少年成長今日: 0|主題: 16023

收藏本版

回覆發帖

返回列表

跳至頁

查看: 3262 | 回覆: 0

老土 [複製鏈接]

csir3290

子爵府

積分: 12081

1^#

發表於 25-8-17 13:20 |只看該作者 |正序瀏覽 |打印

仔女細個嘅時候成日都會好期待同家長一齊出街，就算只係落去公園玩一陣，細路仔都好期待。只要能夠同父母一齊出街，細路仔都會表現得好興奮。主要嘅原因當然係細路仔好想同父母一齊，想父母陪住自己一齊去玩，另外因為細路仔亦都冇能力自己出街，多數嘅時間都係喺學校或者留喺屋企，所以當可以同父母出街嘅時候就會表現得非常興奮。但係當佢哋逐漸長大嘅時候，好多家長都會發覺細路仔開始越嚟越唔想同父母出街。點解會有咁嘅轉變，除咗細路仔開始長大，有自己嘅朋友，亦有能力自己出街之外，喺青春期嘅細路仔，正在經歷緊一啲性格上面嘅轉變，包括自我形象嘅追尋或者其找尋他人嘅認同，所以其中一樣令到佢哋唔想同父母出街嘅原因就係驚同父母出街會冇面或者畀人笑。可能有啲家長都會遇過同埋仔女出街嘅時候，如果遇到自己嘅同學或者朋友，佢哋通常都唔係咁願意同佢哋打招呼，或者直情唔想畀其他人見到。同父母喺街一齊行嘅時候已經唔再想拖住家長隻手甚或各有各行，一路行一路睇住自己嘅手機，都唔想同家長有啲乜嘢溝通。
我自己有陣時都會諗點樣可以避免呢啲情況發生，幸好阿仔阿女到而家十幾歲都做好肯同我哋一齊出街，出街嘅時候都仲會拖住我老婆同我隻手。如果唔想仔女唔鍾意同自己出街，第一件事就係要提醒自己唔好做一啲令到仔女覺得冇面又或者俗啲講令佢哋覺得老土嘅事情。簡單啲講呢個年紀嘅細路需要搵身份嘅認同，所以我哋做家長都要從衣著上檢討下自己，唔好著得咁老土。另外，喺街上面更加唔可以對仔女呼呼喝喝，令到佢哋覺得冇面。就算見到有啲乜嘢唔順眼嘅，都唔好喺街上面當面去講，就算係講都要搵機會同埋婉轉一啲。尤其是佢哋最怕父母喺條街度大聲講嘢又或者呼呼喝喝，呢啲都係令到仔女覺得無面嘅事，更加唔好喺條街上面揶揄或者斥責仔女，咁只會令佢哋更加唔想同我哋出街。另一方面喺話題方面，我哋都唔可以成日講埋曬啲好嚴肅嘅話題，嘗試了解多啲年青人嘅想法同話題，唔好成日覺得佢哋啲嘢無聊！而且同佢哋出街都要同佢哋去下佢哋鍾意嘅地方，可以同佢哋傾倒佢哋想知想傾嘅話題。諗返自己細個，有陣時都會覺得同父母出街老土，所以而家自己做父母就更加要提醒自己唔好令到仔女覺得同自己出街會有老土嘅感覺。平時我同老婆工作都已經好忙，難得放假可以同仔女出吓街，當然最緊要就係大家一齊開心同埋輕鬆一吓，千祈唔好破壞出街嘅氣氛。所以想keep住同仔女去街嘅時候繼續開開心心，又或者令到仔女繼續鍾意同父母一齊外出嘅話，做父母就應該多啲了解佢哋嘅諗法，做個知情識趣又唔老土嘅父母。