少年成長今日: 0|主題: 16108

收藏本版

發帖

返回列表

跳至頁

查看: 16879 | 回覆: 5

主動傾聽 [複製鏈接]

csir3290

子爵府

積分: 12556

1^#

發表於 21-11-21 10:50 |只看該作者 |正序瀏覽 |打印

上次講到青少年自殺問題，其中講過其實青少年人好想搵人同佢哋傾嘅時候搵唔到合適又可信嘅人又搵唔到其他出路，所以先至會踏上自毀。

我總係覺得其實家長應該最懂得聆聽自己嘅仔女亦都最了解自己嘅仔女，但係偏偏到問題發生嘅時候，最後知道嘅竟然又係家長。唔知點解做家長嘅，可能喺工作上面好識得同人哋溝通，但係偏偏返到屋企遇到自己最親嘅人就唔知點樣同佢哋溝通。可能喺中國人家庭成長嘅細路仔一般都係喺權威之下成長有關。威權式管治即係只係著重仔女係咪聽話聽教，只係著重單向即係我係家長你就要聽我講。從小就缺乏咗溝通嘅訓練，所以到細路仔大咗，到自己做父母嘅時候，好多時都係繼續呢種模式一次又一次嘅循環。

我成日都講好多時啲家長以為溝通就只不過係問問題，只要仔女答咗就叫做溝通咗。到有問題發生嘅時候就會怪責啲仔女點解乜都唔同自己講。但係啲仔女又會話因為家長從來都冇用心去聽過佢哋講嘢。家長就會話唔係吖，我成日都係聽佢哋講嘢不過佢哋唔講咋嘛。呢個好似係一個永遠都解決唔到嘅矛盾。但係好多家長其實忽略咗自己嘅溝通方法，尤其係忽略咗青少年人佢哋同我哋傾偈未必係想搵到一個答案，好多時只不過係想人了解佢哋嘅感受，給予支持同埋體諒甚至乎係安慰。但係一牽涉到感情偏偏就係中國人父母最弱嘅地方。

中國人父母最唔懂得嘅就係主動傾聽。乜嘢係主動傾聽？就係唔帶批判留心去聽對方所講嘅說話畀出反應，當對方感覺到真係有人願意用心去聆聽佢哋嘅說話，去了解佢哋感受嘅時候，佢哋先至會願意繼續去溝通。但係好多時做父母嘅就有千百種原因去拒絕聆聽，例如覺得佢哋講嘅說話無聊，覺得佢哋講嘅說話無關重要，覺得佢哋諗多咗甚或至乎家長根本就覺得嘥時間唔想傾。家長只係在意佢哋自己想知嘅問題嘅答案，其他嘢佢哋都覺得係小事，但係呢一啲嘅忽略，往往就造成我哋嘅仔女越嚟越唔想同我哋傾偈。

所以作為家長，我覺得第一樣要學嘅就係學聽人講嘢，不論係仔女又好，甚至乎係自己嘅配偶都好，首先要學習聆聽，千祈唔好只係加咗自己嘅諗法或者加咗自己嘅批判落去就打斷人哋講嘅嘢。只有當對方感覺到同你傾偈係舒服嘅時候，先至會再繼續同你傾落去。但係家長好多時一開始係聽，但係慢慢就變成批判甚至乎要對方接受自己嘅諗法，咁係最錯最錯嘅做法。每個人都有自己嘅感受同埋對事情嘅睇法，根本就未必一定只有啱同埋錯，更加唔會只有自己嘅諗法先至係啱，所以做家長嘅先學下聽對方嘅感覺，回應嘅時候唔需要係啱或者錯，可以係一啲重複對方感受嘅說話，例如「你一定係好唔開心！」，「事情一定係好困擾你！」之類重複佢感受嘅說話，其實當講說話嘅人感受到聆聽一方嘅支持同埋認同，佢可能就會慢慢越講越多，其實透過講嘅時候可能佢自己都搵到解決問題嘅方法。所以家長就算幾忙都好，當我哋嘅仔女想同我哋傾計嘅時候，都應該嘗試搵時間去盡量聆聽仔女同我哋講嘅嘢，如果發覺仔女只不過係想同我哋傾偈，講下佢嘅感受嘅時候，就盡量唔好加自己嘅意見同埋批判，亦都唔需要強迫佢哋接受我哋嘅諗法，做一個懂得聆聽嘅家長。有啲家長可能會覺得聽人講嘢有乜咁難啫。其實聽人講嘢真係唔難，但係要聽人講嘢唔加自己嘅意見，只係了解同埋支持其實真係好難。大家可以試下回想一吓喺自己屋企入面，其實有幾多時間真正係去聆聽自己仔女或者配偶嘅說話呢。對於青少年人嚟講，最好嘅父母應該係最懂得聆聽佢哋嘅說話，懂得係適當嘅時候給予支持同體諒，能夠成為仔女心目中心靈上最強大嘅支持同埋後盾嘅，先至係青少年心目中最好嘅家長。