少年成長今日: 1|主題: 16031

收藏本版

回覆發帖

返回列表

跳至頁

查看: 18028 | 回覆: 0

比賽 [複製鏈接]

csir3290

子爵府

積分: 12123

1^#

發表於 25-5-4 12:32 |只看該作者 |正序瀏覽 |打印

早兩日喺網上面收到資料，見到一個羽毛球比賽，即刻諗起不如幫阿仔阿女報名，因為佢兩個其實打咗波都好多年，但係就甚少參加比賽，我同教練都有個共識，就係希望佢兩個應該出去打多啲比賽見多啲出面嘅情況，從而了解下自己嘅實力。所以問咗教練之後，教練都認為可以幫佢哋報，但係教練都提醒話其實佢兩個都好似唔係好想打比賽咁，如果佢兩個都願意參加比賽咁教練就梗係覺得係一件好事。本來諗住佢兩個都冇問題，正正想幫佢哋報名嘅時候，原來發現比賽要喺網上報名，而且要佢哋用自己嘅電郵去報名先至可以，咁所以就返屋企諗住問埋佢兩個然之後就叫佢哋自己報。點知同佢哋講嘅時候，佢兩個都唔係咁願意，個樣一睇就知道唔想報比賽，咁既然佢兩個都唔想，咁亦都無謂為咗個比賽令到大家都唔開心，雖然我知道如果我最後都堅持要佢哋報，咁最後佢兩個都會勉為其難咁樣去報比賽，但係如果咁樣樣，佢哋又打得唔開心咁又何必呢！所以最後都冇堅持要佢哋報名。

其實我同好多家長嘅諗法都係一樣，每個月畀咗咁多錢佢哋嘅跟私人教練學打波，係唔係都應該要打多啲比賽呢！唔好話攞獎，起碼都證明佢哋真係有努力練習。但係點知佢兩姊弟又真係唔鍾意打比賽。細佬都好啲，因為佢學校有球隊，所以都會打學界比賽，同埋佢學校有社際同埋班際嘅比賽，所以間唔中佢都會參加比賽。但係家姐就真係完全冇參與比賽。雖然係咁，但睇返佢兩姊弟雖然冇比賽，佢哋又真係鍾意每個禮拜都跟教練打波，唯有咁講囉，其實佢兩個都透過每星期嘅練習又真係建立到對羽毛球嘅興趣，可能真係冇乜壓力，所以其實佢兩個都打得幾開心，每一次練習我都見佢哋同教練有講有笑，雖然有陣時見佢哋都練得辛苦，但係佢哋都從來冇講過話唔想再打。咁作為家長其實幫佢哋建立到一個運動嘅興趣，咁我覺得都應該叫做達到咗目標。

又好似佢兩姊弟學琴又係學咗好多年，但係細佬就一路都唔肯考琴試，家姐都已經預備緊考七級，但係細佬都只係考咗二級就一路冇考。佢兩姊弟其實同樣都係學咗咁耐，曾經問過細佬，細佬就話唔想咁大壓力，而且佢自己都會練習。鋼琴老師都有叫佢哋兩個去表演，有陣時都會擔心細佬究竟學到乜嘢水平。因為好多時我哋兩公婆放工返到嚟，其實佢哋已經練曬琴，除咗放假我哋會見到佢哋練琴之外，平日就好少見到佢哋練琴，有陣時都會擔心細佬一路冇考琴試會唔會冇乜嘢目標，或者會冇乜練琴，但係最近鋼琴老師叫細佬喺琴行出面示範一次，等佢適應人多嘅地方彈琴，我突然間發現細佬原來彈得好好聽，因為唔係成日都聽到細佬練琴，原來佢真係彈得幾好。老師仲話首歌係佢自己揀嘅，可能冇考試嘅壓力，反而對於佢嚟講學得輕鬆啲，仲可以揀自己有興趣嘅歌嚟彈，反而仲越彈越有信心添。唔知琴老師係咪擔心我哋覺得細佬冇考試，所以老師特登同我哋講話，其實除咗細佬自己揀嘅歌之外，佢都仲練緊一啲考試嘅歌曲。講真其實我哋唔係好在意，反而真真正正見到佢哋兩個都對音樂同埋運動有自己嘅興趣，呢個先至係最開心嘅。

可能我自己安慰自己啦，但係作為家長見到佢兩個都能夠培養到自己嘅興趣，其實講真都真係已經達成咗我哋想要嘅目標，講真如果我哋堅持要佢哋去比賽同埋參加考試，其實以佢兩個嘅性格最終都會勉為其難咁應承，但係我自己又覺得既然係興趣當然要我學得開心，同埋跟住自己嘅進度去學，又點解要佢哋為咗滿足父母嘅要求，難聽啲講可能係父母嘅虛榮心，而增加佢哋嘅壓力，甚至乎破壞大家嘅關係呢！