少年成長今日: 0|主題: 16130

收藏本版

回覆發帖

返回列表

跳至頁

查看: 17150 | 回覆: 0

賺回來的尊重 [複製鏈接]

csir3290

子爵府

積分: 12778

1^#

發表於 25-11-2 11:59 |只看該作者 |正序瀏覽 |打印

我幫手教籃球嘅球會，有一個嚟咗年幾兩年嘅教練，呢位教練年紀相對比較大，佢後生嘅時候打波嘅技術好好，所以佢教波好有經驗但係相對比較舊派。佢主要負責教兩班小朋友，一班年紀比較細主要係小學生，而另外一班就係中學生，由初中到高中都有。呢兩批小朋友技術都唔係話好高超，主要都係興趣班，中學生嗰班可能睇得NBA多，而且自己又經常喺啲街場度打波，所以雖然我哋啲教練都覺得佢哋技術唔係好高，但係呢班細路仔就覺得自己打得好叻。所以我哋都經常會報啲比賽等佢哋出去見多啲外面嘅世界，吸收多啲經驗，唔好成日以為自己好叻。問題就出於呢位教佢哋嘅教練，教練間唔中就會同我哋呻話呢班中學生唔係好尊重佢，又唔係好聽佢講。個教練話佢已經會落埋場同佢哋一齊練習，唔會只係企喺場邊度講，但係班細路似乎都唔係好聽佢講，有陣時對佢嘅態度仲幾差添。我哋自己有陣時都會勸呢位教練，其實而家嘅細路仔同我哋成長嘅時候嘅細路仔已經唔同曬，亦都未必會接受好似我哋以前細個嗰種嘅訓練模式，所以我哋自己嘅教學方法有陣時都要與時並進。個教練話我哋以前細個練波嘅時候，教練都係成日鬧我哋，成日提醒我哋，但係而家呢一代好似已經唔受呢一套。我就成日勸佢話而家嘅細路仔已經唔可以成日只係話佢哋，而且因為佢哋大部分都只係好似興趣班咁，所以唔可能好似我哋以前受訓咁，用高壓式嘅訓練。我成日都講打波為咗開心，如果佢哋嚟到訓練到最後都係唔開心嘅話，咁又點會維持到興趣呢！況且佢哋只係興趣班，即係可以隨時都唔打。
我同呢位教練講，尊重係賺返嚟㗎，唔會自然而生，好似我哋做教練咁，一個禮拜可能只係對住呢啲細路一至兩次，最重要嘅係首先要同佢哋建立關係，你同佢哋都未有關係就已經不停話佢哋，佢哋只會覺得你唔尊重佢，就算你教波幾叻都好，佢哋感受唔到你嘅尊重，佢哋又點會尊重你呢！正如呢位教練自己講話佢會落場同佢哋一齊打波練波，但係每次落場佢都係只係顯示自己有幾叻，而且不停只係講佢哋做得唔好嘅地方，咁佢哋只會覺得你作為教練只不過喺度奚落佢哋！呢一代嘅細路仔尤其是中學生，好需要人哋嘅肯定同埋成功感，所以我成日都覺得喺你話佢哋之前，你係需要同佢哋建立關係，亦都需要先肯定佢哋做得好嘅嘢，佢哋先至會慢慢將你嘅說話聽得入耳。

其實呢位教練嘅經驗亦都可以套用到係好多家長身上，好多家長就話自己嘅仔女去到青春期嘅時候就越嚟越唔尊重自己，明明細個都好聽講，但係去到青春期嘅時候就越嚟越多駁嘴，越嚟越唔尊重自己。有陣時嘅情況就好似呢位教練一樣，點解小學生嗰班冇咁多呢啲問題？就係因為對於年紀細嘅細路仔嚟講，大人都仲有權威，佢哋未必知道嗰啲叫尊重，但係知道嗰啲叫做聽話同埋服從，因為始終教練又好，家長又好，對佢嚟講都係一個權威嘅象徵。但係當佢哋一路長大見，嘅嘢越嚟越多，大人權威對佢哋嘅影響就會越嚟越少。而且正正有時家長會因為細路仔細個嘅時候聽話，而忽略咗同佢哋建立關係，到佢哋一路長大嘅時候，佢地就唔會再好似以前細個咁服從。講真年青人對我哋嘅尊重，係真係需要賺返嚟嘅，點樣賺就係嚟自我哋平日同佢哋之間建立嘅關係，正如我哋同嗰位教練講，其實喺練波之外，你都要同佢哋傾下偈講下笑，唔好淨係一味嚴肅，從平日嘅互動入面爭取到大家嘅關係，咁到你要話佢嘅時候，佢先至會真正重視你嘅意見。如果你成日都只不過係話佢哋，但係從不重視建立大家嘅關係，咁佢哋又點會尊重你呢！所以我哋做家長都係，唔好以為仔女對我哋嘅尊重係必然有嘅，當佢哋年紀一路長大，我哋就要從中賺取佢哋嘅尊重！尊重除咗來自大家日常建立嘅關係之外，仲來自我哋作為父母嘅一言一行，喺仔女心目中建立嘅形象。我哋作為家長又有冇盡力賺取仔女嘅尊重呢！

0 0 0

私人傳訊回覆引用

跳至頁

返回列表

回覆

發帖

熱門搜尋：

少年成長 今日: 0|主題: 16130

瀏覽過的版塊

少年成長今日: 0|主題: 16130