少年成長今日: 1|主題: 16016

收藏本版

回覆發帖

返回列表

跳至頁

查看: 24836 | 回覆: 0

三分鐘熱度 [複製鏈接]

csir3290

子爵府

積分: 12033

1^#

發表於 24-9-1 11:50 |只看該作者 |正序瀏覽 |打印

剛剛完咗奧運，除咗為香港運動員感到驕傲之外，我相信亦都會帶起另外一個運動熱潮。好似上屆奧運咁，劍擊攞咗金牌，即刻所有劍擊嘅課程都變成大熱，好多家長都希望栽培自己嘅仔女成為下一代嘅劍神，今屆奧運之後我相信除咗劍擊之外，又會多咗好多人學滑板學霹靂嘅課程，因為睇比賽嘅時候，好多呢兩個項目嘅運動員都年紀好細個，滑板攞奧運金牌嘅運動員都只係十幾歲，大部分嘅運動員都係16七歲，所以又可能會帶起另外一個學滑板或者霹靂舞嘅熱潮。

我唔係話去學呢啲課程有乜嘢問題，但係好多時家長畀細路仔去學呢啲課程，開始嘅時候細路仔總係顯得興致勃勃，尤其是係因為睇到奧運比賽嘅情況，啲細路仔覺得好玩所以家長叫佢哋去學一般都問題不大，但係最大嘅問題係點樣延續細路仔一路學落去嘅興趣呢？有陣時家長同埋細路仔對學興趣班嘅目的產生落差就會令到問題出現。最簡單講，細路仔就梗係覺得最緊要玩得開心開心就自然有興趣，但另一方面家長可能就會有多啲期望，覺得細路仔玩得呢啲興趣班，就應該有一定嘅目標同埋成績，而玩得呢啲興趣班最容易見到成績嘅就係參加比賽，但係坦白講每一個比賽，獎項都係有限，有幾多個家長又真係能夠做得到只在參與，不繼成績最緊要細路仔玩得開開心心呢！開頭可能可以係，但係如果次次比賽都冇成績，細路仔又冇成功咁，咁興趣就自然會慢慢減退。

早兩日同個親戚食開飯先至講，話佢個仔本來開始學琴，仲啱啱買咗個電子琴畀佢，點知佢個仔話咁快個興趣又好似轉咗，而家又話鍾意打籃球，又好似冇乜興趣練琴咁。佢話唯有喺佢唔學之前畀個目標佢，就係希望佢考到二級先至唔學啦！因為佢話佢個仔自從鍾意打籃球之後，就開始唔係好練琴亦都冇乜心機練。呢個情況其實我覺得好多家長都會面對，好多家長都會用三分鐘熱度嚟形容細路仔呢一種表現。所以要細路仔去學一樣新嘅興趣唔係困難，反而係點樣維持住佢哋嘅熱度先至係最困難。

我自己就覺得要維持細路仔嘅興趣，最緊要就係令佢哋覺得玩得開心同埋有成功感。我自己就覺得要佢哋玩得開心，第一樣嘢就係要玩得冇壓力，但係偏偏好多時玩興趣班嘅壓力就係來自家長，當然我明白家長用咁多錢去培養細路仔嘅興趣，就自然係希望佢哋能夠好有所成啦！好似學樂器就希望佢哋考試同可以表演，學運動就自然係可以參加多啲比賽，甚至乎可以攞到獎項，總的嚟講，家長好多時就係用成績嚟釐定細路仔喺興趣班上面嘅成就。咁成日練習為考試為比賽又點會玩得開心呢！我覺得要令細路仔玩得開心，第一件事就係要解除呢啲壓力，第二樣嘢就係同佢哋一齊玩或者陪佢哋一齊玩，例如好似我對仔女學琴咁，以前佢哋細個嘅時候，我哋都會用時間坐喺佢哋側邊陪佢哋一齊練琴，而更重要嘅係坐喺側邊唔係逼佢哋練琴，而係好似同佢哋玩咁，有陣時甚至乎請佢哋教返我哋轉頭，佢哋覺得可以教返家長反而就會覺得仲有成功感，更重要嘅係經常讚佢哋彈得好聽，加強佢哋練習嘅成功感。直至到佢哋將練琴變成為習慣，我哋先至少咗坐喺佢哋身邊。所以坐佢哋身邊陪連琴唔係搵佢哋彈得唔好嘅地方或者逼佢哋要練多幾多次，而係要好似同佢哋玩一樣令佢哋覺得彈得開心。至於學運動我就覺得要搵機會同佢哋一齊玩或者叫返細路仔教我哋玩，亦都要陪佢哋一齊睇運動嘅比賽，即係我個親戚個仔點解會開始鍾意打籃球，咪就係因為老豆會同佢一齊睇籃球，而佢又覺得一齊睇嘅時候，大家睇得開心所以咪開始有興趣。另外，成功感除咗來自比賽考試之外，其實更重要嘅就係嚟自家長嘅欣賞同認同，所以家長只要多啲欣賞同埋多啲讚賞佢哋嘅表現，其實都可以令佢哋覺得自己能夠做得更好。只有佢哋自己都覺得能夠做得更好先至能夠維持興趣繼續發展。

總的而言要幫細路仔開始一個興趣唔難，但困難在就係點樣幫佢哋維持呢個興趣。唔想仔女三分鐘熱度，其實就要睇家長用乜嘢方法去維持住細路仔嘅熱度。