少年成長今日: 0|主題: 16021

收藏本版

發帖

返回列表

跳至頁

查看: 33882 | 回覆: 0

學習自己解決 [複製鏈接]

csir3290

子爵府

積分: 12068

1^#

發表於 24-3-3 11:07 |只看該作者 |倒序瀏覽 |打印

有一日放工返到屋企，老婆同我講話細佬今日放學返嚟好唔開心，喺度係咁呻。佢話原來今日交功課嘅時候，傳下傳下傳到唔見咗份功課，所以老師以為佢冇交，但又唔知傳咗去邊度，佢話要補交份功課仲會畀老師扣操行分。到食飯嘅時候佢都仲喺度呻緊，佢話交功課嘅時候，佢將份功課由後面傳上去，但係前面啲同學有顧住傾計，因為份功課要交畀科長，如個科長又隔幾行咁遠，所以份功課最終就唔知傳咗去邊度，最慘佢呢份功課只不過係一張剪報嘅工作紙，所以就唔知吹咗落地定係點樣樣唔見咗，最終科長點功課就點唔到阿仔嗰份，阿仔就好驚仲同科長講話自己有交，但係科長真係點唔到，佢話一日最衰就係啲同學顧住傾計，所以份功課都唔知傳咗去邊度傳咗畀邊個。咁我就問阿仔點解唔小息即刻落去同老師講，阿仔話老師實唔信佢，一定當佢冇交，咁我問佢跟住點處理，佢就話下個禮拜要補交份剪報工作紙同埋會畀老師扣操行分。其實我哋都好信任阿仔，因為呢一份剪報工作紙我哋都見到佢做，點解我哋知呢？因為佢都問過我同老婆嘅意見做邊一份剪報，同埋做完之後佢都有畀我老婆睇過啲英文嘅文法寫得啱唔啱，所以我哋知道佢真係有做。咁我問阿仔補咗份功課未佢話一放學返嚟已經補咗，但係阿仔覺得好唔抵嘅一樣嘢，就係咁樣畀人扣咗操行分。咁我就同阿仔講，既然你都補做咗份功課，咁不如唔好等下個禮拜啦！聽日就親自攞返份功課交畀老師，然之後再同老師解釋，我個仔依舊都係話解釋都冇用老師實唔信。我同阿仔講話其實平時你咁乖，老師應該信你嘅。因為平時你都乖開，而且老師應該信任學生。但係阿仔依舊都只不過係話講都冇用，老師實唔信。不過佢都話打算聽日攞返份功課畀老師，但係就預咗會畀人扣操行分。我話既然你都覺得咁唔抵點解唔試下同老師解釋呢？

我老婆同我講話其實阿仔係童年陰影，因為喺小學嘅時候佢曾經畀老師好惡咁鬧過，果次只不過係因為佢坐咗喺小學門口出面嘅球場等工人姐姐接家姐過嚟再湊佢，但係因為嗰個球場老師講咗放學唔畀留喺嗰度，而果日咁啱就有訓導老師行過見到佢坐喺度等工人姐姐，就行埋去話佢，但係阿仔自細都細膽，老師又好似態度好嚴肅咁，嚇到佢唔敢講嘢，咁老師就話佢跟住阿仔就當場喺度喊。自此阿仔就好似驚咗老師咁，覺得講乜嘢老師都唔會信，所以佢為免解釋，自此佢就好小心免得有畀老師話嘅機會。我老婆話可能仲係呢件事對佢嘅影響，所以佢都仲係唔敢主動搵老師解釋，免得有機會畀佢哋話，而且佢總覺得老師係唔信任學生。

當刻我曾經閃過一個念頭，就係既然阿仔覺得咁唔抵，不如幫佢打電話畀老師同老師解釋，但係諗深一層，其實阿仔都應該學習自己面對問題，如果覺得唔抵嘅就應該主動同老師講同埋解釋，所以最終我都冇出聲，只不過同佢講話既然聽日都諗住補交份功課畀老師，咁交功課嘅時候就不如再同老師解釋下，阿仔依舊都係話老師實唔信，我話不如你試下啦！橫掂你平時都乖開，老師對乖嘅學生應該會仲多啲信任嘅。

第日放工返到嚟我就問阿仔補交咗份功課未，阿仔話補交咗，佢仲話佢為咗驚老師唔信佢，所以佢仲叫埋前面兩個位嘅同學同佢一齊落去搵老師，啲同學可以做人證證明佢真係有交份功課。咁我話老師最終有冇扣佢操行分呢？佢話老師信佢仲冇扣佢操行分，只係就咁收咗份功課。我問老師收佢份功課同聽佢解釋之後，有冇問佢啲同學嘅證人呢？阿仔話老師完全都冇問過同佢一齊落去嘅同學。我咪所以係囉，老師通常都會信任學生，尤其是你平時乖開，阿仔自己解決咗件事之後好似如釋重負咁，仲要冇畀人鬧亦都冇畀人扣操行分。佢覺得係自己嘅方法解決咗個問題。

其實講真就算今次阿仔最終真係畀老師扣操行分，我諗我同我老婆都唔會幫佢出面同佢搵老師講，因為就算佢覺得唔抵，但始終細路仔都需要學習面對同埋解決問題。阿仔自己都話今次就算畀人扣分，唯有當買個教訓，下次交功課嘅時候小心啲親手攞畀科長。但係我又估唔到佢會諗到帶埋人證一齊落去搵老師解釋呢個方法。因為我哋覺得以阿仔咁唔信任老師，佢應該最終都只不過係會將份功課交咗落去老師個簿架就算，最多當埋個教訓下次小心啲。但係呢次經過自己諗方法去解決問題，反而對佢嚟講係一個更大嘅學習。所以到今時今日我始終都覺得做家長嘅唔係事事要幫子女做決定同出頭，始終都要畀機會佢哋自己學習解決問題，如果唔係最終都只會事事依賴家長，同埋更重要嘅係家長可以幫佢哋出頭出幾多次呢？始終細路仔都需要長大，學習解決自己嘅問題。