少年成長今日: 0|主題: 16134

收藏本版

發帖

返回列表

跳至頁

查看: 18623 | 回覆: 15

換老師的風波 (對不起，超長文！) [複製鏈接]

csir3290

子爵府

積分: 12819

1^#

發表於 19-3-31 11:53 |只看該作者 |正序瀏覽 |打印

老婆為咗令阿仔阿女多啲講英文，所以每個星期都會請個外籍老師嚟屋企同阿仔阿女傾計，練習多啲講同聽英文。之前幫阿仔阿女補英文嘅澳洲老師阿仔阿女好鍾意，因為佢淨係同佢哋傾偈，所以阿仔阿女覺得冇乜壓力好鍾意同佢一齊上堂。但係之後因為佢要返澳洲而我要換老師。唔知係咪換咗老師之後，因為呢個老師收得貴好多所以佢覺得除咗傾計之外，要求仲高咗好多。阿女冇問題但係阿仔就覺得佢好嚴格，因為佢要阿仔個個禮拜都要溫習佢教過嘅嘢，而之前嗰位外籍老師因為淨係同佢傾計所以唔洗點温。

早幾日臨放工嘅時候老婆whatsapp我。佢同我講話個外籍老師同阿仔上緊堂突然間發脾氣好惡咁鬧阿仔之後仲冇同家姐上堂就走咗。我老婆話佢嚇到兩姊弟而家喺屋企度喊曬，我老婆即刻話要換老師。我老婆話其實佢一路都唔係好鍾意呢個外籍老師教英文嘅方法，因為佢覺得呢一位外籍老師其實識中文，所以佢會有成時用中文教阿仔阿女，要佢哋背生字同解釋。而且我工人講因為呢個老師其實嘅脾氣都幾大，有陣時講嘢都會好大聲同埋都幾惡，所以我老婆其實都諗過遲啲要玩轉，點知今次佢發曬脾氣，所以我老婆話要即刻換，我老婆WhatsApp問佢點解會發脾氣走咗去佢都冇同我老婆解釋。

過咗一陣個外籍老師喺 whatsapp度打咗段好長嘅文字覆咗我老婆，大致就係話佢唔想浪費時間同埋我哋嘅金錢，因為佢覺得阿仔唔溫習而且上堂嘅時候唔主動，所以進度好慢，用咗好多時間都未曾完成兩篇嘅文章，佢覺得咁樣係浪費咗大家嘅時間同埋我哋嘅金錢。我老婆睇完篇文章嘅時候仲好激氣，老婆同我講佢話根本就唔係要求外籍老師咁樣教阿仔，佢只係想個外籍老師係好似以前嗰位澳洲老師咁淨係同佢哋傾下偈等佢哋主動多啲講英文，唔係要佢哋背啲乜嘢生字同解釋。其實講真自從我老婆知道呢位外籍老師會用中文同佢哋解釋啲生字嘅時候，我老婆對呢位外籍老師嘅印像都已經唔係咁好㗎啦講過幾次話補埋今年就會轉。因為佢驚再繼續用咁嘅方法學英文會令呀仔怕咗英文。

我睇完位外籍老師嘅解釋之後，其實我都同我老婆講話講真其實阿仔都係有責任㗎，我老婆又冇同外籍老師講清楚其實佢嘅要求係點，咁個外籍老師自自然然就諗住收得你咁貴人工，就希望教多啲嘢畀阿仔而唔係淨係傾計咁簡單。當然老師發脾氣係唔啱，仲忽然走咗去就更加有問題。講真其實我覺得今次老師發脾氣阿仔都係有責任嘅。首先呀仔真係唔認真溫習，每一次都係老師嚟之前嗰晚先至叫媽媽幫佢溫吓啲生字背吓啲解釋。我老婆就成日話淨係背生字解釋而冇應用根本就冇作用，但係阿仔真係事實係冇溫習。當然我老婆已經咁嬲我當然要尊重佢換老師嘅決定啦。但係我都嘗試同我老婆講要畀阿仔明白其實件事佢係有責任嘅，唔可以令阿仔覺得因為佢唔鍾意個老師我哋就會幫佢換老師。更加唔可以等佢將來以為佢有啲咩唔鍾意都係人哋有問題，我哋做家長嘅就一定會幫曬佢。我哋要佢明白今次換老師決定係因為我哋覺得老師做咗一啲唔合適嘅反應就算點唔開心都唔應該發脾氣走咗去，咁樣係不負責任嘅行為。我哋換老師嘅原因係因為個老師唔負責任同埋亂發脾氣。

返到屋企入咗房我就問老婆有冇同阿仔講今次換老師嘅原因，阿仔知唔知自己有責，佢話阿仔冇答佢。咁我就趁老婆沖涼嘅時間就同阿仔坐埋一齊傾計，問佢知唔知道點解我哋要換老師，佢話因為老師發脾氣老師自己走咗去。咁我再問佢其實今次件事佢自己有冇責任。佢諗咗好耐之後答我有咁我問佢咁你有咩責任喇，佢諗咗好耐都冇答我。我同佢講你唔好以為我咁問你，你就估我想你答有責任所以就答我有責任。我要你知道究竟自己有乜嘢責任。慢慢同佢傾咗一輪佢都答到我就係自己唔夠認真同埋冇溫習。順便喺度我都同佢講埋就係因為佢平時唔夠主動，好少自己攞啲英文故事書睇。我解釋畀佢聽今次換老師唔係因為佢對你嚴格或者要求高，你唔鍾意我哋就換老師，而係因為今次老師做咗啲唔負責任嘅行為所以我哋先至換。我同佢講當伛一路長大嘅時間入面都會遇到唔同嘅人，有啲人會對佢嚴格啲，有啲人冇會對佢冇咁嚴格，但係最重要嘅就係要做好自己嘅本份。只有緊張你嘅人先至會對你有要求。

講真我唔係完全同意換老師呢個決定。但既然老婆決定咗我當然要尊重佢啦，我好明白喺教仔女上面兩公婆一定要意見一致，就算有分歧嘅時間兩個大人都應該自己私底下好好處理而唔好將呢啲分歧擺喺仔女面前，咁樣對仔女嘅成長發展影響係非常之大。所以老婆話咗要換就換，但係更加重要嘅就係之後要同阿仔善後，要令到阿仔知道自己嘅責任，將事件嘅影響減到最低。