少年成長今日: 0|主題: 16112

收藏本版

回覆發帖

返回列表

跳至頁

查看: 11578 | 回覆: 2

爸爸之苦 [複製鏈接]

csir3290

子爵府

積分: 12598

1^#

發表於 26-3-15 12:40 |只看該作者 |倒序瀏覽 |打印

上星期同教開嗰對籃球隊一齊去比賽，開始之前見到一個比較少見嘅家長，因為隊球隊嘅球員大部分都係中學生，所以練習嘅時候好多時都係自己去練習嘅地方，一般比較少見到佢哋嘅家長。可能今次係比賽，所以就多咗啲家長嚟睇，而呢位爸爸我都係第一次見到佢。點知佢一見到我就即刻行埋嚟問我，佢個仔平時乖唔乖同表現如何？咁佢個仔喺球隊表現一向都係積極又乖，而且仲係球隊嘅重心，咁我當然喺個爸爸面前都讚下佢個仔啦！點知講多兩句，個爸爸就即刻喺我面前同我呻，佢話全家都冇人贊成佢個仔打波，得佢一個堅持畀個仔去練習同埋比賽，佢話佢老婆成日話佢帶咗個仔去打波就搞到佢個仔成績差咗，所以佢啲屋企人好反對佢畀個仔繼續練習同埋比賽，而且除咗佢之外，佢老婆都唔會去睇佢個仔練習同埋比賽，佢覺得自己好委屈。佢話佢都明白佢個仔讀書成績係麻麻地，但係畀佢個仔接受正規嘅球隊練習佢就覺得起碼個仔唔會學壞，仲可以有正規嘅紀律訓練，起碼學到守規矩，佢話佢個仔係球場上面就算畀人推跌，佢都唔會發脾氣，起身就繼續練習同比賽，佢覺得佢個仔透過打波個人成熟咗，有目標咗，亦都懂得守規矩同埋有班好嘅朋友一齊。但係佢話佢啲屋企人就係唔明白，偏偏就淨係覺得打波浪費時間，令到佢個仔讀書成績唔理想。呢位爸爸其實都好了解佢個仔，佢話佢知道個仔其實讀書麻麻地，但係透過打波，佢就搵到成功感可以幫佢建立自信，令到佢減少咗喺讀書上面嘅挫敗感。而且佢兩父子透過打波亦都令大家嘅關係更加緊密。但係偏偏佢老婆就係唔明呢樣嘢，就淨係覺得如果個仔唔係用咁多時間放喺打波上面，就可以專心多啲讀書，成績一定會更加進步。佢話佢唔想為咗呢樣嘢同佢老婆鬧交，所以都幫佢個仔安排補習，但係每當個仔到星期六日要比賽或者練習嘅時候，佢老婆唔多唔少都會有啲唔滿意嘅說話。聽到個老豆咁講我都唔知點安慰佢，但係我對佢嘅諗法亦都表示贊同，因為睇到佢個仔係球隊嘅表現其實絕對係一個好孩子，亦都有領導才能，同隊友之間嘅關係亦都非常良好。我同個爸爸講話我好同意佢嘅諗法，雖然我唔知道佢個仔讀書成績差成點，但係好肯定個爸爸畀個仔參與球隊練習呢個方法係正確嘅。
從呢位爸爸連我呢個初次見面嘅教練都可以講啲咁深入嘅話題，就可以知道佢喺屋企受嘅壓力其實都幾大。雖然我兼職教波唔係好多年，但係好多家長都有好似有呢位爸爸嘅老婆咁嘅諗法，即係打波會影響咗學業成績，最輕就係考試前一個月就要停曬所有練習，雖然練習只係一星期一次至兩次。再嚴重啲嘅就係一見到個細路仔成績退步，就要佢停曬所有嘅練習同比賽都有。講真成績差可以有好多原因，但係最容易搵到嘅藉口就係參與課外活動而導致成績變差，所以課外活動必定係最先被犧牲嘅！但係講真停曬所有活動係咪又真係所有嘅時間都係用曬嚟坐低溫習呢！如果停曬呢啲有意義嘅課外活動而成績都唔能夠有顯著嘅進步，咁又係咪得不償失呢？

我自己就覺得成績唔好有好多原因，當然其中一個最主要嘅原因就係時間分配問題，既然我哋成日都講體育運動有咁多好處，咁點解唔利用呢啲好處去幫細路仔建立自信，然之後再幫佢哋建立好一個適合嘅溫習習慣，如果細路仔成績唔好，但係又鍾意打波，正正就可以同佢講條件，就係除咗打波之外都要嘗試去補習！我相信細路仔都會願意父母同佢哋傾一個合適嘅方法去提升自己嘅成績。只係盲目咁以為課外活動係唯一嘅原因導致成績下降，只係簡單咁取消曬所有課外活動，係咪就會立即提升學業成績我唔知，但係起碼就會破壞咗同仔女嘅關係，同埋佢哋建立自信同成功感嘅機會。如果好似上面講嗰位爸爸所面對嘅處境就更加連夫妻關係都破壞埋添！

0 0 0

私人傳訊回覆引用

vbnn

複式洋房

積分: 174

2^#

發表於 26-4-10 01:55 |只看該作者

回覆樓主：

本帖最後由 vbnn 於 26-4-10 01:56 編輯

健康運動都唔比，某d 家長，比子女太大壓力

私人傳訊回覆引用

小菜豆

公爵府

積分: 28993

馬年勳章 2025勳章蛇年勳章 2024年龍年勳章

3^#

發表於 26-4-14 17:27 |只看該作者

csir3290 發表於 26-3-15 12:40
上星期同教開嗰對籃球隊一齊去比賽，開始之前見到一個比較少見嘅家長，因為隊球隊嘅球員大部分都係中學生， ...

都話唔埋
我妹讀書時剛升上區內名校，
選拔入咗籃球隊，佢十分投入，
好有群體精神，唔想球隊輸。
但係成績跌得好勁，
加上開始跟同學追名牌，
被班主任懷疑拍拖，
我媽陣腳大亂，日思夜想，
問佢上到中學要諗將來條路，
名校競爭大，想自己唔輸得定校隊？
最後退出球隊，成績重上軌道，
後來一直保持級一和上到大學心儀科目。現在事業人生都很順。