少年成長今日: 3|主題: 16017

收藏本版

回覆發帖

返回列表

跳至頁

查看: 19642 | 回覆: 2

收成 [複製鏈接]

csir3290

子爵府

積分: 12040

1^#

發表於 25-3-9 11:18 |只看該作者 |倒序瀏覽 |打印

攞完阿仔阿女嘅成績表，幸好佢兩個嘅成績都係預計之內，應該都算係平穩進步。其實佢兩姊弟而家讀到中學，讀書溫習嘅情況都已經唔使我同老婆太擔心，因為佢兩個大部分時間都已經係自動自覺溫習，而我哋提得佢哋最多嘅反而唔係叫佢哋溫習，而係提佢哋要休息，我就更加會叫佢哋兩個得閒一齊打下機。

但係其實佢兩姊弟就同所有小朋友都一樣，唔係天生就鐘意讀書就會自動自覺溫習做功課。亦都唔係因為佢兩個特別叻，講真有啲家長可能會覺得細路仔天生叻啲讀書就會叻，無疑先天可能真係有啲小朋友學習能力特別高，咁可能反映佢學嘢會比較快，但係其實我覺得更加重要嘅係點樣後天培養佢哋學習嘅習慣。有啲家長成日就覺得自己仔女讀書成績唔好，就係佢唔夠人哋叻，但係其實可能只係小部分同先天嘅能力有關，而更大部分更重要嘅就係後天點樣培養學習習慣。每一個小朋友出世都係一張白紙，所有嘅生活習慣其實都係嚟自家長點樣培養。正如我之前講，其實邊有細路仔天生就鐘意讀書溫習做功課呢啲咁悶嘅嘢呢！尤其是如果好細個已經接觸手機，接觸呢啲多姿多彩嘅媒介之後，就更加唔會鍾意睇書溫習呢啲咁悶嘅嘢。所以在我嚟講，我同老婆都明白培養學習習慣係最重要，所以「電子奶咀」我哋根本重來都唔畀佢哋接觸，我諗直至到佢哋讀初小，其實都好少畀佢哋接觸手機同平板。另外我哋更加著重係自小陪伴佢哋一齊做功課同溫習，令到佢哋明白學習係一個責任同埋習慣，陪伴更係令到佢哋喺沉悶嘅溫習同埋做功課之中多一啲樂趣，所以就更加考驗家長嘅情緒控制，我哋唔係要幫佢做功課，而係要慢慢引導佢哋自己搵到答案，而當中要伴以好多好多嘅鼓勵，令佢哋覺得自己係可以做到。呢一個部分先至係最花家長時間。但係我可以肯定咁講，如果喺細路仔好細個開始，家長肯花呢啲時間，將來收穫嘅只會更多。但係相反如果家長唔肯花呢啲時間去幫細路仔建立同埋培養學習習慣，到佢越高班，壞習慣形成，你要改只會花上更多更多嘅時間，而且只會令到家長更加難諗方法去幫佢哋改善，試諗下佢哋細個嘅時候，嗰啲功課或者書本其實深極有限，家長都應該仲可以陪住佢哋一齊教到佢哋，但係當佢讀到初中，你仲想用陪伴呢個方法？就算佢肯畀你陪，你亦都未必懂得教佢。有啲家長話我自細就已經將細路仔送去補習，點解都唔能夠建立到習慣，但係其實只要諗下，補習又點會令到個細路仔開心，覺得學習係一件開心嘅事呢？如果佢都覺得唔開心，咁又點會有興趣繼續做好呢？所以以為只要將細路仔送咗去補習，將自己的責任外判出去就可以解決問題，其實未必真係咁有效。如果自小陪住啲細路仔開開心心溫習同埋做功課，幫佢哋建立自信，另外一樣嘢更加重要嘅係家長要懂得欣賞微小嘅進步。大進步就建立自微小一步一步嘅進步累積而嚟。好似家長日攞成績表，家長第一時間嘅睇到可能只係成績表上紅色嘅分數，但係作為一個積極嘅家長，想鼓勵細路仔，調返轉反而就應該欣賞成績表上面可能係好少嘅進步，只要家長懂得掌握住呢啲小進步，懂得去欣賞，慢慢就會令到細路仔覺得自己係有能力做得更好。如果只係揸住張成績表，因為做得唔夠理想而只係埋怨同責罵細路仔，咁只係不停話畀佢聽，佢係冇能力做得更好，咁佢又點會諗方法去改善呢？

所以家長喺細路仔仲細，就要好好地用時間諗下點樣幫佢哋建立一個良好嘅學習習慣，點樣幫佢哋建立自信，與其塞個手機畀佢哋，等佢哋自己自學或者睇卡通然之後換嚟寧靜嘅時間，等家長可以做自己嘅嘢，咁不如細個用多啲時間幫佢哋好好建立習慣。正如而家我同老婆，夜晚其實大把空餘時間自己睇手機追劇或者做自己嘢，因為佢兩姊弟，我好有信心佢哋都係各自喺房度溫習同做功課，亦都唔需要我同老婆再坐喺身邊。而家諗返轉頭佢哋細過我同老婆所付出嘅時間，其實而家就正係回報嘅時候。

所以我成日都覺得教仔女最重要嘅就係肯付出時間同耐性，亦都要懂得欣賞同埋給予好多嘅鼓勵。講就好似係一啲好老生常談嘅道理，但係要做到，係需要家長肯付出好多嘅時間。家長肯唔肯放低部手機，坐喺小朋友隔離同佢哋一齊溫習抑或係畀部手機佢哋，然後各自用手機，家長表面上好似係能夠換取一啲獨處嘅時間，但係將來你要糾正嘅時候，你只能夠怨一句，手機係你自己畀個細路嘅！