醫護健康今日: 4|主題: 7717

收藏本版

回覆發帖

返回列表

跳至頁

查看: 7937 | 回覆: 0

[其他] 將軍澳醫院痔瘡手術後記 [複製鏈接]

MmmCatherine

民房

積分: 7

1^#

發表於 24-11-20 09:13 |只看該作者 |正序瀏覽 |打印

將軍澳醫院痔瘡手術後記15/11 排期做痔瘡手術 7點前可以食白粥一碗之後唔可以食野飲水約左早上10點入院主院2樓日間手術中心去到按鐘有姑娘帶你入去換衫除低所有手飾放儲存櫃見麻醉師我揀左全身麻醉埋位姑娘會先幫我種豆見醫生醫生話只會幫我切最大果粒痔瘡唔可以全部切晒因為切晒肛門會狹窄
等到差唔多下午3點排到我做手術入到手術室醫生叫訓上床除衫胸部幫我貼左3塊野有醫生比左個氧氣罩我叫我慢慢深呼吸吸左大約6下斷片了
17：20 醒返傷口有小小痛同生仔十級痛比應該唔夠1級真係得小小痛但個人好懵，比姑娘推左上6樓6A房，話今晚唔可以落床，21：00後先可以食野，叫屋企人拎來（入院前記得要執暖水壺，小量白麵包（因為如果冇人拎野來，你冇野食架啦）沖洗瓶（去完廁所沖petpet用）眼罩（訓覺好用），手機充電等）
到晚上9點姑娘問我去唔去到小便去唔到就要幫我插尿管，我話想自己去廁所，姑娘話可以試下，佢放低床欄，我起身坐左一陣試落地行左一陣見冇問題，自己去左廁所小便，傷口都係唔太痛，一啲都唔似網上啲人講咁死去活來咁痛，輕得令我懷疑其實有冇做手術？手術其實做左咩呢？呢個就係政府醫院同私家醫院既分別吧，因為醫生唔會好詳細同你交代，連你手術係唔係今朝睇果個醫生幫你做都唔知道的）
16/11訓左一晚，第二天大約8點有醫生來檢查傷口，傷口依然唔太痛，我就想出院返屋企，但其實聽醫生講應該要住多日，但我好多野都冇準備，連水都冇杯飲，又冇得沖洗傷口因為呢度冇花灑我又冇帶沖洗瓶，我就口快快話想出院返屋企，醫生睇我冇乜問題，批左我返去，9點有姑娘拎左盆水教我點樣浸屁屁，倒少少高錳酸鉀落盤水度浸十至十五分鐘就得，大約11點屋企人來接我出院（費用：共195元，藥物：一堆止痛藥，一支高錳酸鉀，一支軟便口服液）
返到屋企下午就出事了，肛門口突然長左3粒差不多2cm一粒既野，超級痛，係超級超級痛，腫得好大粒，我打電話返醫院問，姑娘叫我試下浸屁屁消腫，我唔知係咪所有做完手術既人都係咁定係我唔好彩併發症呢？但我冇後悔咁早出院返屋企，因為係屋企保養傷口一定方便同好過係醫院。
浸左幾次屁屁後消左小小腫，但安全起見我都係約左明天4點返去比醫生睇下。
傷口方面有3粒不知明肉粒突出，小量持續不停分泌物（粉粉地色少少魚腥味），所以一定要蝕張紙巾或紗布係屁屁肛門位，（問幾時會冇分泌物？唔知！我而家已經第5day仲有。）我隔2-4小時就會換一次洗屁屁或浸屁屁，務求一定要乾淨。
17/11 早上超級急屎，去廁所手術後第一次大便，痾左幾陀血完，冇完整大便連放屁都係噴血，但都唔算多，痛楚約三級，提提大家做完手術千其唔好因為怕痛所以經常放鬆個肛門，因為一收縮就痛，好多人都唔做提肛運動，我就越痛越做既心態，一記得就收縮，姐係好似忍屎咁，用力收縮，雖然痛，但肛門位果3粒野真係會細左，開完大當然要記得浸屁屁。好啦 4點返醫院，醫生睇過話似係痔瘡可能會消，可能唔會消（其實來睇佢都有小小多餘，講左等於冇講），我心諗死啦唔切果陣係內痔，去完大都話可以整返入去，而家反晒出來又整唔返入去，姐係變左3粒外痔😭，我問醫生開左痔瘡膏揸，希望消到啦，唉！
18/11 早上又去左一次大，點講呢，今次冇咩血，見到黃色一條條，但去完成個人軟晒冇力爬左係到，因為都要用小小力去，去完肛門腫脹痛，都會痛一两個鐘約三級痛 ,keep住都係隔幾個鐘浸屁屁換紗布又一day。
19/11 今日肛門位冇咁腫脹，唔搞佢都唔太痛，但一開大又痛返又腫返都係差唔多keep住都係隔幾個鐘浸屁屁換紗布又一day。冇乜特別要講。