前兩日兩姊弟喺屋企玩，開頭玩得好好哋，點知兩個玩玩吓就喐手喐腳， 開頭佢兩個真係玩㗎，但係之後就開始整痛到對方，我見到家姐攞隻腳踩住細佬隻腳，細佬痛就跟住用手搣家姐隻腳，家姐當堂喊因為搣損咗少少。細佬見到家姐喊當堂好驚會畀人鬧，家姐就梗係想我哋幫佢主持公道鬧返細佬啦。
呢個時間主持公道真係好緊要，如果做家長成日都唔理，覺得佢哋係小朋友郁手郁腳係小問題嘅話，日積月累其實會破壞佢哋兩姊弟嘅感情，亦都會令佢哋錯誤以為動手或者惡就可以解決問題。但係要主持公道或者介入解決其實又唔係咁易，因為好多時我哋都會好直接覺得喊嗰個就係受害者，好似佢兩姊弟咁其實好多時都係家姐喊先。但係公道嘅意思就係要盡量知道件事嘅前因後果，唔好令佢哋覺得有委屈，等佢哋知道家長係講道理唔係喊嗰個就一定係受害者。好似今次咁其實明明係家姐用腳踩細佬先細佬覺得痛然之後先至整返家姐。如果只係因為家姐喊就覺得係細佬錯曬而只係要細佬道歉或者只係罰細佬嘅話，細佬可能會覺得我哋偏幫家姐到頭來其實都係影響佢兩個嘅關係。今次我哋先安慰咗家姐平復咗佢嘅情緒然之後就同佢講其實我哋知道係因為佢踩細佬先至會發生呢件事，件是由佢而起所以我哋要佢先同細佬道咗歉先，咁細佬聽到我哋對件事嘅了解嘅時候佢都鬆咗一口氣，跟住佢都自願同家姐道歉知道自己搣人嘅時候搣得過份咗。順便再提醒佢剪指甲嘅重要，因為指甲長除咗污糟之外仲會好容易喺玩嘅時候整傷人。
其實我覺得家長面對小朋友呢啲爭拗嘅時候，最重要唔只係要立即幫佢哋主持公道，要邊個道歉要邊個被罰，更最重要嘅係幫佢哋和解。只有和解先至唔會令到佢哋嘅唔開心累積喺心入面，當嗰啲唔開心喺心入面越積越多就會開始唔鍾意對方影響咗大家嘅感情。所以我覺得件事到最後和解係重要過邊一個係受害者邊一個要被罰。要鬧要罰或者要佢哋道歉其實好容易，但佢哋係咪真係服呢？要佢哋和解先真係要技巧就真係要付出時間了解件事，亦都要知道佢哋心中嘅唔開心 先至可以幫佢哋和解。細細個幫佢哋學識和解，學識互相原諒到大個佢哋化慢慢知道點樣去處理問題， 唔會將啲唔開心嘅嘢放喺個心入面。所以我成日提醒自己唔好見到邊個喊就以為邊個係受害者，一定要畀兩個小朋友講出心中唔開心嘅地方然之後幫佢兩個和解。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
