少年成長今日: 0|主題: 16108

收藏本版

發帖

返回列表

跳至頁

查看: 13688 | 回覆: 0

香港乜乜達人問答比賽 [複製鏈接]

csir3290

子爵府

積分: 12552

1^#

發表於 22-3-27 11:08 |只看該作者 |正序瀏覽 |打印

唔知大家有冇玩近排好流行嘅網上問答遊戲「香港地理達人問答比賽」，而家已經發展到有不同範疇嘅比賽都有。嗰日我老婆將條link傳咗畀我哋，咁我哋夜晚全家就喺度鬥高分，細佬當然知道唔會夠我地高分，但係佢見到我哋玩得咁有興趣佢又好有興趣參與。其實嗰個比賽都幾長，有啲題目仲好深添，如果就咁玩唔查資料都玩咗差唔多半個鐘頭先至玩完。其實呢啲問答比賽都幾得意，全家人一齊玩然之後鬥吓高分講吓笑咁又玩咗個幾兩個鐘。但係我想講嘅係細佬。佢就採用另外一個策略，因為其實好多題目佢都唔識，但係佢又好有興趣參與，因為我哋全部人都好似玩得好開心好多話題咁，佢終於嗰晚攞住部手機開住個google map參與曬成個比賽。我哋大人都用咗差唔多半個鐘有多先至玩完，佢嗰晚咁樣搵資料，一路參加比賽足足玩咗差不多三個鐘，玩到成十一點幾先至玩完。我哋全家都好讚嘆佢嘅恆心，亦都好欣賞佢嗰個求真嘅精神。本來可能仲要耐啲時間，但係後來我老婆見到佢咁有心，都坐埋佢側邊同佢一齊搵。其實個重點係細路仔知道手機唔係淨係攞嚟娛樂，亦都可以係一個揾資料同學習嘅工具。嗰晚我個仔就完美示範點樣用手機去搵資料，然之後達成佢自己嘅目標。其實我哋畀手機細路仔，到最後都係希望佢將手機作為一個工具而唔係淨係攞嚟娛樂。但係要做到咁其實家長嘅示範作用亦都好緊要，如果家長都淨係喺仔女面前不停玩手機，其實仔女都只係有樣學樣。另外家長千祈唔好有個心態就係覺得畀部手機個仔女係令到佢唔好煩自己，因為如果目的係咁，小朋友一攞到部手機，家長一達成目標就唔會關注細路仔玩手機玩幾耐，亦唔會關注究竟佢揸住部手機做乜。好多時細路仔搣唔甩部手機嘅原因最初都係由家長造成。

我同老婆都知道一定唔可以喺細路仔面前攞部手機嚟玩遊戲，我哋會喺仔女面前睇手機，有陣時都會搵一啲有興趣嘅資料同埋視頻去睇，所以我對仔女而家都會喺youtube上面搵佢哋自己鍾意睇嘅嘢，但係因為我同老婆從來都唔會機不離手，我哋對仔女亦都知道我哋唔鍾意，所以佢哋就算睇自己鍾意嘅嘢都會好有分寸。更重要係一定唔會喺佢哋面前玩遊戲，更加當我哋遇到唔識嘅嘢時候，我哋做都要做畀仔女睇我哋係會用部手機同佢哋一齊搵答案。

其實我都鍾意玩遊戲機，但係我一定會同仔女一齊玩，其實係家姐五年班之前我可以話絕少會玩遊戲機。直至到家姐上咗五年班我先至開始同佢哋兩個一齊慢慢玩返啲電視遊戲，因為覺得佢哋已經大致有一個合適嘅生活規律。而我亦覺得電視遊戲可以成為同佢哋溝通嘅媒介。所以就開始重拾返部遊戲機，不過開始嘅時候又係一定要有好好嘅預備，包括一定係同仔女一齊玩，第二要揀一個合適嘅時間去玩，第三亦都要玩得有規律。同佢哋一齊玩就係要畀一個示範作用畀佢哋睇，要玩得有分寸，同埋部遊戲機係由我掌控，第二係揀一個合適時間，我通常就會揀星期六日可能係食晚飯前四點零鐘開始玩到六點鐘到，因為食飯時間佢哋就知道一定要玩完熄機。再加上返學日子一定唔會開機同佢哋玩，所以佢哋對玩遊戲機都好有規律，亦都一定唔會自己開部遊戲機去玩，要玩係一定我哋三個一齊玩。

我成日都講電子產品唔係洪水猛獸，唔應該成為親子關係嘅破壞者，但係點樣畀細路仔接觸電子產品，家長嘅榜樣同埋準備非常重要。記住細路仔所有嘅生活規律都係由家長造成，家長用一個乜嘢態度去幫仔女接觸電子產品，將會好影響佢哋將來嘅成長同埋發展。