少年成長今日: 1|主題: 16132

收藏本版

發帖

返回列表

跳至頁

查看: 30870 | 回覆: 2

班群 [複製鏈接]

csir3290

子爵府

積分: 12785

1^#

發表於 23-7-9 11:31 |只看該作者 |正序瀏覽 |打印

而家學生十個有九個都有一啲所謂嘅同學或者班群組，唔使好似我哋以前細個咁要搵同學就要打電話去同學屋企。而家只要一部手機大部分嘅同學都可以聯絡得到。阿仔因為就嚟畢業，所以近排佢經常喺自己嘅班群組入面同同學商量點樣慶祝，點樣多謝老師同埋要送啲乜嘢禮物等等，個群組嘅聯絡就好似越嚟越頻密咁。

最近我個仔話因為班主任就嚟生日，所以佢哋成班就約埋一齊諗住送蛋糕同班主任慶祝，我個仔同我講話有同學負責訂蛋糕，仲話個同學已經買咗一個六百幾蚊嘅蛋糕添。咁我就問阿仔佢哋諗住點樣夾返錢，同埋每人夾幾多錢畀番同學，點知阿仔話喺個群組入面冇人講，好似冇左件事咁。我就同阿仔講咁樣唔得㗎，因為同學畀咗錢買蛋糕可能係用家長嘅錢又或者係零用錢，所以唔可能唔畀返錢同學，而且如果你哋冇人出聲話夾返錢，可能到頭來買蛋糕同學嘅家長都會出聲，咁反而會令到班主任有麻煩。我個仔就話唔知點喺個群組度講好，我同佢講其實佢只要好簡單喺群組度問明天要帶幾多錢返去夾返俾同學就可以。之後我個仔都喺群組度問咗，但我仔就話同學嘅反應好似不大咁。最後就要我老婆喺家長群組度問返，最終先至解決咗個問題。

群組的確係方便咗大家聯絡，但係就係因為有陣時太方便，細路仔就隨便喺群組上面講嘢。因為我一向都唔贊成檢查佢哋嘅手機或者群組嘅內容，所以藉住呢件事我亦都順便教下阿仔用群組嘅態度。首先我同阿仔講喺群組上面唔可以亂講嘢，因為我哋以為隨便講嘅閒偈，但係因為個個都睇到，而且同一句說話，個個人嘅感覺都可能唔同，所以有陣時就會產生一啲我哋預期唔到嘅後果，所以喺群組上面講嘢更加要小心。我亦都順便問下佢喺群組入面佢啲同學會唔會講同學嘅壞話，或者取笑同學。佢話間唔中都有，所以我提醒佢千祈唔好參與，因為你以為講笑，但係你唔知道對人哋造成幾大嘅傷害，而且好多時參與呢啲對話，到最後可能連自己都會畀人話埋一份。所以我提醒佢千祈唔好參與。如果情況太過份嘅時候，可能仲要話畀老師聽添。另外我亦提醒阿仔唔好隨便放嘢上網或者隨便喺網上講說話，因為一擺咗上網嘅嘢其實想收亦都收唔返，隨時可以引嚟好嚴重嘅後果。

其實而家上網真係好方便，群組亦都拉近咗大家嘅距離，但係細路仔就未必懂得小心咁去用呢啲群組，所以家長真係有需要用時間教下佢哋上網或者用社交媒體同群組嘅正確態度。有啲家長就覺得呢啲係洪水猛獸，盡量唔好畀佢哋用，又或者就算畀佢哋用，都要成日會監控住。但係始終科技都係喺我哋身邊，避得一時但避唔到一世，與其唔畀佢哋接觸不如慢慢開始，同時積極咁培養佢哋使用呢啲工具嘅正確態度。不過當然家長自己亦都要有良好嘅身教啦！