最近我老婆忽然間重視咗做運動，除咗打羽毛球仲多咗去散步，仲戴埋運動手環即係嗰啲可以計住你嘅運動量同每日嘅步數嗰種嘅手環。老婆帶個啲手環就好似襯衫咁最近又買多咗隻，所以就將佢用開嗰隻畀咗家姐，其實我哋戴嘅時候佢兩姊弟都已經成日好好奇想攞嚟戴，有陣時仲要帶住嚟幫我哋累積啲步數。咁而家家姐自己有，佢好在意咁日日帶住佢連瞓覺都唔除，佢話因為咁樣可以偵測到佢嘅睡眠質素喎！佢好有興趣日日都睇下自己瞓咗幾多個鐘頭有幾個鐘頭係深層睡眠同淺層睡眠。呢輪見住家姐帶咗個手環之後雖然唔係成日出街，但係佢喺屋企度都成日自己喺度fing手fing腳做運動，佢話咁樣可以增加佢嘅運動量同埋步數。佢嘅手環連住手機嘅apps當佢達到一定嘅標準就會有啲獎章獎勵佢喺個apps度記錄。佢間唔中就會好開心咁同我哋講今日又攞到啲咩獎章行咗幾多步。雖然係虛擬嘅，但都見到佢好開心成日同我哋講。就係因為呢啲獎章制度令到佢非常在意，有陣時就算連坐喺度佢都Fing住隻手。我問佢你咁樣唔係做緊運動喎，咪好似呃緊部機咁，點知佢話喺度fing緊手隻手都好攰 ，所以都算係做運動喎！真係畀佢激死。
望住佢咁，其實我就更加明白小朋友學嘢嘅推動力喺邊度。其實點解小朋友哋咁鍾意打機，原因咪就係成功感，好容易達成佢哋嘅目標，亦都好快會有回饋同埋刺激。呢啲咁快有嘅回饋同刺激就會令到個細路仔更加願意放時間落去去追尋呢種成功感同埋歡愉。我個女雖然唔係好打機，但係帶住呢隻運動手環佢就好似上咗癮一樣，好擺心機同時間落去。其實佢哋追尋嘅唔係啲好實質嘅嘢只不過係啲虛擬嘅獎章。我哋大人有時真係好難明白點解細路仔咁鍾意打機，但係若然我哋由呢個方向去諗，我哋就會明白多啲佢哋點解咁鍾意打機。可能我哋成日都講點解啲細路仔打機咁叻但係讀書又唔見咁叻，其中一個原因可能就係因為讀書呢個目標要做得好要長時間同埋好遙遠，但係打機佢就不停收到回饋，不停有刺激亦都好快見到成果。所以見到阿女咁就更加令我相信要幫細路仔定目標唔可以定得咁遠。一個大目標要將佢拆細到好多好細嘅目標同埋好短期嘅目標。我唔係話成日要佢達到啲乜嘢目標就要獎啲乜嘢獎品俾佢哋。反而愈細個嘅細路就越重視父母嘅讚賞同認同，短期目標達成可以係父母嘅讚賞，就好似佢哋啲虛擬獎章一樣，唔係啲乜嘢實質嘢但係就係一個鼓勵，證明自己可以成功。家長成日都會講如果今次考試考得好就點樣點樣獎勵，有啲家長又會講要求已經唔係好高只係需要佢哋有進步，但係都唔知點解好難達成。其實諗深一層因為呢啲都係一啲好長遠嘅目標，但係要達到呢啲長遠嘅目標其實係需要慢慢好細步好細步咁去累積細目標嘅成功先至可以達成。只有細路仔不停相信自己能夠達致目標相信自己有能力達成，佢哋先至會繼續願意去做。目標可以細到今日溫默書只係成功溫熟幾個字。做得到，第日又可以温多幾個字，細路仔只有不停覺得自己能夠達成目標先至可以建立自信先至可以慢慢累積達成更遠大嘅目標。
家姐呢隻運動手環 除咗令家姐多咗做運動之外，亦都令到本來唔係好做運動嘅我老婆其實都樂意做多咗運動。講嚟講去個原理都係達成目標。講到最尾細路仔學習或者做乜都好 要成功就要幫佢哋建立自信同埋不停畀成功感佢哋。一個冇成功感嘅小朋友係好難達成任何目標。家長要做嘅就係幫佢建立呢份自信同成功感。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
