親子旅遊 今日: 2 | 主題: 161783

積分: 31004

2024年龍年勳章牛年勳章

1^#

發表於 23-12-9 21:26 |只看該作者 |正序瀏覽 |打印

本帖最後由 buklaylay 於 24-2-29 19:18 編輯

9/12 (Sat) Day 1 梅田掠影

尋晚凌晨機，喺飛機「恰」咗兩個鐘... 今朝天未光，到咗關西機場！

可能呢個 trip 玩14日，個人開心到唔攰，而家未眼瞓，仲鬼打都冇咁精神... 出少少相，同大家分享吓！

(待續)
attach0/tmp/phpjsPvyJ

點評

Cheuk2012

發表於 24-2-17 23:56

0 0 0

私人傳訊

積分: 31004

2024年龍年勳章牛年勳章

157^#

發表於 24-2-28 22:14 |只看該作者

回覆樓主:

22/12 (Fri) Day 14 大阪最後零碎篇

通常 last，大堆頭隊晒出黎~ 好似年宵最尾，一件不留，要錢唔要貨！

今集，乜野垃垃雜雜，雜崩 lun 相，堆晒出黎，趕住埋尾，收檔呀！由酒店出發，乜都噏吓咁囉！

每次行去梅田吃喝玩樂區，必經露天神社。奇怪，神社間間露天，有咩特別？原來唔是「露天神社」，係「露天神社」... お初天神，又叫戀愛神社，Ee~ 想求姻緣，有得諗喎！

梅田今日，個天好藍，商場好行，d貨好摸！去到車站，搭機場巴士... 嘩~ 人龍打轉又打轉！唔通，關西機場要提早三四個鐘到... 呢個流傳，真？

「人地不嬲話T1水洩不通，關你地兩個老野咩事？」

係喎！我地坐 Pea廚，喺T2... 確實冇我地份！17:45去到... Err~ 要 19:10先開始 check in，等幾耐？(要搵我細仔出馬，精算吓~ 佢細時d時鐘數學計唔掂... 冇答案，會排得輕鬆d)

樂桃寄行李嗰陣，個個驗屍官上身：「行李呢度花咗少少，你簽名確定返」喂喂喂～呢個額外服務幾好，行李花凹凸，好少留意！

出境超快超順暢，兩老有時間黎個晚餐。今趟冇得玩揀食店遊戲... only 一間有開，預咗唔太好味！(呢樣佢做到)

坐廉航有個好處，機艙行李位，冇俾其他乘客霸佔！(之前坐ANA，窗口兩座位，行李位俾一家三口塞滿晒，仲要冇禮貌，串到爆)

今次來回程，有位置放袋，側邊位冇人坐，機票價錢平，極滿意！

講到呢度，字數好似比平時，多咗！ (唔緊要，臨別秋波，豪多幾句俾大家)。

多謝收睇呀！後會有期~

(全卷完)
attach0/tmp/phpl1cLuq

點評

發表於 24-3-14 10:08

私人傳訊

積分: 31004

2024年龍年勳章牛年勳章

156^#

發表於 24-2-27 01:32 |只看該作者

回覆樓主:

22/12 (Fri) Day 14 大阪午餐

四六時中

旅程最尾嗰日，情緒有d波動，好似更年期咁~ 玩到唔捨得走，好想瀨死唔走...(下删依依不捨之情，萬餘字)

兩條老野啃完酒店早餐，即閃出去，享受僅有嘅大阪半 day。響梅田悠悠閒閒，hea 睇 hea 買。Ee~ 望吓時鐘，又到「飯」忙時間！

咁啱喺 LINKS 行緊，上8階，昅吓有咩好食。睇吓今次，邊間咁唔好彩，俾我地睇中...

四六時中~ 仲唔係你，得幾丁友等位。兩老，加入隊伍... 擔凳仔坐低等！招牌「四六時中」，意思係「一整天」，「由朝到黑」... (咳) 唔駛等咁耐啩！

呢間幾多選擇，揀咗木桶豪華海鮮丼。海鮮丼三吃~ 食原味，加海苔薬味食，加湯變茶漬飯。仲嗌多個甜品，兩個 share。

佢地特別泡制嘅，昆布鰹魚湯，任飲無限添加！

(待續)
attach0/tmp/phpzR5eII

私人傳訊

積分: 31004

2024年龍年勳章牛年勳章

155^#

發表於 24-2-25 22:19 |只看該作者

回覆樓主：

本帖最後由 buklaylay 於 24-2-25 22:22 編輯

22/12 (Fri) Day 14 大阪

晨跑巧遇黃鴨

等到嘞~ 終於吹到 Day 14... 今次寫咗六十幾集，成功冇爛尾！

La屎一日，C6當然冇放過機會，臨尾衝個刺，大阪黎多轉晨跑。佢喺街頭，撞到熟人~ 黃色巨鴨！

十年無見，吹氣鴨6月重訪香港。佢華麗轉身引退後，游咗去大阪！

阿邊個：「海運展出miss咗，打孖重臨舊地，又錯過咗... 去大阪打個卡先」

等等~ 而家見到嘅橡皮鴨，係遺照... 來賓請留步，一鞠躬，再... 噢！啋啋啋~ 我意思係，巨型黃鴨佢... 已經返咗荷蘭鄉下！(呢一刻，佢喺台灣高雄，沐浴愛河)

大阪呢個冬日物語~ 「中之島西區冬日物語2023」，活動已經完晒。乜野水之幻想曲，已成追憶，12月25號，游走咗咯！

Errr~ 其餘晨跑景點，都係嗰d... 路線點跑唔太知，我見到相，當去咗咋！

(待續)
attach0/tmp/phpHGFZjr

私人傳訊

積分: 31004

2024年龍年勳章牛年勳章

154^#

發表於 24-2-24 23:26 |只看該作者

回覆樓主:

21/12 (Thu) Day 13 大阪晚餐

しゃぶ菜

「阪急三番街」、「しゃぶ菜」、「牛肉豚肉野菜食べ放題」... d字眼，好眼熟，好似見過，有種熟悉嘅感覺？

發夢睇過？夢境中關鍵字，似曾相識？冥冥中，俾你... 再~ 遇~ 上~ (大腦喺瞬間，閃過d野) 你~ 望~ 吓~ 後~ 面~

唔駛驚~ 係睇返後面幾頁，之前 Day 1晚餐，兩條老野幫襯過！

香港人一年四季，366日(今年有29/2)，都係邊爐日。兩老聲稱火鍋黑洞，加埋第1晚光顧過，今集 last night 在大阪，encore 多次，頭尾呼應，功德圓滿！

例牌又係4點半入座，耕田咁早開飯，貪冇乜人。喺しゃぶ菜，慢歎兩個鐘，養生呀！

(待續)
attach0/tmp/phpGta7zk

私人傳訊

積分: 31004

2024年龍年勳章牛年勳章

153^#

發表於 24-2-24 01:01 |只看該作者

回覆樓主:

21/12 (Thu) Day 13

三井 Outlet Park / Lalaport 門真

臨空城？門真？
Premium？三井？
揀 Premium 臨空城，定三井門真呀？

最終門真勝出~ 新鮮滾熱辣，4月先開張大吉！三姐呢個場... 噢~ 係三井... 將百貨 Crossover Outlet，打造由生活日常，到時尚品牌，都有。

去 Outlet 執平貨嘅濕平一族；行街食飯嘅家庭一族；無聊去歎冷氣嘅消磨時間一族... 乜野客都立晒！

咁大型嘅商場，原來得2樓先係 Outlet... 有少少失望！某d牌子喺三井 Outlet Park 大阪鶴見，搬過黎。

而1樓同3樓，係 Lalaport 嘅世界。佢隆重其事，重金禮聘黑門市場，進駐1階，好似力邀1X間黑門舖頭，開分店。

唔喜黑門？唔緊要，3樓有 Food Terrance，日韓中洋式，乜都有，梗有一款啱味，啱晒你！我地揀咗魚生飯，一丼二食。

去過 Lalaport，一定知親子友善商場，細路仔大晒！除咗 food court 有朋友仔專區，天台仲有超級大廣場，又有sir 滑梯，啱晒放電... 拖男帶女，冇問題！

(待續)
attach0/tmp/phpV0PDQf

私人傳訊

積分: 31004

2024年龍年勳章牛年勳章

152^#

發表於 24-2-20 22:09 |只看該作者

回覆樓主:

20/12 (Wed) Day 12 晚餐

かに道楽道頓堀東店

好後悔揀錯分店?！
(Sorry~ 今集負評特別多)

蟹道楽雄霸道頓堀，集總店、中店、東店3間平分收息... 撞正C9朋友喺大阪，柴娃娃一齊飯聚。佢地未食過蟹道楽，我叻唔切，即刻搶功勞，諗住攞個靚綵！

訂かに道楽本店，feed back 話滿座，改咗道頓堀東店... 一樣啫...？

準時17:30到東店，問題黎嘞~ 不嬲去新宿京都嗰d，四四正正，靚靚仔仔... 搞乜東店跌晒 watt，殘殘舊舊，逼逼澀澀，以為入錯居酒屋？！

上2階，有4個「卡位」，地方淺窄，d鞋亂飛... (咳~) 唔緊要，坐親密d，熱鬧d... 哈哈哈哈哈 (愕然到不知所措，以假笑打圓場)

兩老喺京都，諗定今日食「雪景色」... 吓~ 冇... 求其柯打「暁天」 X 1，「東雲」 X 3... (再咳~) 唔緊要，食平d，開心d... 哈哈哈哈哈 (殺我一個措手不及，以笑遮醜)

精彩時刻~
上蟹火鍋(かにすき)，女職員拎住鍋湯，老鼠拉龜，唔知擺喺檯邊忽... 佢一野「檻」過C6，踩喺我地座位之間 (放手機位置)，擺低個鍋，再一野「檻」過，走人！！！呆晒，唔識俾反應...

東店好唔 ok，比起東京同京都分店，差好多皮！

我地由17:30食到20:00，眼見一檯做一輪客，仲要唔爆。喺地下賣單，有 pair 香港情侶入黎，收錢阿叔問有冇訂位，冇預約嘅唔招待... 唉~

(待續)
attach0/tmp/phpBqim41

私人傳訊

積分: 31004

2024年龍年勳章牛年勳章

151^#

發表於 24-2-19 22:28 |只看該作者

回覆樓主:

大阪酒店篇~ Hotel Elcient Osaka

9~11/12/2023 (2晚) 20,520円
20~22/12/2023 (2晚連早餐) $1,452.19

兩條老野，2喼去京都，三喼返大阪...

秤住 luggage 周圍騰，好煩啫！唔怕~ 自駕幫到忙... 12:00還車，先去 Hotel Elcient 放低幾喼。交完架車，輕鬆喺こだわりまい泉歎 lunch，3點折返酒店攞房，掂！

呢間 hotel，叫做住過3次：
舊年農曆新年，宿第1次... 可能疫情未復常 (仲要戴口罩)，用咗1千蚊港幣，連住4晚... 冇搞錯，係$1,000 四晚雙人房！

呢兩轉，梗係冇呢支歌仔唱，但都好抵。臨回程前嗰兩晚，包朝食，幾舊水一晚。雖然行去梅田，要幾分鐘路程 (兩老步速)，但係... 有大眾浴池浸，有桑拿焗！嗱~ 係咪抵翻兜呢！

唯一挑剔，最唔掂檔... 個早餐。Errr~ 沙律，麵包還 ok，其他... 又係非筆墨所能形容。

公平d咁理解，可能我地俾京都，琵琶湖，神戸d朝食，縱到嘴刁... (呢樣真係唔要得) 搵樣野讚返佢，珈琲算幾得，飲杯！

下集，去蟹道楽道頓堀東店... 差！

(待續)
attach0/tmp/phpp6Cwsc

私人傳訊

積分: 31004

2024年龍年勳章牛年勳章

150^#

發表於 24-2-18 21:04 |只看該作者

回覆樓主:

20/12 (Wed) Day 12 午餐

梅田こだわりまい泉

神戸返到大阪，喺新大阪新幹線站前，還完車，直踩去 LUCUA 10樓，祭五臟廟。

記得我地嘅宗旨冇？係~ 堅持唔嘥分秒... 唔啱，係時分去排餐懵。一於人棄冇人吼，兩老就食嗰間...

嚇鬼死~ 差d又走咗去，Day 2午餐食過嘅うなぎ徳 UNAGI-TOKU... 陰公~ 冇人等位，門口冷清，有衝動想入去！

冷靜~ 冷靜~ 一定會執到其他死雞... 話口未完，炸豬扒啱唔啱食？こだわりまい泉，排第三... 去登記畫隻龜先！

好快職員出黎叫名，同頭一二位，噏咗一輪... 佢地唔入去？輪到我地，講咗一堆日文... 唔識聽，不過明晒~ bar 檯有位。冇問題，橫掂食完即撇，去酒店攞房！

正~ 昼定食有著數，限定20食，仲有 quota？試下柯打，茶美豚かつ丼 & 黒豚メンチカツ定食... Ee~ 有貨喎！

我地視角... 對正師傅切吉列豬扒。野食可以、服務都得，價錢平，滿意！

下集，介紹大阪酒店

(待續)
attach0/tmp/phpk6q0Xr

私人傳訊

積分: 31004

2024年龍年勳章牛年勳章

149^#

發表於 24-2-17 21:56 |只看該作者

回覆樓主:

20/12 (Wed) Day 12 神戸晨跑

見到「神」+「跑」... 呢d關鍵字，就知今集冇我份，發「神」經咁「跑」呢家辛苦野，梗係外判俾C6。晨咁早天未光，沿住神戸港喪跑，精神分裂... sorry~ 係精神爽利，正！

一年一度嘅神戸馬拉松，人氣得黎又有代表性... 所以特別多人跑？如果遇見都 say 早晨... 合指一算，喺神戸港噏 good morning，おはよう(Ohayo)，會講到口乾！

由神戸みなと温泉蓮開始，到神戸港震災紀念公園... Cut cut cut~ 我想講幾句：

呢個景點，係95年發生神戸大地震，日本喺美利堅碼頭，保留一d破壞原貌，紀錄慘痛嘅災難...

(唔該繼續跑) 去神戸港塔，至Be Kobe，經モザイク大観覧車，到沿港最篤篤，旧神戸港信号所。好似睇「瞬間看地球」咁，坐家欣賞神戸港，周辺観光写真！

唔知佢來回跑咗幾多次... 我份人就最隨和，總言之，八點 sharp 返酒店食早餐... 係咪咁講呀？

按：神戸みなと温泉蓮朝食後，兩老返大阪還車...

(待續)
attach0/tmp/phpjtdotB

私人傳訊

積分: 31004

2024年龍年勳章牛年勳章

148^#

發表於 24-2-16 22:18 |只看該作者

回覆樓主：

本帖最後由 buklaylay 於 24-2-16 22:24 編輯

19/12 (Tue) Day 11

神戸ハーバーランドｕｍｉｅ

兩條老野喺神戸みなと温泉蓮，宿二宵，為咗去姫路城咋！參觀完国宝観光名所... 好似又完成一項創舉咁~

東京... 去江戶城 (皇居)
沖繩... 溜首里城
大阪... 逛大阪城
神戸... 遊姫路城
下個目標：名古屋... 蕩名古屋城

邊個城最出名？一定係日本... 城... 啦！呢個城，街坊經常出沒... 你今日行咗未？

入返正題，我地去酒店附近(其實對面)，揀神戸ハーバーランドｕｍｉｅ，打發時間... (神戸好似冇乜景點)

「唔係喎！聽講三ノ宮站好旺...」

Errr~ 有去！行完嗰種失望失落，非筆墨所能形容... 唔提嘞！

再 repeat 入返正題，神戸 Harborland ｕｍｉｅ，有北館南館，有 Mosaic，有 Aeon Style umie，又有モザイク大観覧車！嗱嗱嗱~ 仲有細路仔，最鍾意食嘅麵包... 麵包超人博物館 (神戸アンパンマンこどもミュージアム＆モール)！

嘩~ 睇見都覺得吸引... 可惜，兩老不解ｕｍｉｅ風情，似d阿伯阿嬋，打個 round 睇完就算。影哂d打卡靚位，拍吓蘿柚走人！零消費，停車場唔使$，免費。

(待續)
attach0/tmp/phpVUKNJG

私人傳訊

積分: 31004

2024年龍年勳章牛年勳章

147^#

發表於 24-2-16 20:40 |只看該作者

Skytree1000 發表於 24-2-16 09:54
所有景點、酒店、食物⋯
都好正呀
加埋你風趣旁白

多謝你將呢隻潛水... 唔係... 係石沉大海嘅油雞，拉返上水面

新一集，老作進行中，等我呀

點評

發表於 24-2-16 23:29

私人傳訊

公爵府

積分: 28856

146^#

發表於 24-2-16 09:54 |只看該作者

所有景點、酒店、食物⋯
都好正呀
加埋你風趣旁白
好睇！

私人傳訊

公爵府

積分: 28856

145^#

發表於 24-2-16 09:53 |只看該作者

所有景點、酒店、食物⋯
都好正呀
加埋你風趣旁白
好睇！

私人傳訊

積分: 31004

2024年龍年勳章牛年勳章

144^#

發表於 24-2-12 01:20 |只看該作者

回覆樓主:

19/12 (Tue) Day 11 神戶

国宝姫路城

一個「姫」字，細個戇居居嗰陣，以為姫路城... 同女人有關！

日本第一名城，因為keep得最好... 成為日本国宝，亦係世界文化遺産。靚靚外觀，似白鷺展翅，又叫白鷺城！

姫路城由大天守，同3個小天守組成。大天守閣睇落得五層，實際有七層... 明明7張野，外表似5張，仲唔係美魔女？

遊客大步檻過菱之門，就可以到天守閣... 等等~ 呢度要俾$入場，承惠1千円。到城堡門口... 又等等~ 攞個膠袋先... 俾你袋鞋，赤腳入去架！(參觀完，個個將個膠袋，dum唔切咁... 如果「大嘥鬼」前局長去到，有咩好講？)

天守閣還原舊史情況~ 好暗... 靠天然光。入去睇吓d機關、密室、木柱嗰d... 想昅好野？有~ 欲窮千里目，要更上一層樓... 喺狹窄樓梯穿梭... 唔多，行六轉啫！

高嗰幾層木梯，又直又窄，「爬」到天守閣頂樓，有小神龕~ 長壁神社，祭祀姬山地主！如果唔參拜，唔添香油，去俯瞰城景，唔錯！

姫路城 over 400歲，歷史悠久，避得過戰亂戰火，逃唔過老舊，要進行修復工程！好似女人歲月不留人，有咩凹陷、鬆弛、下垂，皺紋...做d療程改善吓，熟女變少女，得咗！

白漆無瑕外觀、配有精緻嘅 details~ 大鯱，虎頭蛇尾... 唔係，係虎頭魚身，坐鎮天守閣！

(待續)
attach0/tmp/phpuSKhcB

私人傳訊

積分: 31004

2024年龍年勳章牛年勳章

143^#

發表於 24-2-7 23:36 |只看該作者

回覆樓主:

第二部朝食自助餐

神戸みなと温泉蓮 sell 好水~ 我地磅咗水，佢一定放水，唔會掠水，之後散水... 大家一定享受到天然溫泉水！酒店有浴衣喺房，歡迎著住去浴池/万蓮開餐。

哎吔~ 倒瀉籮蟹，潑到成身咖啡橙汁... 唔怕~ 推万蓮牌餐車，幾論盡都冇相干！每張枱都有1架，碟野食叠到幾高，冇有怕！

兩條老野推住餐車，忍唔住有d思覺失調，笑咗... 万蓮幾時變咗老人院？！(笑緊自己咋) 推住車仔~ 行動變緩慢咗，手腳唔協調咗，阻手阻腳，場面幾搞笑！

(待續)
attach0/tmp/phpbl9ePN

私人傳訊

積分: 31004

2024年龍年勳章牛年勳章

142^#

發表於 24-2-7 23:34 |只看該作者

回覆樓主:

18/12 (Mon) Day 10 & 11

御食事処ライブ割烹万蓮
宿泊限定

第一部夕食自助餐
第二部朝食自助餐

神戶蓮旅館，二泊四食... 4餐喺万蓮搞掂，唔啱胃口就大鑊！

万蓮料理，厳選季節食材，來自兵庫縣新鮮食材 (下删百餘字)... 有呢2句，似強心針咁，打咗個底。

係咪嗰d standard 行貨野？放心~ 和式料理有驚喜！師傅以職人態度，兩晚... Err~ 可能晚晚，絲毫不差咁同一菜色，同一擺位！最正係神戶牛壽喜燒，任食！

(轉耀才 tone) 係~ 任食~ 唔加$~ 唔加任何費。

難怪 Day 11 嗰晚，C6歎完神戶最後一餐牛，心事重重... 糾結返香港，剩係食沙嗲牛(柴韌老多筋嗰d)...

万蓮夕食，check in 嗰陣，已經安排兩晚19:30入席。初時擔心，擦得兩個鐘，好趕會唔夠飽！話晒兩條老野，素來有自助餐黑洞之稱 (火鍋黑洞亦適用)... 點知食咗個幾鐘，飽到上心口，直頂喉嚨。
attach0/tmp/phpxWnIi0

點評

stagea

發表於 24-3-3 11:56

私人傳訊

積分: 31004

2024年龍年勳章牛年勳章

141^#

發表於 24-2-5 21:17 |只看該作者

回覆樓主：

本帖最後由 buklaylay 於 24-2-5 21:23 編輯

18/12 (Mon) Day 10

神戸みなと温泉蓮

呢幾日，有冇覺得... 攰？

嗱~ 打工仔捱騾仔，做牛做馬，捱更抵夜，聽見都攰！

唉~ 天氣咁潮濕，個人特別攰瀨瀨！

嘩~ 肌肉發炎，齋坐板凳，仲要坐足全場，唔嬲就假！

噓~ 回水單野，多咗人做卸膊操？呢單野唔係我跟開... 一野推俾人，卸黎卸去，有排攰！

有上述是但一壇，點算？唔怕，神戶港溫泉蓮酒店，幫到忙！

蓮溫泉，對正神戶港，聽講d天然溫泉，好鬼正！兩條老野二泊四食，唔駛$4880...

Errr~ 近排嘥咗呢筆錢？咪灰爆，蓮有「日帰り温泉」。浸足全日，將d黑面、嬲爆、耍大牌、閃閃縮縮，好似年廿八洗邋遢咁，走晒！

神戶天然溫泉d房，又大又乾淨；酒店早餐晚餐，又係好得... 歌仔有得唱：食得招積，住得舒適... 招積出色舒適超級超值啦！

下集，介紹朝/夕食，等我呀！

(待續)
attach0/tmp/phpJcl78n

私人傳訊

積分: 31004

2024年龍年勳章牛年勳章

140^#

發表於 24-2-5 21:04 |只看該作者

回覆樓主:

次次開第7頁都好痛苦... d相密集恐懼性咁彈出！

晏d出下一集，應該跳去P. 8，哈哈

私人傳訊