少年成長今日: 0|主題: 16112

收藏本版

發帖

返回列表

跳至頁

查看: 5297 | 回覆: 3

讓步 [複製鏈接]

csir3290

子爵府

積分: 12600

1^#

發表於 19-11-24 11:50 |只看該作者 |正序瀏覽 |打印

講起合奏本來佢兩姊弟每晚練畀我哋聽都練得好好地，仲彈得幾好添。點知前兩晚佢哋開始練習之前我老婆就叫家姐自己數拍子開始，因為每晚練習都係我哋幫佢哋數拍子，即係好簡單數一二三四開始。咁我老婆可能諗住啲咁簡單嘅開始方法就想佢哋自己數，成首歌自己做曬所有嘢。但係唔知點解佢兩姊弟忽然好大反應，家姐死都唔肯開始數，咁我諗住叫細佬自己數啦，點知細佬又唔肯，兩個就企咗喺個琴面前係都要我同老婆幫佢數。其實真係唔知點解忽然佢兩個咁大反應點都唔肯開始自己數。叫得兩三次開始，我自己都有少少忟忟哋，佢兩個都仲係唔肯開始。終於我自己都有少少發脾氣發晦氣咁同佢哋講咁唔好練瞓覺啦。佢兩個即刻自己走返上自己張床度。其實我係有少少嬲㗎，因為呢個咁簡單嘅練習佢哋自己都唔肯自己開始。

其實嗰晚我都有自己諗第二日應該點，係繼續堅持要佢哋練畀我哋聽，要佢哋道歉定係當冇事呢？其實我真係唔係好明點解佢哋會唔肯自己開始。到咗第二日佢哋見到我可能驚我都仲有啲嬲，所以好似唔係好敢同我講嘢。但係其實我諗過唔好為咁少嘅事搞到大家唔開心，佢哋唔肯開始總係有啲原因，迫亦都係冇用。所以調返轉係我好似冇事一樣同佢哋傾偈講嘢。咁佢哋見到我冇嘢又好主動咁行返埋嚟我度同我一齊玩同埋傾偈，佢哋溫完習我哋睇完曬佢哋啲功課之後，我就好輕描淡寫咁同佢兩姊弟講叫佢哋自己入房練琴彈返嗰首歌畀我哋聽，不過我同老婆就唔入房聽要佢哋彈到我哋喺廳都聽到。唔知點解佢兩個自己喺房彈又真係自己開始仲彈得幾好聽添。到佢哋出嚟我哋都冇問佢哋點解可以自己開始，總之個重點就係佢哋自己練到。

之後我自己諗如果我哋真係堅持一定要佢哋喺我哋面前做到畀我哋睇。可能個矛盾只會繼續而佢哋只係堅持唔做。其實唔知道點解佢哋唔肯做畀我哋睇，可能驚尷尬又可能驚錯，但係當我哋冇坐喺佢哋身邊嘅時候佢哋就自己做到。呢件事再一次話畀我哋聽，其實有啲嘢真係無謂堅持放都唔需要堅持，就算到最後佢哋真係唔肯自己做，要我同老婆幫佢哋數。咁我哋嘅目的都係想佢哋練到首歌，佢哋都係會練得到，反而轉下方法唔好堅持自己嘅諗法，有陣時做家長都需要妥協同埋讓步可能件事反而會好輕鬆咁解決咗。