少年成長今日: 0|主題: 16113

收藏本版

發帖

返回列表

跳至頁

查看: 5160 | 回覆: 0

可唔可以考完試先停課？ [複製鏈接]

csir3290

子爵府

積分: 12623

1^#

發表於 20-11-29 13:57 |只看該作者 |正序瀏覽 |打印

呢幾日睇新聞越嚟越多人受感染，最怕嘅就係聽到開始又話要研究停課。阿仔阿女先至啱啱開咗學兩個月，到而家又話開始要諗停課，雖然暫時未停到阿仔阿女嘅年級，但係如果情況再壞落去最終可能都係又要全港停課，呢個真係最唔想發生嘅事。因為同上次情況一樣，阿女啱啱開始預備考試，但係佢哋學校就啱啱宣布因為上呼吸道感染要停課一星期，咁阿仔阿女嘅考試又要延遲多一個禮拜，求神拜佛都千祈唔好再延遲。諗起舊年嘅慘痛經歷，一路幫佢哋溫書但係就因為停課個考試就一路延期，到最後要攪到九月復課，阿女先至考咗佢第一次嘅呈分試，阿仔仲直情試都冇考過變成評估就算數。最慘就係個是一路未考就一路都要佢哋溫書，其實溫下溫下佢哋都會溫習疲勞，因為溫咗又未考溫咗又未考。到9月尾復咗課諗住都平平穩穩等阿女原定十一月尾就話考第二次呈分試，阿女都知道緊要，所以都一早開始溫習，但係忽然又話停課一星期，跟住而家又話疫情嚴峻要研究全港停課，真係諗起都擔心，如果又係咁不停延期，但係又唔敢唔溫習，真係越溫越悶諗起都覺得辛苦。所以求神拜佛都千祈唔好再停課又或者起碼等佢哋考埋個試先至停，但係偏偏阿仔阿女間學校又好似唔係好知啲家長擔心咁，次次就算復課都唔係即刻考試等大家安安樂樂，好似今次因上呼吸道感染停課咁，停完復課又話要畀多啲時間學生準備，所以又等多個禮拜先至考。其實佢知唔知家長心急希望快快趣趣考咗佢，起碼就算停課都唔使擔心影響考試先。

講起停課同埋疫情嚴峻，其實有陣時真係唔明白啲人點諗，好似琴日成家人去體育館打羽毛球，我哋由頭到尾都帶住個口罩，除咗真真正正喺個場打波嗰一個鐘頭之外，連入更衣室都帶住個口罩。但係我同阿仔入咗更衣室就見到入面嗰啲人個個都除曬口罩喺度換衫，其實我都明帶住個口罩換衫係有啲麻煩，係真係有時要除一除先至可以換到，但係更衣室入面我哋見到大部分人都係由頭到尾都除咗個口罩，有啲仲喺度呻鼻水。唔好話喺更衣室入面，有陣時你見到啲人喺街其實真係幾冇公德心，政府都已經呼籲唔好去啲人多聚集嘅地方，有啲仲要唔戴口罩，連喺巴士度都係咁除咗個口罩食嘢。自私嘅人真係冇得教，殺到埋身都好似唔關佢哋事咁，見到啲人係咁，除咗教自己對仔女做人唔可以自私之外，唯有自己一家盡量小心。希望疫情快啲過去，大家健健康康唔好再停課就好啦。