本帖最後由 csir3290 於 18-11-14 16:55 編輯
阿仔前幾日好唔開心，因為喺學校畀訓導老師鬧咗一場。嗰日喺公司做做吓嘢突然間老婆whatsapp我話阿仔喺屋企發緊脾氣好唔開心勁喊，佢開緊會所以冇時間打返屋企問乜嘢事。其實我當時喺公司都好忙有好多嘢要處理，但係都打電話返去問阿仔乜嘢事啦！阿仔一聽電話就已經喊得好緊要，根本我完全聽唔到佢講乜。工人姐姐又要趕住同埋佢一齊去接家姐，總之當時就好忙亂，又得工人姐姐一個睇住佢哋。最後阿仔都係喊住同埋工人姐姐一齊去接咗家姐，後來我再打俾佢哋，終於家姐都講到畀我聽發生乜事。原來因為 家姐嗰日要留喺學校練習，所以細佬要幫家姐攞書包，落嚟畀工人姐姐拎走先，點知畀訓導主任見到就鬧阿仔，因為佢學校規定唔畀學生由工人姐姐幫手拎書包，主任見到就以為係阿仔一放學就將個書包畀工人姐姐拎。阿仔本身都好驚老師，畀老師呢話嘅時候佢根本就解釋唔到，何況佢只係一個二年級嘅小朋友。阿仔阿女平時放學都一定係自己孭書包返屋企，但係因為嗰日佢哋要學游水家姐又要練習數學，所以細佬就會留喺學校自己做功課，工人姐姐就會幫佢兩個攞番書包返屋企先，到家姐夠鐘放先至上去再接家姐同埋細佬去游水。咁我聽完件事之後就同細佬講叫佢同家姐去游水先，我會打電話畀佢個老師同佢解釋。咁我跟住就打電話畀佢嘅訓導老師同佢講番件事，咁老師都同我講係一場誤會。我返到屋企，細佬冇再同我講呢件事，唔知係咪驚我哋會鬧佢。反而當我沖好曬涼慢慢坐低嘅時候先好輕描淡寫咁問細佬今日係咪好唔開心，佢就即刻攬埋我度爆喊，咁我就同佢講如果畀著我我都會好唔開心，因為咁樣畀人誤會。由於當時我冇話佢，亦都認同佢心入面嘅感受係啱嘅。所以佢跟住就滔滔不絕咁講番今日發生件事，講曬自己嘅感受。細佬話畀我聽佢當時好嬲但係佢冇出聲，因為佢覺得老師話錯佢。呢個時間我亦都讚賞佢覺得佢處理得好好，因為當時就算覺得自己幾啱都好都唔可以駁老師嘴亦都唔可以冇禮貌，因為如果當時唔控制自己嘅情緒同老師駁嘴嘅話，咁就會變成冇禮貌咁我亦都會好難同老師解釋，因為冇禮貌就一定係阿仔做錯。其實喺呢個時間只要認同佢嘅情緒，認同佢嘅感受，唔需要加任何批判嘅說話，阿仔就已經滔滔不絕咁將佢所有嘅感受抒發曬出嚟，將佢所有嘅唔開心感受講曬，將自己抑壓咗喺心入面嘅感覺講曬出嚟之後反而佢好快就冇事，跟住就開開心心咁同家姐繼續玩。
正如我之前講過，有陣時我哋的溝通出現問題就係因為我哋誤會咗對方嘅諗法，有陣時溝通唔係想知道自己啱定錯亦都唔係想聽道理，有陣時只係希望得到一啲感受上面嘅認同或者情緒上面嘅照顧。家長有陣時應該放低自己係家長嘅角色唔需要覺得講親嘢就係要教佢哋。每個人都有自己嘅感覺同埋感受，呢啲感受冇話啱或者錯。呢一個係當刻中佢哋實實在在嘅感受。如果佢哋呢刻嘅感受得人哋嘅認同佢哋就會覺得舒服一啲，亦都會容易將自己嘅感受講返出嚟，其實喺講嘅期間佢哋自己都會慢慢去組織返成件事，慢慢得到紓解。家長唔需要急於要即刻教佢哋，其實等佢哋慢慢冷靜落嚟，先至慢慢再同佢哋處理其他嘅嘢就會容易好多。仔女感受到家長嘅支持，亦都會更加願意同家長溝通。有陣時啲仔女之所以會覺得父母煩或者講極父母都唔明，其實好多時就係因為佢哋覺得我哋唔理解佢哋嘅感受唔體諒佢嘅感受，所以要打破呢個溝通嘅障礙，家長就要記住當仔女有情緒嘅時候要嘗試認同佢哋嘅感受，設身處地自己諗下當自己有情緒嘅時候都希望身邊嘅人唔係喺度牢牢騷騷，只係希望佢哋畀個膊頭挨下或者幾句支持嘅說話就夠。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
