少年成長今日: 0|主題: 16022

收藏本版

發帖

返回列表

跳至頁

查看: 28056 | 回覆: 0

講不停 [複製鏈接]

csir3290

子爵府

積分: 12072

1^#

發表於 23-9-24 11:25 |只看該作者 |倒序瀏覽 |打印

講開升中，開咗學兩個幾星期，細佬每日返到嚟都好多嘢講，因為中學好多嘅情況對佢嚟講都係好新奇，例如要自己出街食飯，又或者學校上堂嘅情況，同同學相處等，對佢嚟講都同小學有好大分別，所以我同老婆一返到屋企食飯嘅時候，佢總係滔滔不絕講學校嘅情況好多嘢講，而家姐亦都會喺呢個時間分享佢自己嘅經驗。我同老婆都知道佢肯講咁多嘢嘅時候，我哋一定要畀回應，一定要肯同佢傾，如果唔係佢發覺佢講啲嘢家長都唔回應或者無興趣嘅時候，慢慢佢就會開始唔講。好多時家長投訴話啲細路仔唔同佢哋傾計，正正就係因為有陣時家長會忽略咗細路仔同佢哋講嘢嘅時候，覺得佢哋講埋曬啲無關重要嘅嘢，就唔係好畀回應佢哋，但係到家長真係有嘢想同細路仔講嘅時候，細路仔因為習已經慣咗冇乜嘢同家長講，家長就會覺得細路仔唔肯同佢哋溝通。其實溝通係雙向嘅，如果家長覺得細路仔講嘅嘢係無聊唔同佢哋傾，慢慢就會閂埋咗呢度溝通嘅門，我明白家長要工作，番到屋企可能都好攰，而細路仔講嘅嘢又係啲日常瑣碎事對家長嚟講可能冇乜重要性，所以有陣時就會忽略咗，但係正正溝通就係需要日常累積，如果平時唔係同仔女傾開，慢慢只會越傾越少。家長千祈唔可以忽略細路仔平時同你傾計嘅時間，其實對細路仔嚟講可能都係好有意義，例如我個仔咁，佢每日返嚟就係講一啲佢嘅新體驗畀我哋聽，可能大人會覺得無聊，但係其實對佢嚟講就係一啲好重要嘅經驗，如果我哋因為攰或者因為覺得佢無聊而忽略咗，到頭來慢慢佢只會越講越少。到嗰時只不過係一個惡性循環，到家長會覺得點解細路仔唔肯同自己溝通，但係歸根究底，又係邊一個首先忽略咗溝通先呢！好多時對於家長嚟講溝通都係有目的性嘅，即係佢想知道啲乜嘢，細路仔只需要答到家長要嘅答案就係溝通，但係對於細路仔嚟講絕對唔係咁，細路仔好多時都希望透過溝通可以同家長分享睇法，可以畀家長明白自己嘅感受，可以建立更加親密嘅關係同埋獲得家長嘅認同。所以我哋會見到好多時細個嘅細路仔會乜嘢都可以講得一餐。要同仔女保持溝通，家長就要記住唔好吝嗇時間，要長期打開溝通之門。