少年成長今日: 0|主題: 16108

收藏本版

發帖

返回列表

跳至頁

查看: 12696 | 回覆: 1

愉快在家工作 [複製鏈接]

csir3290

子爵府

積分: 12552

1^#

發表於 22-4-3 12:32 |只看該作者 |正序瀏覽 |打印

自從同老婆都要在家工作開始差不多日日都係屋企，但係並冇發生好似有啲家長講困獸鬥嘅情況，反而仲多咗時間一齊，大家多咗時間傾偈同相處，咁樣同仔女嘅關係仲緊密咗添。以前我同老婆放工返到屋企最早都六點幾，講真返到嚟已經攰到想死，跟住睇埋佢哋啲功課食完飯都已經講緊八點有多嘅時間，跟住熄電視同佢哋睇下書坐一陣間就已經十點幾，佢哋又要瞓覺，所以基本上都冇乜時間同佢哋一齊玩下同埋傾下偈。如果細佬要默書或者測驗考試，仲更加連食完飯嘅時間都要溫書，可能搞下搞到差唔多瞓覺先至搞得掂。但係而家在家工作反而多咗時間一齊傾偈。要平衡工作時間同埋相處時間，又要兼顧到仔女等佢哋唔好咁依賴。因為我同老婆都喺屋企，好多時佢哋一遇到問題就會諗起即刻搵我哋。所以都係以前嘅講法，父母心態同埋生活規律好緊要。

而家我哋嘅生活其實都好有規律，我同老婆通常一早就起咗身一齊食個早餐之後就開始各自嘅工作，去到大概九點零鐘就會叫醒佢兩個小朋友，因為佢哋都知道我哋要做嘢，咁所以其實佢哋通常都好合作好快趣就會起身，跟住我同老婆就返返入去繼續做嘢，佢兩個食完早餐之後就會開始自己做功課溫書練琴，總之成個上午除咗叫佢哋起身嗰段時間會見一見之外，只要佢哋見到我哋閂埋房門就知道我哋做緊嘢，佢哋就會乜都自己搞掂，一定唔會騷擾我哋。直至到食晏晝大家又會坐埋一齊食嘢，多咗時間傾偈。食完晏大家都會休息一陣咁跟住又會各自做嘢。佢哋會繼續佢哋嘅工作，如果搞掂曬啲嘢，佢哋就會兩個自己玩，細佬有陣時又會做下手工，家姐就會剪下片總之佢哋知道爸爸媽媽做緊嘢就唔會騷擾我哋。直至到五點零鐘我同老婆啲嘢大概都搞掂晒，以前就仲要睇下佢哋啲功課，但係而家只係需要睇下細佬平時做嗰啲練習，家姐已經唔使我哋特別理，所以去到嗰段時間大家都可以休息下，咁佢兩個就會睇下電視，直至到晚飯之後，以前好少可以做到嘅就係睇完書之後大家可以坐埋一齊睇下電視。而且我老婆同啲仔女最近開始玩一個apps叫做「Re-speak」，見佢哋成日都玩得好好笑，個apps大致就係將人哋講嘅說話調轉嚟講然之後學返嗰段說話再倒返轉睇下邊個講得似。因為調轉啲音嚟講，所以好多時都會講得好得意成日就見到佢哋三個玩到笑曬好開心。講真如果以前日日返工，夜晚真係未必會有時間咁樣玩法。到咁上下十點零鐘佢兩個上曬床之後，我老婆仲有時間煲下劇，我仲有時間上下網有返啲私人時間。

其實在家工作有啲人會覺得係困獸鬥，有啲就可能會好似我哋咁其實個關係仲緊密咗，仲多咗時間一齊，其實點樣處理真係好睇家長自己嘅心態，樣樣都唔滿意樣樣都篤眼篤鼻，但係又唔在意幫細路仔建立一套生活規律，自然就係困獸鬥。我明白細路仔有陣時未必咁合作，但係講真佢哋一向嘅生活規律已經習慣咗，如果家長仲係事事發忟憎，以為用鬧就可以解決一切，咁冇錯在家工作只會增加大家嘅磨擦繼續破壞大家嘅感情。我好相信大部分嘅細路仔其實都會明白家長嘅情況，只要家長肯主動同佢哋解釋同埋嘗試，但係家長自己啲情緒唔好嘅時候，又點樣能夠心平氣和咁樣去同仔女解釋同埋相處呢。在家工作究竟係困獸鬥定係令大家關係更緊密嘅個機會，完全取決於家長自己嘅心態。