本帖最後由 happyfamily224 於 22-2-5 00:07 編輯
我想分享同奶奶由關係要好，直至心病嚴重，無法挽救既過程。
我同老公相識至拍拖約4年至結婚，大家都係來自公屋家庭，父母都唔係有錢人。由於我老公在識我之前，一直未拍過拖，所以當初佢帶我去見佢屋企食飯見父母時，佢父母，亦即係我現在的老爺奶奶都歡天喜地，覺得個仔終於識到女仔。奶奶對我十分客氣，食完又唔駛我幫手洗碗。仲記得結婚當日，佢笑到見牙唔見眼，個仔終於可以聚老婆，有新抱茶飲，真係開心到全日四萬咁既口。
奶奶在我心目中，係一個健談，成日笑，好開心既老人家。在婚後，約一年我就有咗第一胎，仲記得產假時，奶奶已經為咗湊孫而提早退休，仲日日陪住我，有時會同佢兩個人去飲茶，大家都好好傾，覺得奶奶咩嘢都識，見識廣博。我坐月時，又煲米水，又炒薑飯，又煲魚湯，又燉鹿茸，比我媽還用心照顧我。
有老爺奶奶過嚟幫手湊小朋友，所以冇請過工人。三年抱兩後，開始從老公口中聽到奶奶既怨言。奶奶會覺得我好多嘢做得唔好，例如餵梗個細食人奶，唔理個大既。只係湊小朋友，唔識做家務。可能我冇佢想像中傳統婦女三重四德既完美新抱特質，亦係在職媽媽既關係，無論點都做唔到奶奶心目中既好新抱。小朋友細個還好，因為仲未識駁咀。但佢哋開始大個，而家兩個都高小喇！有自己思想同意見，日日就係見奶奶唔係鬧佢哋呢樣就係果樣，而小朋友又會反駁，變得好嘈好嘈。對於一個享往寧靜既我，在這農曆新年長假期放假時，奶奶不用過來幫手，特別覺得寧靜舒適。
我諗大概識咗我奶奶五六年開始，已發現原來奶奶經常會將一啲明明自己唔識既事，講到好認識咁！仲會用好堅定既語氣，好多次都誤會咗以為佢真係知，但最終先發現原來佢係順口開河，亂噏當秘笈。唔識扮識！十分善長吹水認叻。有時老公同姑奶窒佢一窒，佢就會回應「即係咁講啫」。我亦發現佢交際應酬真係有一手，我在屋苑唔太識人，但佢可以響短時間內已經可以識咗好多三姑六婆，亦同啲保安員好熟。
由於日頭小朋友對住奶奶既時間都頗長，所以發生過咩事都會與我分享。早兩年開始，小朋友話我知奶奶經常同啲街坊、保安員講好多人壞話，當中包括有爺爺和我的，我的佔大部分。每次我都會教導小朋友，嫲嫲咁大年紀，如果佢覺得講咗開心舒服，由他吧！小朋友都好乖亦懂事，會戥我唔開心，但我都會放輕鬆心情面對。奶奶生日、母親節，禮物同蛋糕一定唔少得。生活中，有咩coupon或者積分都會送俾奶奶，希望可以透過生活上既細節，令奶奶慢慢減少對我既不滿。我亦會安排佢同我哋一齊去小朋友學校既親子旅行，所以在朋友眼中，呢位奶奶都唔錯呀！但有次從其他家長口中，得知奶奶好鍾意講是非，我哋都係斯文同有文化既人，家長冇特別講是非內容，只係同我講咗句：「你奶奶講嘢真係好難聽」。從奶奶平時行為，我估計到應該都係破口大駡我之類既說話啦！
老爺奶奶都係粗人，說話當中會包含好多粗言穢語。在湊小朋友時比較多，在我和老公放工回來後會收斂一啲！但有時講起嘢上嚟情緒一激動，例如政治話題，一定會加好多助語詞。可能大家會擔心小朋友成日對住佢哋講咁多粗口，咪會有樣學樣？我初時都有呢個擔心，唯有多啲教導佢哋聽就好喇！唔好學爺爺嫲嫲咁講粗口。好彩佢哋都係聽教既，冇有樣學樣。
我生於既家庭，父母同兄弟姊妹都唔講粗口，所以對於別人向我講粗口特別覺得反感。仲記得同老公結婚半年後，因為一啲小時，佢發脾氣仲向我爆埋粗，我嬲到帶埋隻狗返娘家住咗成個禮拜，佢氹返我之後，自此冇試過再用粗口鬧我。
半年前，小朋友同我講奶奶響啲三姑六婆面前講晒粗口鬧我，鬧我「痴X線」、「卜X」、「戇Ｘ九」......我唔知做錯咗咩？都算喇！但佢仲要「X埋我老母」，連我阿媽都鬧埋，我真係好嬲。我同我父母講番，佢哋都話有冇搞錯呀！嬲到佢再同我講啲咩，我都只係以「哦、唔、係咩？唔知呀！」來敷衍回應。我奶奶把口唔講嘢好似會好唔舒服咁，有時放工返到嚟攰想靜靜哋食餐飯，佢係會不停撩你講嘢。有樣嘢我忘記咗講，奶奶在我面前從來唔會表現任何不滿，仲對我好好咁，但在背後就不斷講壞話，惡化至現狀加埋粗口。同啲朋友呻既時候，佢哋都好愕然，因為我好少會同人講奶奶既唔好，就算係老公，都係最近因為我忍唔住先向佢告狀。
上星期小朋友同我講咗件事，令我更加之嬲。奶奶話「xyz$#&@%(%)#叫你哋老豆娶過個仲好呀！」
曾經，我會認為唔會有婆媳糾紛。我平時唔係待佢唔好丫！真係唔知點解會令佢咁唔順眼，可能係人夾人緣，同佢夾唔到啦！
由於奶奶實在令我太反感既關係，前排我生日，為咗唔想慶祝仲要對住佢，所以安排咗早幾日前切蛋糕，一家四口慶祝，感覺好開心！每逢長假期同禮拜六、日聽唔到佢把聲，心情特別舒暢。平心而論，我真係好感謝佢幫我湊小朋友，亦都每晚煮飯同洗埋碗先返屋企，照顧得我哋好好。但係奶奶性格上，把口唔收，真係好難接受得到。曾經想過第時奶奶病又好、要住老人院又好，我都會好好照顧返佢。但係現在，我唔會了。日後既母親節，或者佢生日，我都唔會再預備啲咩喇！灰心到極點！我既分享係咁多，多謝收看。
懷孕
健康
煮意
遊樂
熱話
學校
管教
移民升學
理財
潮流
使用意見
故障報告
下載APP
關注我們
發表於 
返回列表
