早幾日食晏晝同同事講開仔女經，講下講下就講開做運動嘅好處，原來大家都不約而同細細個就開始畀自己嘅仔女去學做運動。我哋都覺得小朋友細細個開始做運動除咗因為可以身體好啲之外，最重要係肯做運動嘅小朋友，我哋覺得會比較有毅力有恆心，亦都會容易啲面對困難同埋失敗，尤其是係一啲個人化嘅運動好似田徑游水咁。 因為凡親做運動其實係練習嘅時間都係好悶，好似田徑同埋游水咁，每次練習就要不停咁練一啲好刻板嘅動作，期間冇咩嘢人陪你傾計。好似我個女練游水咁，一落水就不停游，教練叫佢點游佢就要點游，冇時間傾偈。所以有陣時我去接阿女同阿仔游水放學嘅時候，都會同佢哋講我覺得佢哋好犀利因為練游水真係好悶。咁樣練法可以令到佢哋好有目標，因為每一次教練都係同佢哋講叫佢哋落水之後要游幾遠，咁佢哋就望住呢個目標去游。所以練習運動除咗令到自己身體好啲之外更加重要係真係令到佢哋嘅抗逆能力同毅力有所提升，紀律同服從性亦會提高。跟住我哋又講到究竟乜嘢時間俾小朋友開始學運動好？我哋都覺得愈細個愈好，因為根本呢個又係一個習慣。 小朋友愈細個開始就越容易成為習慣。因為趁佢哋細個基本上爸爸媽媽叫佢哋做乜嘢佢哋就會跟住做。當呢個習慣由細開始養成嘅時候，到佢哋越嚟越大個佢哋就唔會覺得要去練習係浪費時間或者唔鍾意因為自細就開始。另外，要養成習慣家長亦都要用一啲嘅方法，好似我從來都唔會逼阿仔阿女去參加比賽除非佢哋自己想，因為當嗰樣嘢變成被逼嘅時候佢哋嘅興趣就會越嚟越減少。另外除咗去練習之外家長亦都要用時間陪佢哋去玩陪佢哋一齊去練習。好似游水同羽毛球咁，除咗每個禮拜佢哋練習嗰日之外，我哋都會喺得閒嘅時候就陪佢哋去游水陪佢哋去玩。等佢哋知道游水同打波唔係淨係為咗練習或者比賽而係可以玩得好開心咁佢哋先至會有興趣繼續落去。其實小朋友只要自細開始養成咗呢個習慣，佢哋就會好願意咁繼續落去。當佢哋慢慢長大嘅時候，例如去到中學嘅時間可能會比較忙，佢哋就會揀佢哋鍾意嘅運動繼續練習。
我同同事都覺得有陣時小朋友養成唔到習慣反而有時係因為家長造成。好似我個同事講佢有個朋友，個女想學田徑 開頭開開心心咁俾佢學，但係練咗幾次之後佢就覺得夏天天練習好辛苦，練完返嚟好似病病哋咁就停咗冇再練。又話驚女仔玩田徑隻腳會變粗咁。好似我個仔有啲游水嘅同學。當到冬天嘅時候就會有啲小朋友唔去練，到夏天先至出現返。其實要養成習慣就要佢哋長期個個禮拜咁做，我對仔女剛剛開始學游水嘅時候，去到冬天都曾經問過天氣凍係咪都要，我哋話畀佢聽呢個係習慣就好似你食飯同埋做其他嘢一樣，你習慣咗就要做。咁自從嗰次之後無論幾多度佢哋都繼續游。試過香港最凍嘅時候啱啱撞正佢哋游水堂我哋都係繼續要佢上堂。其實有陣時係家長諗多咗，家長太過照顧太過保護啲小朋友，只要諗深一層要小朋友養成做運動呢個習慣嘅目的就係要佢哋克服困難就係要佢哋要有恆心要有毅力，如果家長過份保護反而削弱咗呢啲嘅效用，同埋當小朋友搵到藉口逃避嘅時候又點樣可以養成的習慣呢。所以家長喺小朋友細細個開始幫佢哋培養做運動的習慣，我覺得對小朋友將來嘅發展會有一個非常之重要嘅作用。不過千祈唔好諗住攞做運動嚟方便自己將來入名校，因為當你為咗呢啲目的，咁你不其然就會開始催谷個小朋友，而小朋友亦都會感覺到其實你叫佢做運動係有呢啲嘅目的都頭來可能效果反而會適得其反。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
