前幾人日去咗一個禮拜公幹，之前講過希望能去公幹之前可以寫封信畀家姐，臨飛前兩晚終於的起心肝寫咗封信畀家姐，寫完封信出發嗰朝佢未起身我就擺咗喺佢個枕頭邊，錫咗佢一啖跟住就出門口。
嗰日下晝佢放咗學即刻send咗封email畀我話睇到我封信好開心。佢兩姊弟啱啱學識寫email，所以今次我去公幹，咁哋就成日就send email畀我。 佢兩個啲電郵仲多過我每日工作要睇嘅電郵。通常朝早就問我瞓得好唔好，間酒店舒唔舒服咁，一係就問我食咗飯未又或者而家喺邊度之類嘅問題，有陣時又會叫我send啲相畀佢哋睇。總之就好似傾閒偈咁，但係佢兩個都會喺封email度講我愛你或者掛住你之類嘅說話搞到我心都甜埋。見佢哋咁有心所以我通常都會即刻覆佢哋啲電郵，唔知係咪因為我覆得夠快，所以佢哋又寫得越密。
雖然我同阿仔阿女每日都會見面，平時佢兩個都有好多偈同我傾，但係原來我發覺間唔中寫下信寫下電郵又係一啲另類表達自己感受嘅方式。好似我個女咁我都提過佢唔係好善於表達自己嘅感受，但係透個寫信佢就會好容易表達自己內心嘅感受。我相信好多小朋友細個嘅時候老師都會教過佢哋寫信畀爸爸媽媽，好似我對仔女由幼稚園開始就老師已經教佢哋喺爸爸媽媽生日或者係父親節母親節嘅時候或張卡畀我哋。但係當佢哋越嚟越大個嘅時候就好似越嚟越少做呢樣嘢。我而家諗吓其實可能係因為得唔到大人嘅回應所以就變成好似冇人鼓勵佢哋繼續咁樣做咁。其實透過大家互相寫信，除咗可以增加彼此嘅感情之外，仲可以係一個好好嘅方法去解決一啲面對面講可能解決唔到嘅問題。
我哋唔需要擔心冇嘢寫，因為經驗話俾我聽原來只要你一揸起支筆開始寫嘅時候，腦入面嘅嘢就會源源不絕咁湧出嚟，只會越寫越多唔怕冇嘢寫只怕收唔到筆。有陣時大家面對面講去處理問題嘅時候可能大家都為咗面子落唔到台，但係透過寫信或者電郵，當大家唔係面對面嘅時候可能又會多啲考慮多啲唔同嘅諗法。如果仔女冇呢個習慣，父母可以試下由自己開始，雖然未必一開始就有回應，但係試得幾次可能仔女都會試下用呢個方法同父母溝通。就算唔寫信我都強烈建議其實家長可以試吓由寫字條開始，可能好多溝通嘅問題可以慢慢解決。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
