少年成長今日: 0|主題: 16108

收藏本版

發帖

返回列表

跳至頁

查看: 18563 | 回覆: 2

「針」前抑鬱 [複製鏈接]

csir3290

子爵府

積分: 12552

1^#

發表於 22-4-24 11:14 |只看該作者 |正序瀏覽 |打印

琴日終於同阿女去打咗第三針，有睇開我寫嘢嘅都知道我個女係非常之唔鍾意打針，每一次打針之前佢都要抑鬱成個星期，雖然我同老婆都唔會逼阿女去打針，但係阿女自己都知道佢要個「疫苗通行證」有效想唔打都唔得。所以佢千萬個不願意之下都唯有要去打，越近打針嘅日期佢就越嚟越唔開心，打針前嘅一個禮拜我完全感受到嗰啲反叛期細路仔情緒嘅出現。

打針前嘅呢個星期阿女成日就匿咗喺房，有陣時就見到佢苦埋口面咁攤喺張床上面，雖然未至於完全唔應我同老婆，但係明顯比起之前講少咗好多嘢。直至到打針前一日，阿女雖然唔會喺我哋面前發脾氣，但係都明顯見到佢好忟憎。就算同佢出街食飯佢都唔係好講嘢。但係有陣時佢鍾意嘅時候就會黐埋嚟我同老婆身邊挨住我哋。其實有陣時見到佢咁都幾忟憎，雖然明知佢係因為打針而唔開心，但係都唔明有乜嘢好驚，有乜嘢好唔開心。

但係細路仔嘅情緒就係咁樣，我同老婆都冇特別去安慰佢，更加唔會話去話佢，因為情緒就係情緒，佢驚就係驚佢唔開心就係唔開心，有陣時就算你點講話冇乜嘢好驚或者叫佢勇敢啲之類嘅說話其實都係冇用，佢只會覺得你唔明白佢。所以我同老婆都係好似平時咁同佢相處，就算有陣時佢唔係好想回應我哋，我哋都冇特別話會話佢，總之佢想同我哋傾偈嘅時候我哋就會同佢傾，有需要嘅時候我會借個膊頭畀佢挨下，仍然每日都會攬下佢，佢想我哋錫佢嘅時候你都會錫佢。總之就係避免同佢講叫佢勇敢啲或者叫佢唔使驚，總之就係要畀佢知道我哋明白佢嘅感受亦都支持佢。終於到琴日打完針佢成個人鬆曬，即刻回覆好似平時咁多嘢講同成日笑，終於到琴晚臨瞓我先同佢講話唔開心嘅嘢終於都係會過去，下次嘗試下唔好用咁多時間去唔開心啦，有啲乜嘢爸爸媽媽都會喺身邊支持佢。咁佢攬一攬我之後就跟住瞓覺。

其實細路仔有陣時都有佢自己嘅情緒，都需要用佢哋自己嘅方式去處理，做家長喺佢哋身邊其實畀最多嘅支持佢哋就可以。好似我個女對打針呢個情緒問題，其實我作為家長講乜嘢都冇用，因為唔開心同驚始終都係佢嘅感覺，做家長嘅只需要理解同埋支持，佢哋亦都唔會咁容易因為家長幾句說話就改變佢哋嘅諗法，所以夾硬用我哋嘅諗法強加於佢哋身上，最終只會演變成為衝突或者破壞大家之間嘅關係。

講開打針防疫，阿仔阿女就嚟又開學，我哋計下每日都要用四個檢測包，琴日順便同老婆去睇下啲檢測包嘅價錢，見到最平都要差唔多八至十蚊一包，其實對好多家庭嚟講都真係一個負擔，好似我屋企咁，一日就要用四個即係差唔多四十蚊一日，我明白防疫重要但係我真係越嚟越唔明政府諗政策嘅邏輯，明明要啲學生每日都要做，咁點解唔係每一個學生都係由政府去派檢測包呢！政府話會對攞津貼嘅家庭派發檢測包，但係香港真係有好多家庭只不過係畀個入息上限多咗少少而攞唔到津貼，咁已經日日要用口罩而家又要再加上檢測包，政府有冇諗過對呢啲家庭其實增加咗好多負擔。最重要係而家係你政府一定要我哋去做，咁點解要由家庭自己去負擔呢！我哋呢啲小市民我哋都盡量照做，但係有陣時作為有思想嘅人都會質疑下究竟啲做法合唔合邏輯！一家差唔多40蚊一日嘅檢測包，仲要加口罩其實對一個雖然冇攞津貼嘅家庭嚟講係咪真係咁容易負擔呢！