上兩個星期阿女終於嘗試佢人生第一次離開爸爸媽媽嘅身邊自己跟學校去宿營， 雖然只係三日兩夜咁短但係我發覺其實我哋都好唔捨得同掛著。亦都好唔習慣呀女唔喺身邊，細佬就成日都會問住唔知家姐而家做緊乜嘢，我就唔慣夜晚臨瞓嘅時候家姐唔喺佢張床上面，咪淨係可以同細佬講goodnight，去佢哋房幫佢哋冚被嘅時候淨係得細佬喺度。
家姐第一日出發嗰日，我放工返到屋企照常咁喺樓下信箱度攞信，竟然發現到一封接到心型嘅信，心諗唔係仲有人寫情信畀我呀嘛。原來睇清楚係家姐臨出發寫咗封信畀我同老婆出門口嘅時候放咗入信箱入面。返去同老婆講我老婆話原來學校叫佢哋寫畀家長嘅，因為好多家長喺群組入面都講話啲細路將封信放咗喺枕頭底，所以我老婆一番到屋企都即刻睇下枕頭底有冇，我老婆仲以為阿女冇寫，點知原來佢咁叻放咗入我哋個信箱度。我哋睇咗阿女封信，我老婆睇到有啲眼濕濕添，因為阿女都寫咗成兩張紙，入面寫咗好多嘢，估唔到阿女平時把口唔係好講自己嘅感受，但係寫起信上嚟可以咁有感情重寫得有紋有路添。
以前都曾經同自己講過希望阿女每年生日嘅時候都寫一封信畀佢，但係都係得個諗字，終於都無實行到。今次因為阿女寫咗呢封信，所以我決定回信畀佢。而且喺佢去宿營嘅第一晚我就即刻揸起支筆回信畀佢。開頭其實都唔知寫咩好，但係原來到一拎起支筆開始寫啲諗法就已經源源不絕喺個腦度湧出嚟，都唔使半個鐘已經寫咗兩版紙。原來好多平時 未必會用口講嘅說話揸起支筆係可以好暢快咁樣寫曬出嚟，當中寫咗好多對阿女嘅期望亦都寫咗好多日常同阿女相處嘅感受。 寫完之後我就將封信擺咗喺佢枕頭底等阿女返嚟自己睇。呢個純粹係我同阿女之間嘅對話所以連我老婆都唔知我回咗封信畀阿女。
記得以前後生仲追緊老婆嘅時候都仲有間中寫吓情信畀佢。雖然唔多但係都叫做寫過下，仲以為已經唔記得咗點樣寫呢啲咁有感情嘅信。唔怪得知啲人話女女係爸爸嘅前世情人啦！下星期就到我要去一年一次嘅外地公幹，我而家都諗緊，希望臨出發之前我有時間寫多封信畀阿女，一於唔好得個諗字今晚就開始真係支筆寫啦！希望繼續維持住呢個習慣，跟住到呀仔生日嘅時候可以寫埋俾呀仔！
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
