少年成長今日: 2|主題: 16033

收藏本版

回覆發帖

返回列表

跳至頁

查看: 14526 | 回覆: 0

婉轉溝通 [複製鏈接]

csir3290

子爵府

積分: 12128

1^#

發表於 25-6-8 12:13 |只看該作者 |正序瀏覽 |打印

有陣時同十幾歲嘅仔女傾計真係好難，你正正經經同佢講佢就會覺得你話佢，佢啲防衛機制就出曬嚟，總係會駁返轉頭。所以總係講唔夠兩句就好似不歡而散咁。就好似上個禮拜講選科，明明家長嘅緊張，諗住早啲同仔女傾，但係講親就總係好似覺得做家長嘅好煩厭，因為好多時一講選科就會提到成績，而且因為仲未殺到埋身，所以啲仔女好多時都覺得家長係質疑佢哋嘅成績，覺得家長煩，所以就唔想講。又或者家長有時想提醒仔女做某啲嘢，明明唔係諗住話啲仔女，但係一開聲啲仔女又總係覺得家長係話佢哋，所以又係啲防衛機制即刻出曬嚟，最後又好似不歡而散咁。

所以我自己就漸漸發覺同仔女傾計，尤其是係想提醒佢哋某啲嘢嘅時候，唔可以直接同佢哋講，因為你一直接同佢哋講，佢哋就會覺得你話佢，所以最好就係喺日常生活入面利用其他人嘅例子去講，總之要令佢哋覺得唔係話緊佢哋。例如好似選科咁，其實喺阿女未同我哋提選科之前，我就會同佢講下喺網上面見到大學選科邊啲科目最多人爭呢啲資料嚟同佢初步咁傾下，當然唔係直接叫佢讀乜嘢科，而係透過原來大學某一啲科目好多人爭住讀，你睇下邊啲科目好受歡迎，慢慢滲啲資訊畀佢哋，等佢初步有啲了解，但係又唔會問到佢第二時諗住揀邊科。又例如阿仔阿女成日都會講到學校同學嘅嘢，呢個時候，正正就係一個好嘅時機透過講同學嘅嘢而等佢哋知道父母點諗。就係因為講緊同學，唔關佢哋事，所以可能佢哋會更加願意去傾同講，但係聽下聽下，聽得多佢哋又會知道其實父母嘅諗法係點。總之做父母都要留心下社交平台上發生嘅事，又要留心下新聞，好多時喺入面會發掘到好多題材同仔女去分享，透過呢啲例子，因為唔係講緊自己嘅仔女，就可以令到佢哋容易啲去傾，久而久之其實佢哋大約都會知道父母對佢哋嘅期望同諗法。

我唔係話同十幾歲嘅仔女傾偈全部都要講得咁婉轉，但係對於一啲唔係即刻殺到埋身嘅嘢，其實襯平時多啲時間用婉轉嘅方式同佢哋傾，慢慢潛移默化，其實佢哋會更加容易接受父母嘅諗法。亦都冇咁容易開啟佢哋嘅自我防衛機制，父母一講親嘢就以為父母話緊佢哋。而家做父母真係困難好多，都要敏感一啲，多啲留心社會上或社交平台上面發生嘅事，利用機會嚟同佢哋傾計。人就係咁得意，講人哋嘅嘢會好多嘢講！因為唔係殺埋自己身，會更加願意分享同傾。所以做父母真係要懂得善用機會，同埋利用其他人嘅例子，製造話題，多啲去同仔女分享，咁其實仔女自然就會比較容易接受同明白父母嘅諗法。