少年成長今日: 3|主題: 16033

收藏本版

發帖

返回列表

跳至頁

查看: 21142 | 回覆: 0

舊書 [複製鏈接]

csir3290

子爵府

積分: 12123

1^#

發表於 24-8-4 06:05 |只看該作者 |正序瀏覽 |打印

每年放暑假其中一件要處理嘅事就係兩姊弟啲舊書，新書買返嚟就幾千蚊，但係當佢哋用完一年之後就變曬舊書，就咁揼咗又好似好嘥，但又唔想攞去賣，因為總係覺得只係益咗啲賣舊書嘅人，就幫唔到啲真正有需要嘅人。但係又要騰出啲空位放下一年度嘅書，所以啲舊書始終都要搵方法處理。記得我哋以前細個讀書，我學校都會有一啲舊書回收運動，收返啲舊書返嚟之後就會畀下一年到有需要嘅低班同學用，其實我覺得咁樣嘅方法係最好，但係可能因為有陣時收到個舊書真係太多，而且又未必全部都能派曬出去而導致啲舊書堆積喺度，如果萬一牽涉到金錢就更麻煩，所以可能而家啲學校都唔係咁想搞呢啲舊書回收運動。

其實兩姊弟所用嘅書都好新淨，所以我哋都好想將佢送畀有需要嘅人，我老婆今年就嘗試喺啲群組度問，有冇人需要舊書，將會免費送出。由於係免費所以當然都有啲人問，當約好曬預備將啲書交畀人嘅時候，細佬忽然間扭扭擰擰，好似唔係好想將啲書畀人咁，而且叫佢執好啲書佢又成日只係話得，又話做乜要咁快將啲書畀人，咁我哋都解釋畀佢聽，因為人哋想快啲攞到啲書，然之後睇下有冇啲書無而要再去買，所以交書嘅日期就約咗喺細佬學校最後訂書日期前嗰日。咁我哋自然就叫細佬快啲執好啲書睇下邊啲要邊啲唔要啦！但係細佬把口就成日話我哋做乜要咁快畀人。而且語氣仲好似有啲怪責我老婆咁，我老婆有少少忟忟哋就同細佬講，如果唔願意將啲書送畀人點解唔早啲講，因為我老婆喺網上問人之前其實已經先問咗佢兩姊弟，亦都同佢哋講如果唔送畀人，最終都係要佢兩個執好啲書然之後可能都係要送去堆填區。細佬當時冇乜反應，咁我老婆先至開始喺網上問有冇人要，點知到要交書畀人之前細佬先至話我哋急，做乜咁快要畀人。我都解釋畀佢聽唔係個個可以好似佢咁每年開學都買新書，而且畀啲書人都係幫佢嘅師弟師妹。我老婆雖然有啲忟忟哋，但係都好耐心咁同細佬講，後來阿仔先至慢慢講其原來有少少擔心嘅係唔知有冇啲書，老師喺佢新學年嘅時候仲會用，佢擔心如果送咗啲書畀人到時冇咗啲書唔知點算。咁我哋同佢講話如果老師要你keep住啲書嘅話一定會同佢講，咁佢話數學老師已經講咗數學書下學年會用，咁我哋就留低咗本數學書而其他老師冇講嘅一定唔會再用啦！另外當我老婆同阿仔一齊執書嘅時候，發現阿仔原來係書入面做咗好多筆記，仲做得幾靚添，講下講下另外一個原來佢唔捨得畀啲書人嘅原因，就係佢唔捨得自己做嘅筆記，咁講真佢真係做得幾好同埋好有心機。咁我哋讚佢之餘亦都提佢，其實啲筆記做得咁好，會唔會開始諗下嘗試自己用筆記簿做筆記呢！因為佢將啲筆記寫咗係書咁唔可能無了期嘅keep住本書，但係如果用筆記簿做筆記嘅話，只要keep住本筆記簿，就唔會嘥咗自己咁有心做嘅筆記啦！咁佢嗰陣時先至好似恍然大悟咁，因為佢話好多時老師講嘅嘢佢就即刻寫低，從來冇諗過會用筆記簿。咁我老婆最後同阿仔坐埋一齊揀書，睇下有冇一啲阿仔真係覺得好需要keep住嘅。阿仔好似解開咗個心結咁，仲同我老婆一齊用塗改帶遮蓋咗書入面嘅名，因為佢話唔想佢嘅師弟師妹知道套書係佢嘅。

雖然件事好似好雞毛蒜皮好小事咁，但係我想帶出嘅係同呢個年紀嘅細路仔相處，有時真係需要好多耐性去估佢究竟心入面諗乜嘢，好似今次呢件事咁，如果我哋冇理到阿仔嘅感受，快快脆脆咁執咗套書就送畀人，雖然結果可能一樣，但係阿仔心入面可能都係會唔開心，但係用多少少耐性，慢慢去聽佢講下。雖然結果都係將書送咗畀人，但係對阿仔嘅感受嚟講可能就完全唔同曬。其實到最後阿仔除咗留起咗本數學書之外其實都係全套輸送曬畀人。講真好多時仔女唔願意同我哋溝通，其實未必係因為佢哋唔想同我哋講，反而係心入面佢哋已經覺得同我哋講都冇用，所以做家長要處理同青春期仔女嘅溝通真係要用多好多耐性，講真有陣時真係要好似同女朋友相處嘅心態咁，要咁有耐性同埋關顧佢哋嘅感受。