個慢慢耳濡目染自自然然突然間有一日佢哋就跟我一齊嗌，而家佢兩個都習慣咗朝早見到人就嗌早晨。所以其實細路仔你想佢嗌人有禮貌，其實點樣迫都冇用，因為如果父母唔做佢哋就唔會覺得呢個係一個常態，正如去長輩家屋企食飯，入屋見到人不論邊個都要嗌，食飯嘅時候要嗌大家食飯，全部全部都係家長做畀佢哋睇，佢哋從中學習以後慢慢習慣。試想像下連家長自己見到長輩都唔嗌，或者都冇特別做畀佢睇乜嘢叫做禮貌，只係靠喺學校老師講畀佢哋聽，細路仔又點會學到真正嘅禮貌呢！

年輕一輩嘅家長如果要教細路仔禮貌真係應該好好檢視一下自己平時待人接物嘅態度。其實最有效嘅方法就真係好似我哋上一輩家長咁，我哋都係佢哋身上學到乜嘢叫做禮貌，學懂乜嘢叫做禮多人不怪。如果呢一代嘅家長都唔在意教細路仔禮貌，咁一代一代落去大家只會越嚟越自我中心，越嚟越自我封閉喺自己嘅空間入面，人與人之間嘅交往只會越嚟越少，其實對細路仔嘅社交都會有好大嘅影響。

0 0 0

私人傳訊

goodsnooky

珍珠宮

積分: 41036

2025勳章 2025勳章蛇年勳章

2^#

發表於 22-12-26 14:20 |只看該作者

教小朋友有兩種唔同嘅理論，有啲好似樓主咁希望小朋友禮多人不怪，但係亦都有啲家長會希望小朋友盡量避免和陌生人溝通或接觸，我自己教小朋友會好似樓主咁，同人主動打招呼。

私人傳訊

hoooot

大宅

積分: 1527

3^#

發表於 22-12-26 18:15 |只看該作者

本帖最後由 hoooot 於 22-12-26 18:17 編輯

goodsnooky 發表於 22-12-26 14:20
教小朋友有兩種唔同嘅理論，有啲好似樓主咁希望小朋友禮多人不怪，但係亦都有啲家長會希望小朋友盡量避免和 ...

最怕叫完早晨之後對方順便問三問四問長問短，人地叫我我會應，但一定唔會無啦啦大大聲打招呼，一黎好做作好唐突，二黎其實無必要同陌生人打咁多交道。同人叫早晨人地心情唔會好左/差左。當然，見到老細/生意夥伴/其他有利益關係嘅人，就應該講早晨啦。

通常有啲好細嘅小朋友嘅家長先會咁care呢啲嘢，我有親戚都係咁，以前細路細個嗰陣係咁要佢哋叫人，大左佢地咪個個打機唔叫人，家長都唔care。因為到啲小朋友長大啲家長就會明白人地只會關注你個細路係咩成績，入唔入到名校，大個左就係咁問仔女讀邊間大學，人工幾多，冇人在乎呢啲小事。

唔係話唔需要禮貌，基本禮貌一定要有，但真係唔需要專登大大聲叫早晨，特登話比人知自己好有禮貌。樓主長篇大論，都係講想人地仔女好冇教養，自己嗰個有啫。有冇教養，我反而覺得重點唔係有冇講早晨，適當場合保持安靜更加重要。