本帖最後由 csir3290 於 17-10-22 12:39 編輯
阿女今年三年級，由細到大做功課佢都有個好壞嘅習慣就係粗心大意成日都唔小心，已經成日提住佢但係佢因為想做得快所以成日都唔小心。明明可以望住條題目都可以抄錯數目字然之後計錯數。 明明好多嘢唔係唔識只不過係唔小心。已經成日提住佢但係佢都係咁。 終於前日佢經歷咗個大失敗！平時數學小測之後佢都會好快攞畀我哋簽名，但係前幾日佢份測驗卷就咁擺咗喺度乜嘢都冇同我哋講過我哋都知道有啲唔妥㗎，終於一睇份卷係佢前所未有咁低分，雖然都叫做合格但係真係未試過咁低分再望清楚份卷錯啲乜，基本上大部分都係唔小心嘅嘢， 阿女一聽到我哋講份卷啲眼淚都已經開始想流出嚟，其實我真係有啲嬲不過都真係又係要撳住把火冇鬧佢，然之後又係要逐題講同佢傾番，根本唔洗教其實佢全部都識做返， 我哋都冇鬧佢只係同佢講我哋覺得唔開心因為戥佢唔抵，明明佢可以攞到九十幾分但係攞到呢個成績。 其實我哋從來都冇要求過佢要攞幾多分我哋先至滿意，只不過每次都係提佢要盡力溫習， 如果係因為唔適而做錯我哋反而覺得冇問題，因為唔識咪學到識囉，但係明明識而因唔小心做錯咁先至係最唔抵。平時都有提佢㗎啦，都知佢做嘢唔小心都已經成日提住佢做完嘢要睇多次，就算而家佢平時畀功課我哋睇之前，我哋都要佢喺我哋面前再睇多次啲功課睇下自己有冇做錯，如果我哋發現啲唔小心嘅錯而佢自己冇睇返出嚟，我哋會要佢抄多次嗰條題目 咁樣做功課時嘅唔小心錯誤的確係少咗，因為佢唔想麻煩所以會小心咗。 但係有陣時小朋友真係要自己經歷過一啲失敗佢先至會認真面對諗方法去改善。阿女可能自細都覺得自己成績好對自己太有信心所以好多時反而變成唔小心，因為佢唔習慣做完嘢之後要覆多次尤其係測驗同默書之後，做親嘢都係諗住快快趣趣做完而且我平時有我同老婆幫佢檢查功課所以佢更加更加唔小心諗住快啲做完就算。所以好多時見到佢啲功課返嚟到要做改正我哋都話畀佢聽其實只要你小心啲係真係可以慳番好多時間唔使改正又。好似啱啱呢次默書咁，明明係讀默都可以聽漏啲字，我問佢老師默完之後有冇讀多次，佢話有咁咪又係冇小心聽清楚囉， 終於改正嘅份量就係默書內容嘅兩三倍咁濟。 但係我哋都唔會鬧佢囉只係每一次都提醒佢，希望佢從呢一啲嘅失敗經驗入面慢慢學會謹慎一啲同埋小心一啲，明明可以慳好多時間但係就用咗啲時間呢改正只要小心啲就可以慳返啲時間。又一次呀女雖然經歷失敗，但我哋喺側邊支持佢希望從中佢可以學習到一啲嘅經驗而慢慢改善，總比每次都鬧而唔提供方法可能嚟得更有效。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
